新八核心處理器 Exynos 5 Octa正式現身，不過未公布有咩新手機會配置，吊死粉絲癮。

Geek友講場

Internation CES 2013總力特集　 Samsung晒 S IV新技術

2013年01月16日 ~~ 第295期 Face

美國消費電子產品展 CES 2013（ Consumer Electronic Show），上週五（ 1月 11日）已經落幕， Samsung爆冷冇公開新旗艦 Galaxy S IV同 Note III，卻將未來手機新技術大晒冷，好似曲面 OLED芒、 8核心 CPU，隨時 3月頭殺部曲面 S IV出嚟！
所以咪以為冇新機就急急腳使咗筆年尾花紅買舊款機，一陣要 trade機換 S IV就真係勁樣衰！此外，場內仲有 Sony終極 5吋靚芒機 Xperia Z；平板機又玩新花臣，另外相機界都愈縮愈細，仲有唔少搞鬼彎曲電視同
好玩新品，必睇！

S IV原型機？

Samsung於 CES上，由高級總裁 Brian Berkeley晒出呢部用上 YOUM屈曲芒的原型機，令到熒幕可以多角度睇！

《 FACE》 Gadget版監修人
903 DJ Donald

哈哈，眨吓眼又 2013年，唔知科技可以又去到幾遠！大家都估有咩進步嘅同時，我反而希望價格可以退一步，畢竟眼見除了大廠外，有很多廠牌已經可以做到 iPhone或 S IV接近的功能，所以大家鬥科技的同時，應該也可以展開低價戰！雖然今次冇 S IV現身，不過一樣有驚喜，就係 Sony部 Xperia Z也來了！靚仔好樣，起碼一望就知與別不同，而且 HD芒吸引，功能同系統都好正，推介！

S IV大預言：曲芒+8核？

即場示範合埋手機蓋，斜邊熒幕仲可以 show到行字。

作為 iPhone頭號對手， Samsung Galaxy並冇喺 CES晒新款機，但就將一系列手機新技術晒冷。好似吹足 3年嘅曲芒手機，今次終於有真面目同大家見面！呢部搭載咗 Samsung自家曲芒技術 YOUM的原型機， 5吋大、 16： 9芒其中一邊有個斜面約 60度的熒幕邊。有網民插個曲芒冇用途，但記者就唔係咁睇，好似 Brian示範將 flip cover合埋，芒邊仲可以見到多種資訊好似走馬字咁 loop，唔使再喺 cover上開個孔睇有冇來電同 SMS。可以想像仲能夠變成 scroll bar，用拇指就能夠勁順手掀頁、睇網；其他功能就等班 app developer發揮想像力囉！
同場仲公布埋三星自家最新八核處理器 Exynos 5 Octa（正式應該叫「雙四核」合成設計），除更加快速，更講明較舊款處理器減低電力消耗達 70%，話唔定Ｓ IV可以同尿袋講再見！
新 U推出日未定，但如果可以將呢堆新技術集中係 GALAXY S IV身上，再學阿奴咁話低價賣機，咁撼贏 iPhone都唔係冇可能！

S IV搞邊科外國網站繼續吹

雖然 CES推出技術一籮籮，不過有關 GALAXY S IV的傳言就喺網絡四起，統統都暗示新機就算冇曲芒，都會配備唔少突破技術。

版本 1
3月現真身？
可信度： 50%

網站 SAMMOBILE聲稱得到 GALAXY S IV的手機相片，睇外形飛走埋個 Home button，驚喜度十足，而且邊框更加幼，機身有望變得更細。網站仲聲稱得到 S IV發布會的邀請，如果屬實， 3月就有新機玩啦！

版本 2
雷射 Visual keyboard
可信度： 80%

俄羅斯 YouTube channel ROZETKED發布一段 S IV短片，外形只係 S III拉長，睇到影片後段，新機充電座上仲有 laser keyboard功能。咁啱得咁蹺，今年 CES亦有來自韓國的 Celluon公司展出 Laser keyboard配件（ iPhone用），賣美金$149.99（約$1,163），如果 S IV真係有呢項功能就正啦！

Laser keyboard

S IV想像圖

索尼吹大風
Sony Xperia Z

晚晚睇電視劇，人人手執一部 Sony手機，很想要吧？今次 CES，冇傳聞中嘅 GALAXY S VI，擔大旗就有 Sony呢部 Xperia Z。但心水清的 Sony粉絲，都記得另一旗艦機 Xperia V發布咗不過 3個月，最近廣告都日日賣住 4G防水高清拍片呢堆賣點。心諗呢部 Xperia Z仲有咩可以再勁？首先 Z係 Sony首台 4核手機， 1,300萬像素相機，可以拍全高清 HDR影片、相片！
另外個芒再加大到 5吋、 1080p，唔畀 Note II專美。不過搞到個芒咁大，又強調拍片功能，最令人激心新機係冇得換電！而且用上 Mobile BRAVIA 2技術，卻冇改用顏色像真度更高嘅 IPS芒，唔少高階 user都上網大呼失望。但對於有心轉行玩 Android機的 user，三叔以外有多個選擇真係唔錯！

Xperia Z又係 sell防水，睇怕生活防水功能，已經係日系手機嘅標準裝備。

Spec.

系統： Android 4.1 Jelly Bean
處理器： 4核心 1.5GHz、 2GB RAM
制式： 4G、 3.5G、 GSM
屏幕： 5" 1,080× 1,920 TFT
鏡頭： 1,300萬像素背照式 CMOS
記憶：內置 16GB，最高支援 32GB MicroSD
體積： 139× 71× 7.9mm
重量： 146g
顏色：黑、白、紫
預計售價：約$5,300以上
推出日期： 2013年第 1季
查詢： Sony（ 8203 8863）

鏡頭靚係 Sony手機賣點，不過呢張相話你知：只限後置鏡，想自拍影得靚，請遵照示範動作。

雖然 5吋芒，不過睇落都算薄，機邊大大粒銀色開關，設計都比韓國機靚多多聲。

國產新勢力

今次手機界冇韓國代表出場，日本就得 Sony單挑，估唔到另一新勢力，就是咱們強國代表。成功爭取國際傳媒報道，一齊睇有乜咁巴閉。

鋼鐵人好熱心　 Lenovo K900

去年 8月 Lenovo同 Intel合作推出咗 K800，使用 Intel Medfield單核處理器，外國網站跑分測試，竟能跟 Samsung GALAXY NOTE雙核機匹敵。今次 CES加推新機 K900，玩 5.5吋高清大芒，再換上 Intel雙核 2GHz新 U「 Clover Trail+」，表現分分鐘贏唔少四核機。

正面睇，外形真係悶爆，吸引位喺個鋼面機背處，仲有埋 Intel logo顯身價。

CES上展出的真機，仲有多個蛇鱗紋機背，中國人真係喜歡呢類賀年機款。

Spec. Android 4.2 Jelly Bean/雙核心 2GHz/2GB RAM/3.5G./5.5" 1,080p IPS芒/1,300萬像素鏡頭/內置 16GB/支援 32GB MicroSD/6.9mm厚/162g/13年 4月推出/Lenovo（ 800 938 838）

無敵巨無霸 Huawei Ascend Mate

全白機身設計，而且連 Home button都無，夠簡潔。

雖然被美國同歐盟話係間諜機，不過 Huawei近年密密出中價 high spec.手機攻佔中階市場，調查機構 Gartner指出，華為手機銷量已進佔全球第 6名。呢部 Ascend Mate有今年 CES全場最大 6.1吋屏幕，仲有勁量 4,050mAh電池，認真嚇親。有網站指新機定價將低於 3千人仔，可能香港人反向去大陸做水貨兵團掃機都唔定！

Spec. Android 4.1 ICS/4核心 1.5GHz/2GB RAM/3.5G./6.1" 720p IPS芒/800萬像素鏡頭/內置 4GB/支援 32GB MicroSD/163.5× 85.7× 9.9 mm/198g/13年 1月推出/HUAWEI（ 2151 3822）

Tablet兄弟　變形超機戰

上年 notebook陣營為對抗 tablet求出路，齊齊玩變形，反芒、拆芒乜都齊。去到 2013連 tablet自己都要變形玩內戰，打唔贏 iPad都要同其他 Android tab爭地盤。
最矚目係有三家公司同時以 tablet變身遊戲機，將打機陣地搬到出街。其中 Razer就將 tablet gamepad實物化，由去年的概念機「 project Fiona」，正式變為實物機 Edge，準備於今年第一季開賣。呢部 Razer Edge最重要係行 Windows 8，部機規格相當厲害，行 i5處理器、 4GB DDR3 ram同 NVIDIA顯示咭，所有 PC game如《 COD》、《 FIFA》都十卜，對玩開 steaming的用家當然係福音，個 10.1吋高清 IPS芒，相信仲吸引埋路人睇你打機英姿。
除了 Razer，法國 tablet品牌 Acrhos，同埋顯示卡廠商 NVIDIA，就推出行 Android的 gamepad，又係跟埋個打機手掣，齊齊玩變形。

網站 The Verge的鬼佬記者拎上手試玩，講真，部機真係大得誇張。

手掣似兩支 PS3 move，仲可以即時拆走變番 10.1吋 Win 8 tablet。

除可以加手掣， Razer Edge仲有 keyboard docking同普通座枱 docking。

Spec. Windows 7 Home Premium/ Intel Core i5（ 1.7GHz）/4GB DDR3/10.1"（ 1,366× 768）/ 64GB iSSD+500GB HDD/體積未公布/預計推出日期： 2013年第 1季/售價：$7,744（淨機）、$1,930（手掣）、$767（ docking）、$1,543（鍵盤 docking）/查詢： http://www.razerzone.com

迷你機王 NVIDIA Project Shield

顯示卡廠商 NVIDIA開發的 Project Shield，由個 5吋 Android tablet加手掣組成。雖然芒細細，不過都有 1280× 720解像度，畫面質素有保證。最吸引機迷之處，係佢除可玩加強版 Android平台 3D game，仲可以雲端操控電腦打 PC平台 game。怕個芒太細，佢仲提供 HDMI插頭，將會十卜 4K電視，夠大未？（售價、發布日期、詳細規格未定）

唔知機迷會唔會又嫌呢個芒太細呢？

現場示範將 Project Shield接駁大電視，打機更爽！

超抵玩 Archos GamePad

一向 sell平價 tablet的品牌 Archos，都有推出連手掣 GamePad。呢部行 Android的 7吋機，望落大小同售價都更易為一般用家接受，新機鐵定今個月內於北美開賣。（約$1,320）

其他變形一族
軍事防機　 Panasonic ToughPad FZ-G1

咪以為呢班 tablet淨係識變身做打機介面，好似 Panasonic咁，脫離變輕薄大潮流，搞到部機大大嚿。呢部機改名做 ToughPad，唔係浪得虛名，其防水、防塵、防撞程度，通過美國軍方測試標準 MIL-STD 810G，非常厲害。 10吋行 Win 8版本名為 FZ-G1，定價成 2,899美金（$22,471），即使話於 2月開售，都唔係人人頂得順。

真係好大型，邊框又冇偷薄，實體掣又多。話明防水，唔少得有倒水示範。

又玩曲芒 Intel PaperTab

PaperTab睇相都 feel到極之薄，如果將來 iPad都可以咁輕就正！

曲芒唔係得 Samsung有， Intel都展出一塊搭有 Intel Core i5處理器的 10.7吋 PaperTab。雖然暫時原型機只得黑白，但都已經設定咗屈起個芒就可以做到翻頁效果，令曲芒實用度提高。

包膠細路機
Polaroid Kids Tablet

雖然係行 Android，介面重新設計，整到極之 colorful，專氹細路歡心。

即影即有品牌寶麗來（ Polaroid）近年積極求存，勢估唔到出部小朋友專用 tablet，真係叫粉絲嚇一跳。呢部 7吋 tablet，行 Android 4.0，不過話明細路專用，規格都唔算勁，反而四邊包晒厚膠，任細路點扔都唔易爛，而且仲要父母掃一掃張咭，先可以開機，防止小朋友成日玩，設計都叫細心。以美金$149而言，家長實畀 like！

4K+ OLED TV
電視雙線革命

Samsung曲芒電視，未有型號，尺寸 55吋，上市日期、售價未定。

香港正為爭取多個免費電視台而起革命。今年 CES電視新產品同樣統一口徑，兩個 keywords「超高清 UHD 4K」同「 OLED」象徵新世代電視革命降臨。韓國廠 Samsung同 LG近幾年市佔率贏晒， CES大騷 OLED曲芒電視，不過日本廠都唔失禮，挑戰 4K最大尺寸夠噱頭。不過一眾新技術大多冇確實上市日期，要普及仲尚待時日，睇住 CES幻想吓未來電視有幾勁先喇。

Samsung、 LG
雙雄玩曲芒

OLED比起𠵱家常見嘅 LED背光只係多咗個 O字，但兩者為完全不同嘅顯示原理， OLED能夠令機身更薄，有佢先做到曲芒。韓國雙雄 Samsung同 LG就雙雙喺 CES展出世上唯一曲芒 OLED電視，佢哋話呢個設計能提升側面可視角度，售價同上市日期都未有確切資訊，預計曲芒電視暫時尚有待測試， 4K大尺寸電視先係力銷對象。

另一曲芒電視 LG EA9800，用上 LG獨家 WRGB白色次像素技術，話能夠比其他電視顯示更多層次嘅色彩。（售價及上市日待定）

Samsung另一部焦點作品 F9500，行 OLED加 4K超高清，提供 Samsung Milti-View功能，兩個用戶戴咗專用眼鏡可喺同一屏幕睇到唔同內容。（ 2013年初上市、售價待定。）

Panasonic、 Sony愛鬥大

當今電視愛鬥大，旗艦級產品有 80多吋見怪不怪。不過 OLED因為技術仲未成熟，目前仲未做到呢類旗艦級 size。 Panasoic同 Sony齊齊展出 56吋聲稱為全球最大嘅 4K OLED電視，估計已經係 OLED目前做到最大嘅尺寸。

Panasonic跟 Sony同時聲稱自家產品為全球最大 4K OLED電視，另一邊 Samsung、 LG一樣話自己全球首部曲芒，世事有冇咁巧合？
（兩者均為示範作品）

Sharp快人一步
玩 8K

Sharp於 CES展示出 85吋 8K LCD電視，現場報告就貼到埋一埋都睇唔到粒粒，明顯比 4K更細膩同有立體感。

喺 CES各廠都畀咗個 4K一個新朵「超高清 UHD」，差唔多部部新機都話自已係 UHD，一定係 2013年大趨勢㗎喇。殊不知 Sharp仲快一步，展示出解像度高達 7,680× 4,320嘅 8K電視，清晰度高出主流 Full HD 1,920× 1,080 16倍。不過 Sharp並冇公布此產品嘅詳細消息，預計明年都係 4K天下， 8K等多幾年先。

4 K技術入屋

除咗電視， CES亦展出了大量 4K超高清產品，就連平板嘅屏幕都升上 4K級數，雖然目前 4K電視仲係貴過架車，但預計將會於今年內逐漸普及化入屋。

Panasonic 20吋超大板

雖然都係叫 tablet，但 Panasonic呢件 4K平板足足有 20吋大，重達 2.4kg，可謂平板巨無霸。解像度達 4K標準 3,840× 2,560，接近 A3紙嘅 15:10格式，主要針對攝影師執相同美術排版使用。（ 2013年初上市、售價待定）

Sony 4K攝錄機

4K目前片源極少， Sony就喺 CES展出呢部 4K手提攝錄機，能夠拍到每秒幀數達 60fps嘅 4K影片，預計價錢都係專業級水平，要平拍 4K片暫時都做唔到。（發售日及售價待定）

4K電視推得快
國產都玩

影音專家
李柏權

親身去咗 CES睇嘅 AV影音專家李柏權就大讚 4K表現唔錯。「本來以為得大廠會出，喺會場睇到連大陸廠都有，推出速度仲比想像中快。睇落亦覺表現好好，尤其係被動式 3D，一般高清睇落較暗同有橫間， 4K解像度高咗即刻舒服晒。不過始終係新技術，同埋片源未配合到， 4K電視會走高階路線同貴，未咁快普及到。至於 OLED就更加要等等，兩種新技術唔會一齊出， OLED幾年前睇落畫質超班，但近幾年 LCD技術進步咗睇落分別又唔係咁大，令到 OLED定位比較尷尬。

細 DC懷舊熱

嗰邊廂電視惡鬥新科技，呢邊廂相機卻齊齊爭造懷舊外形。好似 Canon新玩意 PowerShot N就玩左右平衡外形+90度翻芒，機頂芒構圖、扭鏡頭搞 setting，用法似足玩緊舊式雙鏡機。而 Fujifilm X20同 Samsung無反 NX300都一齊扮菲林機。

的骰小機飛走快門掣

Canon Powershot N個樣正面睇四四方方，後面更只得一個芒，除開關掣同播放掣外已飛走所有按掣。操作秘訣全部暗藏於鏡頭嘅控制環，扭動可以 zoom in、 zoom out，快門掣亦收喺控制環上下方，似足玩緊 manual菲林機，可謂簡約設計嘅極致。稍嫌佢個掀芒只能夠掀到 90度，自拍唔方便，但 Canon名氣，加上 WiFi功能同大量 Instagram式濾鏡，單賣外形都唔難成為熱賣潮機。

Canon Powershot N
1,210萬像素/8倍光學變焦/f.2.8/78.6× 60.2× 29.3mm/售價、上市日待定。

快門掣就喺控制環正上、下方，採用按壓式設計，按落去就 feel到，睇落完全唔似一個掣。

相機亦可以用 touch screen操作，不過屏幕只能翻至 90度，樂觀睇構圖時似用雙鏡機扮型，難聽就唔可以翻向前玩自拍。

繼續潮格 Fujifilm X20

左： X100
1,630萬像素 APS-C感光元件/23mm定焦/f2.0/1299美元（約$10,070） 3月上市
右： X20
1,210萬像素 2/3＂感光元件/4倍光學變焦/f2.0/599美元（約$4,600） 3月上市

Fujifilm以一系列日系潮廣告型盡相機界， CES上亦公布兩款外形先決嘅新機 X100S同 X20。前者為 X100嘅改版、對焦性能大幅提升，大 sensor配備 23mm廣角定焦鏡，賣 1,300美元。 X20加入光學觀景器，成件事更加型，黑銀 classic外形， 599美元身價，平機都有得潮！

外形覺醒 NX300

2,030萬像素 APS-C感光元件/122x64x41mm/280g/749.99美元（約$5,800） 2013年內上市。

Samsung手機稱霸，相機呢邊亦力求進步，無反 NX系列最新機 NX300有趣新功能得到唔少好評：比如新推出之 3D鏡頭、內建 WiFi跟手機 app互動 upload傳相。最抵讚係佢個 classic新外形，擸下眼以為係 Fujifilm新機添。

CES 2013驚喜 Gadget

睇完一堆新手機新電視都仲未夠新意，畀埋你睇呢一批極有創意嘅新商品。記者最 buy就係呢款 LEGO Mindstorms EV3智能積木，用家能夠組成不限外形嘅電動機械人，並要編寫行動程式令佢郁動，唔少國家都利用佢當互動教材引導學生認識人工智能。新一代更能駁 iOS或 Android手機編程式，唔只介面更靚， app內仲有 17種不同外形機械人嘅數碼組合說明書，畀你睇住砌。（ http://www.MINDSTORMS.com）

Spec.

16MB內置 RAM/對應 SD咭/2個觸控、 2個紅外線、 1個 6色光感應器/支援 iOS及 Android平台/349.99美元（約$2,800）

想砌蛇、牛、羊、車形機械人，唔係單單砌積木就得，仲要寫好相應行動 A.I.， EV3先可以行動自如。

上一代已經有 fans製作非官方 IOS軟件，今次 LEGO正式引入 IOS、 Android兩大平台 app，畀你無線操作、寫行動程式。

PadPad有便便

好玩唔玩玩屎？冇錯，呢款 iPotty for iPad係一個附有 iPad支撐架（對應第 2、 3、 4代 iPad）嘅嬰兒屎塔。不過佢並冇特別功能，只係用 iPad app吸引細路坐定定便便。
售價$40美元
（ http://www.ctadigital.com）

變化球鍵盤

Tactus morphing touchscreen keyboard係一片屏幕 cover，內有一層記憶液體，鍵粒位置有一個個「小口袋」，開動後液體會自動注入令鍵粒凸起，按鍵時仲會有少少回彈性，似足女明星起伏不定嘅身材。
發售日及售價待定
（ http://www.tactustechnology.com）

智能膠叉點

好多手機配件都幾「冇叉用」，但呢款 HAPILABS HAPIfork一定唔會，因為佢本身就係一支叉，能夠 check你㓤過幾多次食物，連結電腦後，輸入埋食物種類，就會話埋你知食咗幾多卡路里。不過中國人愛用筷子，快啲出埋啦！
$99美元
（ http://www.hapilabs.com）

特工影印機

以前睇 Tom Cruise《職業特工隊》，見到一部可以 copy人樣造立體面具嘅機器，原來真係已經有得賣，不過 3D Systems CubeX Trio只能用塑膠製作比較簡單嘅立體模型，先喺電腦入資料，之後部 printer真係好似一部織布機咁，喺一張白紙上一層一層疊出一件 3D模型。

上 YouTube搵「 3D Systems CubeX Trio」影片，就可以睇到個籃球係點 print出嚟！

2月 8日發售、$2,499美元
（ http://www.3dsystems.com）