Brenda身後全球只有八張的床價值百萬,貴在床褥芯用了意大利羊毛、野生駱馬毛,配三層獨立袋裝彈簧設計,製床師花 168小時人手製成;被和咕用冰島 eider羽絨製成,全套要廿萬元。

名氣生活

周啟邦太太 「床」住愛

2012年09月13日 ~~ 第1175期 香港《壹周刊》

自從令人艷羨的鴛鴦蝴蝶缺了一個,周啟邦太太周譚月清已絕跡 ball場,正如她所言:「叫我一個人去做咩?」叫得動她的,就只有兒子周國豐。這日她到兒子代理的 Vi-Spring專門店揀床褥,為了令媽咪瞓得舒服健康,周國豐特別為她訂做了張十五萬的睡床,周譚月清開心的說:「我都未瞓過咁貴嘅床!」當然,更珍貴的不是床的價值,而是兒子那一份窩心的關懷。

瞓木板


周譚月清( Brenda)準時坐着她的七人 van,由男傭攙扶着下車到跑馬地、她的獨子周國豐( Brandon)開的 Vi-Spring床褥專門店揀睡床。笑容可掬的她對任何人都很客氣,就連店員斟杯水給她, Brenda都會近乎恭敬地說:「唔好意思,真係好多謝你。」
兒子創業賣床褥,代理英國皇室愛用的品牌 Vi-Spring,最低消費都要十萬,以為曾在英國讀法律的 Brenda一早已歎過這牌子的床褥,誰知她說:「呢啲床咁貴,嗰陣俾錢我都會攞嚟買衫、買鞋、買手袋啦。」反而廿七歲仔的 Brandon,就捨得花五十萬買張床褥豪歎,之後仲斥資數百萬做埋香港代理,就連他兩個分別兩歲半的長子禮淳和五個月大的細仔禮熙,都瞓訂做的靚床褥,所以他堅持媽咪要落鋪親自試瞓揀床, Brandon無奈地說:「佢依家瞓緊張木板咋!」 Brenda解釋話:「之前張床太軟,瞓到我好唔舒服,於是換咗塊板嚟瞓,硬啲舒服啲。」幾經游說, Brenda終於肯換過張床,連床架、床頭板,盛惠約十五萬。


床褥可選擇軟硬度, Brandon提議買床前先要花十五分鐘試床褥,而周太最終揀了硬度屬 firm的型號。


Brandon替母親揀床頭板,最終決定用易襯的杏色。




新店開張, Brenda與兒子師傅清洪(左一)剪綵。

阿仔年輕創業, Brenda好支持,但就坦言沒有意見給他,「我乜都唔識,冇乜意見俾到佢,我冇搞過生意,只係投資物業,邦哥都唔鍾意做生意,淨係做律師,佢怕麻煩,怕要睇住盤生意。」問 Brenda是否有份投資?在旁的 Brandon即緊張地說:「媽咪冇份,係我自己投資。」不過 Brenda講明生意還生意,「佢一樣要做律師,花咗咁多心機讀書,唔做律師嘥咗。」
曾是 Ball場常客、社交界花蝴蝶的 Brenda,自從丈夫周啟邦於一 ○年病逝,她不但絕跡 Ball場,甚至連街都少去,變得相當深閨,「我一向都唔係好 enjoy,以前係邦哥鍾意,咪就吓佢,冇所謂,依家一個人唔想出,費事觸景傷情,更加唔會 miss。」


周國豐捐了五十萬給李家誠及徐子淇旗下的基金,請李太出山做特別嘉賓,出席開幕酒會。

人到七十,她的生活模式、作息時間又再改變,唔蒲 Ball場,變了去街巿買菜,「平時都係工人去買餸,但一個月一次我會自己去買餸、買海鮮。」以前日夜顛倒,現在作息正常,「係呀,以前我好夜瞓,成日通宵唱卡拉 OK,淨係唱英文歌,邦哥唔識唱,只係聽我唱……依家習慣咗靜,喺屋企睇吓書,十點半就瞓。」有時 Brenda都會追電視劇,「都追睇《護花危情》,幾得意,個男主角唔知叫乜名(係叫黃宗澤),瘦瘦哋……」

唔慣同居


表面看,一切都似回復正常,但心裡明顯是缺了一塊, Brenda幽幽地說:「梗係唔慣,到依家都唔慣,冇得慣,陰功!」但她又不肯與兒孫同住,「我好怪㗎,我唔鍾意同人住,同人住好似有 obligation,有好多嘢要就住人哋,要理埋人哋鍾唔鍾意,有冇騷擾人哋,今晚食乜又要諗佢哋啱唔啱食呢?我真係好怕,以前同邦哥就好習慣,佢就吓我,我又要就吓佢,但就習慣咗。」
一般嫲嫲見到粉嫩的 BB就口水直流,恨不得日夜黐實, Brenda雖然喜歡兩個孫仔,但就相當理性,「兩個小朋友真係好乖好得意,但要同仔、新抱同孫仔住,哎吔!唔得呀,雖然佢哋好人啫,始終我有自己嘅生活習慣,好似小朋友早瞓,嘈醒佢就唔好啦!小朋友又鍾意叫朋友嚟玩,啲細細件嘅 toys丟到周圍都係,你話人哋,佢爸爸媽媽都唔會鍾意,我嘅性格比較獨立,一齊住,唔得、唔得。」


Brandon兩個兒子都用 Vi-Spring床褥, BB床褥是度身訂造,市面未有得賣;大仔的 Heaven床褥(右圖)要十多萬,他認為物有所值,「瞓得唔好影響心情,學嘢點會留心?」





八個傭人


一直照顧周啟邦夫婦的四個菲律賓男傭,亦是 Brenda拒與子孫同住的原因之一,「嗰四個賓仔,最短時間嗰個都跟咗我哋三年,其他嘅有五年、六年、九年,佢哋真係好好㗎,好似家人一樣,所以我唔會辭退佢哋, Brandon嗰邊又有四個工人,一齊住,我包嗰八個工人就算唔打交,鬧起上嚟都唔得掂。」
Brenda不但對工人細心關懷,就連對屋企養了十二年的狗一樣周到。話說她每晚飯後都會在花園行半個鐘當運動,問她有沒有叫狗狗陪散步? Brenda好認真話:「有時佢出嚟陪我行,但覺得太麻煩佢,所以叫番佢入去。」你話 Brenda可愛到呢!


周國豐夫婦每個禮拜都會帶埋兒子禮淳和禮熙去探媽咪兩次, Brenda說:「佢哋好多 party好忙,但點都會嚟探我。」上月細孫仔百日宴(右圖), Brenda著靚靚出席。




Brenda坦言已甚少見朋友,陪得她最多時間就是四個菲傭,難怪她待他們如家人。

只能回味




二人曾經在遊輪 Captian’s Night攞獎的沙漠王子與女神 look。


Brenda超低胸演繹中國船長與日本歌伎。


九七年周啟邦夫婦以「妹仔釘情困咕喱頭」造型出席晚宴。

撰文:李美媚
協力:鄭子瑩
攝影:黃志明

    全站熱搜

    tvb4life 發表在 痞客邦 留言(0) 人氣()