入行六年的關楚耀，說最近才懂怎樣當藝人。當年他順利入行，人所共知，是多得唱片公司高層爸爸，也有契爺譚詠麟當他盲公竹，省卻不少披荊斬棘的麻煩，過關斬將的殘酷。然而，成績縱使有多好，他只是個飯來張口的小朋友。

「嗰陣時我戇居居，乜都唔乸識！」

除了唱歌的本業，早前他又變身演員拍劇，甚至單人匹馬主持烹飪吹水節目。他大呼吃力，更蝦碌連連。

「有時唔記得落鹽、落葱，反而係嘉賓提番我。又試過倒瀉水、煮蟹真係倒瀉籮蟹！」

他不喜歡造作，要求不要剪接，照播蝦碌出街。

「我都做過觀眾，用番觀眾個立場去諗，啲NG嘢、蝦碌嘢先至好睇。」

崩口人不忌崩口碗，如果沒有那次因在日本藏毒而被拘留事件，關楚耀會是今天的關楚耀嗎？剛踏進最後一年二字頭的他，道出他的甜酸苦辣。

苦

新人時代的關楚耀，有不錯的唱功，又有前輩引路，輕而易舉地得到好成績。回想當年，他卻覺得苦。

「做嘢唔辛苦，好幸福添！好多嘢唔使自己諗嘅，公司安排晒！你話咁樣呀？哦做囉！其實依家諗番起好多嘢唔係我想做o架喎，嗰陣時冇諗到呢個問題，所以係苦嘅。入行頭嗰幾年，嘥咗好多時間，好多機會唔識珍惜，機會嚟到都唔知道，咁係苦嘅。完全冇方向！一個人冇方向係好辛苦，冇特定目標，淨係諗住我做嘅歌出面啲人會唔會冧呢？會唔會鍾意我呢個人呢？諗埋啲自己控制唔到嘅嘢！

「日本嗰單嘢，係我自己嘅經歷嚟添啦，反而因為嗰個經歷，令我依家知道點樣做，成個方向係點。如果我企硬啲、有堅持，其實公司都會尊重我。」

這一兩年，他學懂堅持，明白做藝人也要主動積極，留鬚、練大隻、唱搖滾、愛情題材以外歌曲，他不惜跟公司拗到面紅耳熱，也要自找作曲作詞人，做自己想做的作品。

關楚耀以前和衛詩拍拖，不到出事也不公開。他和現任女友Megan的關係早已公開，大家安心。

相信關楚耀本身也想不到，去日本旅行，回來時竟要獨自推着行李步出香港機場，面對近百支鏡頭。

甜

三年前，關楚耀和當時女友衛詩開開心心遊日本去，兩人因涉嫌藏毒被捕，他原本幾天的旅程，卻多加了三十三天。法理上雖是無罪釋放，然而，等候群眾釋放，也許是無止境。

「自己做錯嘢，係應該得到懲罰嘅。身邊嘅人每個都令我好甜，佢哋嘅關心關懷，特別是日本嗰件事之後自己更加覺得身邊有咁多人撐自己，可能之前會覺得好多嘢自然會嚟嘅，完全冇諗過要把握嗰啲機會。睇嘢角度係唔同咗好多，特別係公司啦，Duncan（唱片公司高層黃劍濤）佢可以唔使做我o架嘛，多我一個唔多！我又唔係可以幫佢賺好多錢，仲要發生件咁嘅事，影響到公司，佢都仍然咁撐我，我都唔可以衰畀佢睇，唔可以停落嚟。」

有契爺譚詠麟提攜，絕對不是一切。

除了女朋友疼錫，家人包括媽媽（左）和妹妹的支持，對關楚耀也無可替代。

事業差點賠上了，那段感情也要告一段落。猶幸，他的現任圈外女友Megan補上，成為他的「甜點」。

「其實冇乜諗女朋友要圈外定圈內，咁啱兩年前識到呢個女朋友就係圈外。我好珍惜佢，我自己唔係咩新鮮蘿蔔皮，佢都肯同我一齊捱呢兩年事業嘅低處，唔係諗要有名有利，喺我最低潮佢都喺我身邊陪我。近排見得少，佢反而戥我開心，今年好多工作已經安排好嘞，我早出晚歸都冇機會見到佢。我喺youtube upload咗啲片，或者喺微博佢都有留言，sweet嘅！」

辣

二○一一年只做了一隻歌的關楚耀，密密拍劇，有亞視的《親密損友》，也有港台的《火速救兵》，毫無演技訓練的他膽粗粗上場。

「拍完頭幾集，我問監製可唔可以睇番啲片，我覺得自己做得好衰。又漏夜打畀佢問佢有冇啲劇可以當係參考吓，同佢傾咗好耐，嗰啲係工作所謂辣嘢。另一方面我鍾意食辣囉，會激起到我啲戰意，細個我唔食辣嘢o架！係啃係難頂，但又真係幾好味喎！四川嗰啲辣真係誇呀！麻辣鍋一路食一路標汗，但係又好好味！」

酸

嘗了苦、抵過辣，也不夠酸味那種無奈。八十後的關楚耀有不俗的家底，清晰的方向，他也不否認能以喜歡的事情作為職業夠幸福，但他仍覺得當香港人也有教人心酸的時候。

「呢個世代好多嘢係冇辦法，好似近排同舊同學食飯，做白領金融嘅，每次食飯都係呻！畀老細捽數、做到好乏味、為咗供樓冇計、為咗老婆仔女冇計，冇選擇！最近期嘅特首選舉，what choice？No choice！No f**king choice！呢個我覺得幾酸嘅。香港好急囉，唔知為乜嘢嘅！大家習慣咗呢個模式，可能想改變但係諗極都諗唔到方案去做到一啲嘢去突圍，又怕跟唔到人哋會蝕底。」

早前因四大唱片公司與無綫糾紛，關楚耀（左二）反而得到更多的第一次，包括到亞視拍劇。

在亂世中，關楚耀已找到當藝人應有的方向，保持做好本份的心態。

「我聽番啲舊歌，無論把聲同音樂，成個感覺好小學雞！譚校長一早教咗我，只不過我冇留意冇get到，就係要戴住個金鐘罩，有個罩罩住，人哋講乜嘢，聽唔到！唔好影響自己心情，最緊要喺自己個罩做好自己嘅嘢，煮好自己嘅餸拎出嚟，用心去煮，大家會聞到、睇到。特別係今年，自己真係冇理出面點講嘢，做咗〈佔領〉、〈我這一代人〉呢類曲風。同公司都有傾過，突然間轉曲風啲人會唔會受呀？以前啲情歌咁殺，不如出番情歌啦，但如果咁樣咪唔喺金鐘罩裏面囉？因為我真係想做情歌以外嘅，搖滾啲有訊息嘅歌，真係想發聲。」