學聯於週二發起大專生罷課，數千名來自不同院校的大專生擠滿中文大學的百萬大道，要求政府立即撤回國教科。

壹號頭條

國民教育科　假撤回　真利誘　陳日君：唔可以收貨！

2012年09月13日 ~~ 第1175期香港《壹周刊》

特首梁振英忽然在上週六、立法會投票日前夕「跪低」，宣布修改政策，交由辦學團體及學校自行決定是否獨立成科及如何開展國教科。
表面上，政府不再硬推國民教育科，但魔鬼盡在細節中，天主教香港教區前主教陳日君樞機指，在《校本條例》下，辦學團體早已失去辦學自主權，若校長教師等為領取政府資助，執意推行國教科，辦學團體亦無計可施，孩子的腦袋勢必染紅。

陳日君指目前國教科內容隱惡揚善，與納粹德國及日本軍國主義教育相似，非常危險，絕不可推展。（張貴材攝）

這邊廂，梁振英宣布推行國教科與否將交由學校自決，但那邊廂，已經有不少學校急着推行洗腦教育。官校庇理羅士女子中學已定於十月底舉行國民教育日營、嶺南中學安排學生參觀國民教育中心，甚至有幼稚園教學童高唱「中國好、我愛中國」兒歌。
天主教香港教區前主教陳日君樞機週一接受本刊訪問時，直指政府並無在事件中讓步。他說︰「呢個唔係撤回呀！撤回係大家當無呢件事嘛！依家係你照我意思辦就辦，唔照辦我唔強逼你。咁即係執行啦！我覺得政府未曾讓步呀，我唔收貨呀！」
他指政府日後將利用校本自決漏洞，利誘中小學推行國教科：「佢可以做好多手腳，獎勵照佢指示做嘅人，懲罰唔照指示做嘅，用好多行政手段來強逼人要跟佢，跟佢就有錢攞，唔跟佢就無，以前推《校本條例》就係咁！」
○五年時教統局擬向遵從《校本條例》於○五至○八學年成立法團校董會的學校，連續四年發放每年三十五萬元的「開動費」，反對《校本條例》的陳日君直斥政府利誘：「開動得一次啫，點解有三、四年開動費呀？而我哋（申請司法覆核）官司輸咗，要到一二年先開始（成立法團校董會）嘅，就無開動費喇！邊個早啲執行就大把錢，遲執行就無錢，係好強硬嘅手段。好彩我哋去立法會抗議先取消咗！所以政府有好多方法，手段好毒辣！」

校本條例方便利誘

事實上，在推行國民教育科上，教育局亦向中小學發放五十三萬元的國教科津貼，陳日君擔心：「好多學校會聽佢話，校長、老師啦，因為佢哋靠政府俾錢，家長嘅聲音亦未必夠，學生就受害！希望有良心嘅學校唔好受利誘呢一套，大家唔好貪暫時嘅利益！」
校長、教師有機會受利誘推國教科，辦學團體卻無力阻止，全因○四年通過的《校本條例》，要求學校成立由教師、家長、校友及辦學團體代表組成的法團校董會，有別於過去全盤自主，辦學團體只可委任法團校董會的六成成員，令辦學團體失去辦學自主權。
陳日君認為，《校本條例》的通過為政府推行國教科大開方便之門，更不諱言條例之下，會有「有心人」滲透校董會幫手染紅學校：「條例有危險，梗係會滲透啦！但好難證明有滲透分子，我哋都唔可以事事懷疑人，所以好難做嘢……有些家長會都係政治性組織，好似大埔區家長會（大埔區家教會聯會主席何主平去年獲教育局委任為課程發展議會委員，有份制定及審核國民教育科諮詢文件），有錢又有勢力……」
陳日君強調國教科不可推出，否則後果堪虞：「我希望唔收貨的人繼續俾壓力叫佢撤回，多啲人、多啲家長企出來！一定要繼續抗爭，唔可以俾佢執行！如果執行就害咗我哋下一代！希望有良心嘅學校唔好受利誘呢一套，大家唔好貪暫時嘅利益，亦希望家長企出來。」

大聯盟週日凌晨宣布結束佔領政總行動，多名義工在早上拆下掛起多日的「公民廣場」橫額。

十八區家長教師會聯會受政府資助，與政府關係良好，吳克儉早前便曾就國教科與該會代表會面。

硬推國教一條龍

政府於上月委任陳仲尼出任考評局主席，他不但是全國青年聯會副主席，更於擔任公民教育委員會國民教育小組召集人期間，推出《心繫家國》短片，屬「深紅」背景人士。

梁振英取消德育及國民教育科的三年開展期，並將開科的責任交由各學校及辦學團體自行決定，表面看似是讓步，但實質上，香港教育體制由考評局到學校、家長組織，其實都早已被左派人士入侵，伺機大推國民教育科。

香港考試及評核局

剛於本月上任考評局主席的陳仲尼，西環色彩甚濃。四十六歲的陳仲尼，是香港「製衣大王」、大興紡織廠創辦人陳元鉅之子，九十年代初曾任花旗銀行副總裁，九五年創立金鷹控股有限公司，專責家族的投資業務。
他一直與中央關係密切，曾出任中央政策組非全職顧問、公民教育委員會委員等數十個公職，○九年當上內地愛國統戰組織「全國青聯」副主席，同時出任香港青年聯會主席，籌辦大量青年內地交流團和國民教育活動，於去年獲頒銅紫荊星章。
候任立法會教育界議員葉建源憂慮，就算國教科暫時取消開展期，仍能暗地在其他科目滲透洗腦，「好似通識科、中史科，公開考試嘅評分準則有可能受影響，出題嘅人亦可能自我審查，設題時避重就輕。」

Brian
中六　學民思潮義工
前幾晚有人暈咗，好多市民馬上就讓出通道俾救護車通過，香港人好自律，亦唔係政治冷感！

羅同學
中三　學民思潮義工
真係好唔捨得呢個公民廣場，因為我已經當咗呢度係第二個屋企！

馬樂天
小學四年級
唔想無咗學習自由，我同媽咪嚟呢度幫手，支持佢哋！

黃雯靜
中三　學民思潮義工
我負責維持秩序，本來已經做到好累，但沿途有好多市民同我講加油，成個人即刻有返晒動力。

任生任太及
兒子 Thomas
我受過內地教育，佢哋會歪曲事實，更會教「不愛爸爸，不愛媽媽，只愛共產黨」，我唔想下一代被荼毒。

張峻滔
港大一年級　學民思潮義工
好多好心人送物資嚟，女性衞生用品、隱形眼鏡藥水、水果同飯餸都有！好窩心，完全感受到市民嘅心意！

教育工作者聯會

全港僅次於教協的第二大教育組織香港教育工作者聯會，有逾二萬六千位會員，但卻由多名左派人士把持，左派元老級人物吳康民是該會名譽會長、民建聯新星李慧琼為榮譽顧問。其屬下的國民教育中心，正是出版爭議教材《中國模式》的黑手，該會會長楊耀忠及主席黃均瑜曾多番在公開場合為國教科護航，更在轄下的黃楚標學校開展國教科。

Emily
中三　學民思潮義工
參加過長征行動，用紅布蒙眼，如果真係推行國民教育科，學生睇事物就會朦糊不清，甚至被染紅……

Hollie Cheung
美國留學生
一班中學生竟然付出咁多，我好慚愧！好欣賞學民思潮，我同媽咪都忍唔住捐雨褸同電芯俾佢哋。

教育評議會

該會近日忽然公布「自家」民調，指有逾八成校長、老師支持國教科，逾六成老師反對教協的「良心約章」，惟該調查其實僅訪問了二百零三人。該會副主席何漢權，近日亦有參選立法會教育界選舉，最終雖然落選，但就被揭支持者中包括教聯會副主席王惠成、顧問麥謝巧玲等與左派關係密切的人士。

梁小姐
家長
國教科嘅課程指引對下一代有長遠影響，政府將問題卸俾學校，好多辦學團體嘅立場唔清晰，學生仍然無保障！

郭先生
退休人士
香港人唔需要國民教育科，點解硬要學生見到國旗要流淚呢？喊係發自內心嘅，唔使人教！

周先生
從事廣告界
學民思潮好有熱誠，中學生運動需要更多包容，但運動本質係正確嘅，將來都會繼續響應！

劉先生
退休人士
我喺葵涌住都要每晚來集會支持吓，唔來唔舒服，班細路付出咁多真係無得頂！

十八區家長教師會聯會

該會一直反對撤回國教科，亦堅決反對同學老師罷課罷教，上週六，正當大聯盟還在政府總部門外集會，要求與特首公開對話之際，家長教師會聯會卻被梁振英親自接見。
不過，全港其實僅得不足四成學校的家教會是該會會員，而家教會聯會亦由左派人物把持，如觀塘區主席奚炳松便是左派學校福建中學的教職員、大埔區主席何主平更獲委任為課程發展議會委員，有份制定及審核國民教育科諮詢文件。葉建源批評，家教會聯會早已變質，「好多人啲仔女其實都離開晒學校，但仍然可以留喺個會入面擔任重要職位，明顯已經唔係純粹嘅家長組織。」

劉先生
中學教師
政府讓步只係權宜之計，件事丟淡之後可能照推呢科，小朋友好難免受影響，唯有靠老師憑良心把關！

Kelvin
大專一年級
我同十位朋友圍住政府總部同添馬公園長跑，希望證明俾大家睇，反國教科係香港人嘅責任，需要大家響應！

繼續抗爭

全港反國教科氣氛熾熱，上週五及六，分別有十二萬及十萬人逼爆金鐘，齊聲疾呼：「撤回國民教育科！」

梁振英語言「偽術」

梁振英喜以語言偽術回應，混淆視聽，他在九月二日回應大聯盟反國教科時，不斷強調：「我哋應該以事論事、實事求是，如果認為指引有問題嘅話，指引邊一個部分有問題？」
事實　反國教科的原因及理據其實已討論大半年，梁此時才要求反對者指出問題，是深明沉默的大多數根本無暇細想，便誘導他們以為反對者不講道理。

梁振英不斷呼籲大聯盟成員加入開展國教科委員會表達意見，聲稱「咩都可以傾」，但「（對話）唔能夠前提係撤回不撤回」，又指「撤回同不撤回之間嘅空間係十分大」。
事實　梁其實只是希望與示威者在不撤回的先決條件下展開對話，說了等於沒說，而撤回與不撤回之間根本沒有空間。

梁振英一直強調，推行國民教育科是上一任政府留下來的政策，不是他的政策。
事實　梁振英是上任政府的行政會議召集人，有份制定政策，而且政策有問題，作為負責任的政府，應該臨危勒馬，撤回科目。

本週二，梁振英再施「偽術」︰「大家要求撤回國民教育科，等於禁止學校去教呢科，係唔符合香港自由及多元社會嘅特質。」
事實　這番偷換概念的說話，隨即引來教育界人士反駁，事實上，本港的教育政策從沒任何條例「禁止」學校去教授任何科目，正如政府從來沒有向學校硬推宗教科目，某些宗教背景的學校，一樣有權自行決定教宗教科。