6/9反國教
呢兩位後生仔（紅及黃箭嘴）喺政總幫手咗幾日，較常出現喺物資區，仲不時好落力咁周圍跑嚟跑去。（羅國輝攝）

八卦陣

反國民教育科　金毛義工有古怪

2012年09月13日 ~~ 第1175期 香港《壹周刊》

由學民思潮發起嘅佔領政府總部行動雖然已經完結，但其間有唔少傳言，一時話警方會清場，一時話建制派搵臨記嚟搞事，搞到現場氣氛緊張。原來唔係空穴來風，喺上星期五傳出有一班臨記及建制派人士混入人群中，趁機搞事之際，記者喺前一日，就見到兩個熟口熟面嘅男仔。

呢兩個後生仔喺今年五月，就同一大班金毛飛，手持大聲公喺立法會門外示威反拉布，當時本刊就踢爆呢場反拉布騷係由建制派請人嚟扮示威者，而且仲有臨記向我哋踢爆金主係民建聯梁志祥嘅好友「高佬和」曾樹和。
到今年七月，颱風韋森特襲港， 150噸膠粒吹散落海面，記者就喺八月初見到其中一個後生仔帶埋相機，同一班義工齊齊到沙灘執膠粒。記者嗰日仲聽到有義工話千祈唔好俾佢影到相，否則就會俾人擺上民建聯網站做宣傳咁話。
記者問番今次反國教科大聯盟嘅義工，原來呢兩個後生仔，已經响政總幫咗手幾日，主要响物資區幫手，本來記者想搵佢哋傾幾句，但轉頭竟然又唔見咗佢哋。究竟佢哋係熱心市民？臨記？定係建制派青年團？（林璐菁）


17/5反拉布
約四個月前，仲未染金毛，但就拎住大聲公，帶住一班疑似臨記反拉布，而另一位後生仔(紅箭嘴)，就响旁邊擔住支煙抗議。（羅國輝攝）


5/8執膠粒
真係關心天下事，就連執膠粒都見到佢嘅蹤影，當日佢就帶住一大班民建聯義工喺沙灘執膠粒。（黃雲慶攝）

胡佳老婆　港大讀電影

繼陳光誠同埋余杰，再有內地異見人士頂中共唔順要出境避一避。上個星期五晏晝，大陸社運鬥士胡佳嘅老婆曾金燕拖着囡囡謙慈，由北京嚟咗香港。
胡佳喺京奧前夕，以煽動顛覆國家政權罪被判刑三年半，同年獲得歐洲議會頒發最具榮譽人權獎薩哈羅夫獎，舊年至出冊，繼續維權，仲絕食支持香港反國教。
人權獎得主夫人好鬼低調，冇人接機，搞到推住一大車行李嘅曾金燕出閘之後一臉無助兩頭望，謙慈生性，自告奮勇幫媽媽推喼，不過就好鬼論盡，兩度仆低，好彩乖乖冇喊。
原來曾金燕報咗港大讀獨立電影，而且係 MPhil（哲學碩士），起碼喺香港住兩年先走，五歲嘅謙慈都會喺香港讀書，一家三口又冇得見。曾經傳過兩公婆已經分居，只望中共賤少兩錢，俾胡佳出境箍煲啦！（姚智賢）


曾金燕舊年已經考 IELTS，年頭連大學嘅錄取通知書都收到，但係當局始終唔批通行證。對於上個禮拜五自由出境，曾金燕點都唔肯講中共點解突然轉死性俾佢嚟香港。（李育明攝）


囡囡謙慈出世四十五日，胡佳就俾中共拉咗，跟住嗰三年半，由曾金燕獨力湊大。估唔到父女重逢相聚一年，又要分開。（網上圖片）

全城慶賀　劉江華下台

一位議員受唔受歡迎，睇網民反應就最清楚。週一中午立法會選舉揭盅，一直胸有成竹的民建聯劉江華落敗，唔少人 fb隨即被洗版，通報呢項喜訊；亦有唔少網民自發舉行祝捷會，開香檳之聲此起彼落。 fb甚至有人開設「全港各界熱烈慶祝劉江華落選委員會」專頁，週二凌晨，已有超過三萬人爭住 like，網民又再發揮無限創意，大量改圖，睇完包你捧腹大笑！


七、八十名網民週一晚自發到劉江華沙田議員辦事處開祝捷會慶祝，其後人數愈來愈多，警員到場驅趕。（蔡正邦攝）