李蓮英一生緊守「奴才就是奴才」嘅格言，甘願陪住慈禧同甘共苦。喺世人眼中佢係歷史罪人，但喺慈禧心中，卻係最寵信嘅大太監。

有劇追

《大太監》登場　黎耀祥爭帝冇手軟

2012年11月02日 ~~ 第901期忽然１周

◎無綫今年視帝之爭可謂歷年最刺激。以目前形勢嚟睇，《雷霆掃毒》嘅林峯呼聲最高、《天梯》嘅陳豪及 Law霸鄭嘉穎亦唔弱，尤其《 On Call 36小時》嘅馬國明走勢更係凌厲。不過，下星期開始，台慶壓軸大劇《大太監》一出，視帝戰嘅形勢肯定嚟個大逆轉。
◎《大太監》係兩屆視帝黎耀祥連續第三年擔任台慶劇男主角。《大》以倒敍手法講述清朝太監李蓮英喺宮中嘅經歷。祥仔飾演被視為歷史罪人嘅李蓮英，一舉手一投足都係戲，完全起到鎮場作用。睇嚟，祥仔大有機會第三次坐上視帝寶座。

年近 50嘅黎耀祥可謂「大器晚成」人辦。自從 09年憑《巾幗梟雄》嘅柴九吐氣揚眉之後， 10年再憑《巾幗梟雄之義海豪情》冧莊視帝，從此成為無綫一支定心棒，因為凡有祥仔嘅劇，收視絕對唔係問題。
講番《大太監》，其實祥仔喺好早前嘅《金牙大狀》入面，已經做過李蓮英，所以《大》係佢第二次做李蓮英。話時話，《大》似乎有啲顛覆咗以往嘅宮廷傳統，尤其太監，因為《大》所講嘅太監可以同宮女拍拖、一樣有感情戲。

政治角力

《大》嘅李蓮英同安德海（曹永廉）自細賣身入宮做太監，拜老太監劉多生（鍾景輝）為師，本來師兄弟感情好，先後成為慈禧太后（米雪）身邊重臣，可惜安德海利慾熏心，令安份守己嘅李蓮英不滿，兩人因而疏遠。而總管太監陳福（岳華）見蓮英同德海得太后歡心，驚地位不保，向兩人下毒手。蓮英好彩得宮女倩蓉（胡定欣）同御藥房太監姚雙喜（黃浩然）相助先化險為夷。

五大太監

太監彭三順（陳國邦）恃着舅父陳福（岳華）乃太監總管而狐假虎威，令安德海（曹永廉）不滿，與其起爭執。

太監總管陳福（岳華）老奸巨猾，做事不擇手段，視李蓮英和安德海為心腹大患。

同治帝（梁烈唯）任性反叛，不務正事，玩到無嘢玩就玩太監。

胡定欣飾演嘅宮女倩蓉，因為戀上宮中侍衞而犯宮規，得李蓮英打救，兩人卻發展出一段畸戀。胡最後亦難逃一死。

慈安太后（邵美琪）表面溫婉，實則不忿宮中以慈禧為首，經常暗中搞破壞，並挑撥同治帝和慈禧母子關係。

被慈禧以「大不敬」打入冷宮嘅婉太嬪（李詩韻）跟太監李蓮英及宮女倩蓉相處融洽。

久困宮中嘅和碩公主（陳茵媺），誤打誤撞下跟御藥房太監姚雙喜相識，且對姚甚具好感。

忠心護主

角色配搭

同治帝（梁烈唯）冊立皇后，慈安太后（邵美琪）怕慈禧太后掌握大權，於是同恭親王（張國強）挑撥朝中勢力，令慈禧孤立無援，喺波譎雲詭嘅變局中，身邊仍然有李蓮英。
其實慈禧算執到㗎啦，做君主嘅，有邊個唔想身邊有個好似李蓮英咁嘅忠臣。唔信，問吓梁振英呀？
最後提醒大家：《大》於 11月 5日 8:30pm首播，並連播兩集，翡翠及高清翡翠同步播出。