因為○六年主持的《志雲飯局》引起了全城熱話，令當時任職無綫電視廣播業務總經理的陳志雲，亦成了公眾人物，曝光率媲美很多小生花旦。螢幕上，他總予人印象口才了得、說話精闢、幽默風趣兼心思細密；螢幕下，則總是見他站在六叔邵逸夫和方逸華身邊，是他們的得力助手。半年前，五十三歲的他為人生下半場開展新一頁，離開工作了十八年的TVB，重返曾經工作了兩年多的商台當行政總裁，甫上場不久，便惹來不少人事風波，腥風血淚，但今天坐在面前接受訪問的志雲，卻顯得氣定神閒。「我同我依家啲同事，都認識傳媒嘅生態！有時候，人哋關注我哋嘅動向都係一件好事，至少有人會去報道呀！我哋並冇因為呢啲報道而唔開心o架，反而好多時我哋只係會話：『嘩！咁樣炒作都諗得到呀？』哈哈哈！真係冇乜嘢不和。」他就是個這樣積極樂觀、思想正面的人，無論面對着任何人與事，他都只會着眼於好的一面，難怪他從小到大，人緣也極佳，即使一○年他捲入了貪污案，身邊還是有不少人自動自覺向他伸出援手力撐，當中包括一名神秘富婆曾給予他五十萬現金打官司。「我啲朋友真係好愛護我！愛到令我感動落淚！」說罷，只見他嘴角露出欣慰的笑容，眼睛泛着淚光。

 

雪中送炭

要說陳志雲予人感到最震驚的事，必定是一○年三月他因捲入貪污案被捕。雖然去年九月他獲判脫罪，可是律政司不服，排期至今年十一月上訴。有關案情，當事人不能說，我也不能問，惟有着他談談此事上所體會到的人情冷暖。

「好老實講，我當時冇體會到冷，只係體會到暖，甚至乎係好熱！

「例如有一位上咗年紀嘅婆婆朋友，佢有日約我去飲茶，塞咗一個公文袋畀我：『志雲，你攞走啦！呢度有五十萬現金，我驚你冇錢打官司。我冇話畀我啲仔女聽，我驚佢哋唔鍾意我咁做！』我話：『你一定唔可以咁，我唔要得你呢袋錢！』我即刻就搵我個司機哥哥陪同佢擺番啲錢入去銀行！」

二○一○年因涉貪案，陳志雲被廉署拘捕，幾番折騰，令他身心疲累，猶幸背後得到眾多友好力撐！

當年就涉貪案舉行記招交代，「真的假不了，假的真不了」就這樣成了他的金句。

他另外一位同樣擔心他沒錢打官司的朋友，更是上門寫了一張三十萬的支票給他。「佢連啱啱出完埠，用剩咗嘅美金碎銀都畀埋我！對佢嚟講，嗰三十萬並唔係一個細嘅數目！我最後點都冇要到，一定要佢收番！」

接着，他還收到大姐明林建明放在住所管理處送給他的洗頭水和沐浴露。「好搞笑o架！全部都係碌柚葉造！哈哈哈！」連林以諾牧師也千方百計每星期上門跟他查經。「佢話好擔心我會自殺喎！哈哈！」

最令他感到意外的是，兩位住在他樓上的太太，也自動請纓。「我嗰陣菲傭啱啱放假返咗菲律賓，佢哋㩒我門鐘，問使唔使幫我買嘢食，又話可以幫手車我出街，唔使畀記者發現！其實我當時連佢哋姓乜都唔知，真係好感動！」

去年九月初陳志雲涉貪罪名全部不成立，當庭獲釋，但遭律政司上訴，今年十一月六日案件將再度聆訊。

當年因主持《志雲飯局》，令陳志雲人氣急升。心思細密的他，每集也會送贈被訪者別出心裁的禮物。