DC解碼

密食當三番 Nikon 1 J3

2013年01月16日 ~~ 第295期 Face

喺無反 DC範疇， Nikon算係遲起步嘅一間廠，但係 11年推出首作 J1之後，隔唔夠 1年就出第 2代 J2。今次仲誇張，相隔短短 5個月、啱啱踏入 13年， J3就已經搶閘亮相，對家 Canon都仲係賣緊第一部無反 EOS M咋！新款密集面世吸追新客，舊款亦能因此大幅割價促銷， J1就係因為咁成為 12年日本最暢銷無反 DC， Nikon擺明想密食當三番！

互動片段

DC解碼密食當三番 Nikon 1 J3 發布現場

Spec.

像素： 1,425萬
感光元件： 13.2× 8.8mm CMOS
感光度： ISO 160-6400
影片： 1080p
屏幕： 3"
記憶： SDXC
體積： 101× 60.5× 28.8mm
重量： 201g
售價：待定（單鏡套裝預計$5,000以下）
推出日期： 2月
查詢： Nikon（ 2907 1122）

J2出到 6隻色咁多，但 J3反而只有 5隻色（ kit鏡跟番機身顏色），而且除咗深紅色外，其餘嘅黑、白、米、銀色都比較內斂，冇 J2嘅粉紅同橙色咁搶。

加快對焦　再纖體

出新款總要有啲改變，雖然驟眼望 J3個樣同上兩代分別唔大，但原來機身再縮細咗，唔計用 DC仔 size CCD（ 1/2.3吋）嘅 Pentax Q，佢就係全球最小巧嘅無反 DC。
而之前兩代嘅 1吋 CMOS，都 keep住係 1,011萬像素，到呢代終於加到 1,425萬。但呢層唔係重點，筆者覺得 J3最大改進係改用全新嘅對焦系統，唔只對焦速度加快咗，拍得住好多人讚嘅 Sony NEX系，連拍速度仲達到每秒 15張，無反 DC嚟講算勁快！不過 Nikon都係偏向著重實際拍攝質素，較為忽略玩味元素，所以 J3依然冇乜特效玩，只有散景、全景等模式，略為單調。

機背唔算多掣，介面亦簡化咗， icon變到大大粒，用落覺得比 J2易用。

上兩代 J系都要人手啪盞 pop-up閃燈出嚟，但呢代終於識得因應環境唔夠光而自動彈出，醒咗！

機頂轉盤其實只有 Auto、創意模式、拍片等 5個掣，想用 P、 S、 A、 M mode，仍要入 menu揀。

到底 J3有幾細？就係長度短過 iPhone 5一截，闊度亦只係闊過 iPhone 5少少！

J3有成 135個自動對焦點，仲多過好多單反，唔怪得唔只對得快，仲隨手㩒一下都 focus得好準。

試相

影像細緻滑淨，顏色亦夠晒準確自然，而且營造散景能力唔錯，只用 kit鏡嘅 f/5.6光圈影，背景都夠矇。

Nikon 1 S1　為上車客而設

S1除咗白、黑、紅 3隻基本色外，仲有粉紅同軍綠兩隻 J3冇嘅顏色。

今次 Nikon嘅密食策略，唔單只為 J系出新機，仲開多個差唔多嘅系列出嚟，頭炮就係呢部 S1。佢無論外形同功能都同 J3一樣咁滯，除咗像素維持係 1,011萬外，最唔同只係抽起機頂模式轉盤，鼓勵人用晒全自動 mode去影相，配合埋更簡單易用嘅介面，定位係吸納剛由 DC仔轉用無反機嘅用家。佢將會跟 J3同期推出，售價待定，但估計只會平 J3幾百蚊。

機頂冇咗模式轉盤，只剩低開關、快門同拍片 3粒掣，因此重量比 J3輕 4g，長度同厚度就反而各多 1mm左右，不過望落唔多覺。

機背設計亦同 J3倒模咁款，但係介面多咗個 Shooting mode，代替冇咗嘅實體轉盤，喺入面揀 Auto、 P、 S、 A、 M等模式。