娛樂八掛大放送★

阿佘勇字行頭：有人搵照拍

視后佘詩曼闖影圈波折重重，主演多部電影均不算收得，慘變票房毒藥的她不諱言電視人難闖影圈，但她仍大無畏繼續勇於嘗試。

咁耐以嚟，我都係主攻電視劇，期間我有嘗試拍電影，好多人覺得電視人好難入影圈，其實都會係！始終觀眾層面唔同，所以要睇劇本，可能我喺電視方面遇到嘅運數，係比電影圈好，希望繼續有機會拍到好電影啦！不過真係可遇不可求，問我有冇驚咗？咁又唔會，有人搵我都會照拍，我電影產量唔算多，咁多年嚟梗係有推過戲啦！我最想演講述女人心態嘅戲，舊年同導演葉念琛合作《人約離婚後》，反應都唔錯，其實佢搵過我好多次，係誠意打動我，我都有睇過佢嘅《十分愛》系列，我都好鍾意，所以都想同佢再合作。

TVB做到悶向外闖

講番當年（06年）憑《鳳凰四重奏》贏得雙料視后，直頭係夢想成真！嗰個獎對TVB每個演員都係一個好大目標，亦都係我當時目標，估唔到一次過拎晒兩個！當時我都有啲迷失，好似冇嘢追求咁，仲可以點叻法？我不斷諗應該點做，終於畀我諗到去內地闖闖！當時想走但未係時候又未約滿，後來臨約滿就諗足兩年，因為係好大決定，唔知可唔可以承受呢個壓力同轉變。其實嗰兩年喺TVB演戲覺得好悶，對手、監製同導演都係嗰啲人，驚觀眾都覺得悶。我希望事業可以再有突破，好似最近同胡軍合作（內地劇《建元風雲》），佢係內地知名度好高嘅演員，可以接觸吓內地製作單位好開心，會主力攻吓內地，TVB就一年拍一部。（全文完）

後記：各奔前「情」

向來面對傳媒甚有經驗的佘詩曼，談到「男友」話題時自是應付自如，答得相當大體。整個訪問中，小記發現阿佘談起舊愛陳浩民與差點發展的鄭嘉穎時反應不一，前者似乎在回憶往事，但提到嘉穎卻一副甜絲絲的樣子，幾段情的深與淺、甜與酸，盡在不言中！

口述：佘詩曼　筆錄：影視組

佘詩曼奪視后後曾一度失去演藝目標，最後選擇離巢作新嘗試。

佘詩曼主演的《美女廚神》雖票房欠佳，但無損她闖影壇的信心。

佘詩曼早前與方力申拍攝《人約離婚後》，搭檔新鮮贏得不俗口碑。

佘詩曼進軍內地，望以《建》劇響頭炮！