Chingmy十分貪靚，每天回鋪前都悉心打扮，上週四穿上露 bra低胸裝。由於外賣單愈來愈多，忙到「踢晒腳」，本負責收銀的她於午市時段亦要親自出馬，跑往太古廣場送外賣。

壹盤生意

泰模新店　送外賣突圍

2012年09月13日 ~~ 第1175期香港《壹周刊》

經過灣仔晏頓街一間新開的泰式食店，乍看一身泰式打扮的老闆娘熟口熟面，好奇之下走入店內問問。中泰混血兒林玉卿(Chingmy)見狀，以「唔鹹唔淡」的廣東話說：「認住金寶鐘，清潔好輕鬆！」原來她是「模特兒」，「成名作」是搽黑塊面扮外傭，拍金寶漂白水廣告，以往天天在《宣傳易》播放，轟炸觀眾腦袋。
不過模特兒只是兼職， Chingmy去年以二十萬頂手其泰籍母親於同街開設的泰國餐廳金蘭花，升呢做老闆。她接手後大力改革，將盈利大幅提升。但媽媽卻潑冷水，指鋪頭一向有錢賺，並非其功勞。 Chingmy為證明自己實力，於今年四月自行開設紫蘭花，豈料每月蝕二、三萬元，最終還是要媽媽出手，助她過關。

食肆林立的晏頓街，就近太古廣場三期，每到午飯時間，很多附近的上班族都在排隊等買外賣。位於街頭的紫蘭花只有三百餘呎，不設座位，主要做外賣生意。「要咩呀？我哋一碗都送㗎！」 Chingmy邊以電話落單，邊忙着催促廚房起貨，又要向親自來買外賣的十多名客人收錢。忙得一頭煙的她說：「個兼職今朝 Whatsapp我話唔返工！你有冇朋友介紹可以返幾粒鐘？」說罷，她拿起兩袋外賣，親自去送。回來後，情況仍然七國咁亂，連正在拍攝人龍的攝影師也被要求送了兩單外賣。同時間廚房又告知她：「一點半又賣晒豬頸肉，尋日就賣晒雞，聽日要訂多啲先夠喇。」她正在煩惱沒貨賣，外賣員工這時又狂催她找兩蚊，記者見 Chingmy情急下竟錯手將新買的 Galaxy SIII跌落地，熒幕頓時爆裂。

Chingmy是兼職模特兒，數年前曾拍攝金寶漂白水廣告，扮外傭做家務，更讀出耳熟能詳的「認住金寶鐘，清潔好輕鬆」對白，一度熱爆 YouTube。

下午一時多，最令 Chingmy頭痕的事終於發生。她望望廚房一疊外賣單，高聲呼叫：「哎呀，呢張三百蚊單俾其他單遮住咗呀！原來十一點已經落㗎喇。」她即刻叫停廚房其他工作，全力處理這張單。但當外賣送到客人手上時，客人拒絕收下。 Chingmy無奈地說：「都唔係第一次，搞到第二日要免費送多次俾個客賠罪。」直至午餐完結，她才鬆一口氣，向記者大發牢騷：「依家人工加到五十蚊一個鐘，都請唔到人呀！」

靠外賣轉虧為盈

無骨海南雞飯是全店毛利最高的食品，一隻雞來貨價約四十五元，可供六碟飯之用，每碟售價四十五元。

每逢午市，總有不同的「甩轆」情況發生。 Chingmy坦白說，其實當初並非一開鋪就做送外賣。「我見同街嘅車仔麵店無櫈坐都日日有人龍，咪諗住做泰式車仔麵店囉。」她指客人可自行選擇湯底，包括青咖喱、黃咖喱和冬蔭功等湯底配粉麵及泰式配料，亦有海南雞飯及串燒。如旁邊的車仔麵店一樣，只供立食，同時只可企六、七個客，不送外賣。價錢亦跟到足，「佢哋賣三十幾蚊碗，我就三十蚊有交易。」不過開業頭三個月都蝕至少兩、三萬元。
她想了又想，決定採納媽媽的意見。「阿媽一早叫我送外賣，我之前覺得冇需要，到蝕緊先聽佢講。」她開始在街邊派傳單，「一碗都送㗎。」成本卻因此上升， Chingmy要額外聘請一至兩名兼職在中午十二時至四時送外賣，每小時人工為五十元，一天的成本約四百元，一個月即一萬二千元。不過現時鋪頭一日至少有五單超過三百元的外賣訂單，已經夠付人工成本，送外賣佔整體生意額六成。

從事金融行業的 Nathan（左）和 Ben（右）買了兩碗冬蔭功湯底金邊粉，他們認為鋪頭提供的食品有泰式街頭風味，價錢合理，但略嫌店內環境太熱，選擇買外賣回公司享用。

剛開業的時候，還要遇上個「懶廚師」，客人紛紛投訴。「佢煮嘅冬蔭功，又落雞粉又落味精，勁難食，唯有炒咗佢。」最終 Chingmy在媽媽的介紹下，請到曾在沙嗲王廚房做過的泰國人 May姐當大廚，「佢煮嘅海南雞飯，好味到上過報紙㗎！」 Chingmy說。「我係香港長大，無泰國人的網絡，唯有靠媽媽先請到廚師。」另一方面， Chingmy想辦法節流，「我同供應商親自講數，嚇佢話唔減價就唔再入貨。」一包原價二百一十多元的金邊粉，減至一百九十多元。她又發現更便宜的蔬菜入貨途徑。「我哋之前係即日叫即日送，依家係前一日落訂，平五成慳好多！」上個月的生意額增加七成，終錄得五萬元盈利。

母親反對開鋪

紫蘭花旁邊的車仔麵之家有數十年歷史，鋪面較紫蘭花更細，不設外賣。每逢午飯時間都會出現人龍， Chingmy開設泰式車仔麵，希望可與之分一杯羮。

Chingmy的媽媽花姐，是泰國華僑，三十多年前嫁到來香港。老公早過身，她在沙嗲王做洗碗女工養大兒女。十多年前，她用辛苦儲來的五萬元，與友人合資辦泰式雜貨店，再將賺來的錢開設金蘭花泰國菜。在花姐的幫助下， Chingmy的紫蘭花才能轉虧為盈。但原來花姐至今，仍然非常反對 Chingmy開新店。 Chingmy說：「阿媽批死我一定執硬。」她憶述簽約當天收到媽媽的緊急來電，要求她不要簽約。得不到母親支持，令她在代理面前落淚。
最終 Chingmy仍堅持開設紫蘭花，就是為了一啖氣。她於一年多前，以二十多萬元頂手媽媽的金蘭花。當時她白天在天影娛樂上班，晚上就到金蘭花開工。「以前夥計得閒到可以瞓晏覺。我搵人整新餐牌、卡片。又加咗好多新產品，例如係冬蔭功雲吞、齋菜。夥計表現好又會加人工，大家都落力咗好多。」 Chingmy指她接手後，金蘭花的盈利由一年賺六十至八十萬元上升至過百萬。

Chingmy（左）的名字是看雜誌胡亂拼出來，無特別意思；她與花姐（右）兩母女信奉泰國的三蒲公佛像，在金蘭花的鋪頭亦放置佛像供奉上香，每星期她們更會選擇特定日子齋戒，十分虔誠。

然而媽媽竟一盆冷水照頭淋，對她說：「間鋪不嬲都賺緊㗎啦。」 Chingmy不忿氣地說：「佢唔認同係我嘅功勞，我就自己開一間證明俾佢睇。」花姐勞氣地說：「你係都要同我鬥！」花姐見女兒辛苦，最終都出力幫手，但又扮到漠不關心，一邊幫她找廚師一邊鬧，「早叫你唔好開㗎喇！」明明兩鋪只是一街之隔，花姐至今仍未嘗過紫蘭花的粉麵。不諳廣東話的花姐，不願意接受訪問，但這個媽媽也拋下了一句回應：「其實我係驚佢辛苦先叫佢唔好開。」

母女都愛錢

Chingmy指裝修師傅所裝設的去水泵力度不足，前任廚師又亂倒垃圾入內，導致廚房淤塞水浸，兩名大廚急忙合力通渠，更從坑中撈出筷子等垃圾。

Chingmy如此辛苦，她坦言因為喜歡靠自己搵錢。她指三年前接下金寶漂白水的廣告，就是為了可觀的報酬。「一個朝早，塗黑塊面，講幾句對白，就有一萬蚊酬勞喇。」現時她亦間中拍廣告搵快錢，不過大多是過鏡角色，如在政府黑色暴雨警告的宣傳片中，扮演大肚婆。為搵銀，她多年來已經搞過近十盤生意，包括印傭中介服務、時裝和出版生意瓣瓣齊，但都失敗收場。

青咖喱湯底的粉麵是店鋪受歡迎食品之一，湯底每朝新鮮煲好，三十元一碗，每款配料再加五元。

這次開鋪， Chingmy瘦了十磅，眼球微絲血管爆裂，又處處碰釘。「裝修買廚房設施呃我十萬蚊，冷氣又整細咗兩匹，去水位又整唔好搞到成日塞，一落雨門就漏水。」這些裝修問題至今仍未解決，上週記者採訪時，親眼見去水渠淤塞，輕微水浸，要兩名大廚合力通渠，幸好發生在下午三時非繁忙時間；而冷氣又不夠涼，油煙味重，記者到場採訪亦大汗疊細汗，相信因此流失不少客人。
現時 Chingmy主力負責紫蘭花，金蘭花仍靠花姐看鋪，兩母女計得清清楚楚，媽媽支一萬五千元人工。「原本萬一蚊㗎，但阿媽話頂咗間鋪無錢使唔慣，要求加多啲。仲話平時喺鋪頭拎慣現金，銀包好厚，要我現兜兜出萬五蚊俾佢。」兩母女因開鋪而鬧意見，但愛錢的性格卻同出一轍。

開業資料（ 4/12）

租金：$120,000
裝修：$250,000
飲食牌照：$16,000
雜費：$17,000
爐具：$40,000
公司註冊費：$10,000
總投資：$453,000
#三個月按金、一個月上期

營業資料（ 8/12）

營業額：$200,000
人工：$29,000*
租金：$29,000
雜費：$30,000
入貨：$60,000
盈利：$52,000
*兩名全職，未計老闆薪金

太興老闆　教送外賣

太興集團主席陳永安指，目前飲食業很難請人，除非是車隊式外賣，否則單靠人力難以做到一個有規模的外賣系統，故太興也只有部分分店提供這服務，他對 Chingmy有以下意見：

1.流程要暢順
要在單上標明「外賣」，廚師應跟落單時間的順序出貨，不可揀大單或細單先做，否則容易出現混亂或漏單的情況。做起外賣後，便將食品及尾數交給送餐員，確保他們有零錢跟客人找贖。

2.優惠引客人自取
若不夠人手送餐，應提供自取外賣的優惠，例如取飲品或減二元的優惠。同時，可以鼓勵客人先打電話落單，註明幾多分鐘後會在鋪頭取餐，讓廚房可預算出餐時間。

3.劃定送餐區域
生意剛起步時，「一碗都送」是吸納外賣生意的好方法。當訂單日增、人手不足時，應劃定一個送餐區域，範圍以能在十至十五分鐘內送到外賣為佳，放棄圈外訂單。