難得並肩林保怡呢位新密友睇落好後生，身形大大隻，個樣似歌星劉浩龍。行徑低調的林保怡甚少會同密友並肩而行，呢個畫面好難得。

林保怡入行26年來感情生活都非常神秘，04年突然自爆有圈外女友，不過他口中的「幽靈女友」從未現過身。07年林保怡喪母，港男彭冠期出席喪禮戴孝，令二人的超友誼關係曝光。未幾彭冠期被同志片導演雲翔硬撬，林保怡唔再同藝人交心，自此與男助手出雙入對。今年2月，本刊在灣仔紅燈區碰見林保怡與一名同性密友衝上的士，密友護男心切，幫林保怡遮擋鏡頭。事隔個多月後，林保怡已極速換畫。3月14日下午他與貌似劉浩龍的大隻嫩男先到銅鑼灣食米線，再齊齊返回馬鞍山寓所。男人要變心，真係話咁易。


年屆46歲的林保怡，一直沒有表明性取向，除甚少談及個人感情生活外，平日生活作風亦十分低調。直至07年林保怡喪母，港男彭冠期唔止出現喪禮，仲戴孝招待親友，令林保怡這段秘密友誼見光。事後林保怡沒有公開回應，不久彭冠期與同志片導演雲翔撻着，有傳林保怡因此心情低落。

只與圈外人交心
「彭冠期同Bowie（林保怡）感情好嗰陣，都攞唔到咩着數，又要低調，又冇車揸手。之後彭冠期拍同志片《安非他命》遇到雲翔，佢哋一拍即合，彭又換車又換樓，仲公開埋一齊㖭！Bowie當然傷心，佢覺得圈中人都係信唔過，話以後只會同圈外人交心。」知情者透露：「為咗掩飾關係，佢每次有新密友都會話係新助手，玩開嗰班朋友每次聚會都笑佢：『又換助手呀？』」林保怡換畫速度真係快得驚人。今年2月中深夜時分，本刊記者在灣仔紅燈區見他與一名同性友人截的士離開，上前拍照時男友人即高舉V字為林保怡擋駕。到3月14日下午，林保怡又與另一同性友人在銅鑼灣鬧市搵食，兩人在一間過橋米線吃午餐。其密友身形魁梧，貌似歌星劉浩龍，看上去只有25歲左右，非常嫩口。現場所見，二人離開食店後，竟然前後腳扮唔識，嫩口男先行，林保怡殿後，非常小心，似乎想保護這段新發展的關係。之後林保怡和該嫩男由司機送返位於馬鞍山的海濤居寓所，整夜都沒有再外出。

帶密友赴日宣傳
已離開無綫外闖的林保怡，早前拍了一部中、日、韓合作的劇集《六個陌生人》，現正身在日本為該劇宣傳的他，出席完宣傳活動，仍留在當地遊玩。知情者透露：「Bowie今次去日本都帶埋新密友去，咪當係私人助手囉！做完正經嘢可以留低玩幾日，呢啲咁嘅優差，佢梗係益自己人啦！」林保怡密友當助手呢條橋，在公在私都行得通喎！

搵陳慧珊做煙幕
林保怡入行26年，緋聞女友只有一個陳慧珊，絕對係唔尋常。原來當年林保怡與陳慧珊拍《妙手仁心》，因為情同姊妹，好傾之餘仲成日攬頭攬頸，開口埋口都叫對方做「Honey」、「Baby」，不知者以為佢哋真係擦出愛火花。緋聞傳出後，無綫中人覺得係天大笑話，大家都知陳慧珊只不過是煙幕。
此外，多年來林保怡在無綫拍劇，都與女藝人比較熟絡，主要原因係男藝人都驚同林保怡過從甚密被傳閒話。 ####


3月14日嘆米線林保怡與密友到銅鑼灣搵食。密友先步入食店，林保怡仍在門外睇餐牌。


四圍望半個鐘唔使就食飽，林保怡率先步出周圍望，真係好小心喎！


密友體貼天氣乍暖還寒，林保怡想着番件外套，嫩口密友即時出手，好體貼。


扮唔識行咗幾步，林保怡與密友開始扮唔識，過紅綠燈時分開企。


保持距離二人愈行距離愈遠，密友急急腳行先，林保怡大墮後，隔咗成條街，使唔使咁誇呀？


司機送返歸林保怡與密友坐上七人車，由司機送返馬鞍山海濤居寓所（右圖）。


今年2月偕同性遊灣仔今年2月中，林保怡與一名男友人在灣仔消遣。截的士離開時，本刊記者上前拍照，該名男友人刻意遮擋鏡頭。估唔到呢位密友咁快被「飛out」。


林保怡與陳慧珊多年來保持聯絡。知道陳慧珊復出，林保怡話想介紹佢一齊返國內拍劇，不過陳慧珊同無綫仲有約走唔甩。


06年林保怡同港男彭冠期（黃圈）一齊影無綫官方月曆而認識。到07年林保怡喪母，才被踢爆兩人的密友關係。

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄