香港專業教育學院（沙田 IVE）網絡設計黃定宇
之前阿宇曾在 2012年世界小丑冠軍吳浩賓（左）的公司 Red Nose Production幫手，做足三年免費助手，三年之後才敢拜師，成為 Kenneth唯一的徒弟。

Main Camp

IVE新紮小丑王　扭潮波上位

2013年01月16日 ~~ 第295期 Face

講到畢業後搵工，個個大專生立即大嗌頭痛。最低工資升到 30蚊，新畢業大專生分分鐘都係做保安員。
偏偏就讀香港專業教育學院（沙田 IVE）網絡設計的黃定宇卻話未驚過。他將扭波、扮小丑的興趣化為職業，一年前自設公司，短短時間已經為十多間幼稚園作定期活動搞手，連煤氣公司、美國萬通保險也找他布置場地，連細佬都被吸引瞓身幫手。雖日日扭到冇停手，但仍樂在其中，黄定宇自信說：「冇興趣嘅職業點會做得開心。」搵到錢又可以達成夢想，真係羨慕死！

除夕夜， 23歲阿宇及 22歲的細佬阿三（黄定三）在場擺檔扭波，還以為是渾水摸魚想發新年財的人，不過他們確實快手，不用 1分鐘便扭出神似卡通人物。

朋友笑我傻仔

做小丑、扭波道具多多，屋企也變了貨倉。氣泵、測壓器、大大支氫氣樽，最基本的氣球有超過五萬個，但媽媽一句怨言都冇，果然撐場。

令兩兄弟成為扭波達人，全因哥哥阿宇在中學參加興趣班，「當時上了 10堂興趣班，我在禮堂當住全校同學扭波、玩雜耍，結果不停失手，點知全場冇噓我，仲拍手鼓勵我，原來氹人開心，自己仲開心！」自此阿宇決定拜參加美國小丑世界賽冠軍及全港唯一迪士尼氣球師的吳浩賓為師，希望成為真正小丑，「師傅 6年前到我中學教班，我見佢咁勁，都唔敢拜師，只係做免費助手，到 3年前正式跟佢學藝！我知道要做個出色小丑，起碼有一樣技能突出，而我又比較鍾意扭波，所以就苦練，我匿埋屋企足足 1年日日扭波，簡單如手槍、帽、眼鏡，難至米奇老鼠都密密扭，扭到全房都係氣球，畀阿媽鬧，最後要扭完一個即刻整爆，免得冇碇擺！」

世界小丑冠軍吳浩賓

呢個𡃁仔好勤力，好肯捱，瞓身為自己的夢想奮鬥，我同佢都亦師亦友。

週末狂爆騷

為了找更多表演機會，阿宇帶着小丑夢入 IVE，向校方申請扭波學會，「當時只諗教吓同學，點知讀幼兒教育嘅同學，帶埋大批現役老師及家長上堂，當中大部分仲成為我𠵱家嘅客人，亦令我成為 10多間幼稚園定期活動搞手。」要將興趣化為職業當然不易，阿宇毅然開設公司接 job，教扭波、雜耍，提供小丑服務，到幫婚禮及大型活動做扭波布置，每個週末定必排爆，「我哋冇租地方，工場都係自己屋企，所以不用投資太多錢，我哋做超時工作都冇所謂，就算夠鐘，見到仲有小朋友未收到波波，我會扭完為止。」
阿宇受歡迎除了不怕蝕底，最重要是他將潮人潮卡通變成自己的作品，「講真扭氣球香港多的是，要突出一定要有賣點，講技術更大有人在，我惟有將潮人潮卡通變成作品，好似蝙蝠俠大熱我就扭，呢期 PSY紅，我當然唔放過啦，難得搵到咁開心嘅職業，我一世唔轉工啦！」

作品神似

阿宇將自己的氣球作品放在 fb上做生招牌，現有蝙蝠俠、憤怒鳥、細菌小子及江南 PSY，個個入型入格，似到十足，成功吸引不少客人主動送上門。

憤怒鳥大堆頭

全球 hit爆的電玩憤怒鳥，阿宇都不放過，「憤怒鳥已經算係自己作品中較容易製作，不過一定要顏色夠繽紛及大堆頭，忠於原著，只扭一隻一定唔似。」

細菌小子講比例

不少女生喜愛細菌小子，阿宇亦變成自己作品，「要扭得似細菌小子，比例好緊要，特別係佢棚牙，比例一錯就會走樣，我都練習咗好多次先扭得似。」

PSY頭最難

阿宇見到韓星 PSY在網上熱爆，立即試扭。「我足足用了 4小時製作，最難不是佢嘅招牌馬舞動作，而是他的經典蛋撻頭，如果扭唔似，就唔似 PSY。」

蝙蝠俠夠英

上年《蝙蝠俠》第 3集大熱，阿宇就即時在家中研究如何扭得神似，「話晒係英雄，最難要扭得佢夠英，仲要挺胸收腹，所以試咗好耐先成功。」

除了親自幫客人扭波，兩兄弟亦會到多間中小學教班，希望將扭波普及，校方亦指：「其實我知佢哋收平咗，全因為參加嘅係學生，認真唔話得。」

宇哥哥好畀心機教我哋，上堂仲會搞 gag添！

我學咗 3、 4堂就識扭聖誕老人啦！屋企都讚靚。

扭到病

阿宇成立公司 Color Life一年就被煤氣公司睇中，當然要畀萬二分心機：「我哋扭咗兩晚通宵，扭到手到痛埋。」

千人爭讀小丑班

除了好像 IVE阿宇找師傅學做小丑，其實本地海洋公園亦有小丑訓練班，每年暑假海洋公園都會開班，名額只有 20名，每次都有近千人報名，競爭超激烈。而美國則有較多的小丑學院，其中佛羅里達州大學更有科名為馬戲團活動課程（ Circus Activities）修讀，當中包括所有馬戲團的常見表演及小丑，不過只供校內生修讀。