徐濠縈“個女嫌我煩” Me! 週刊 277期－娛樂八掛大放送★

Hilary Tsui
藍色tweed背心裙 $36,400 Chanel
黑色綴ruffles腰帶 $990
Johanna Ho from Liger
黑色tweed袖皮褸 $5,999
Johanna Ho from mademoiselle
黑色畫家帽、星星魚網絲襪
both Hilary's own

徐濠縈“個女嫌我煩”

我成日問自己，怎樣才做到家庭、事業兩平衡？
真係好難！
身兼時裝店老闆、媽咪、老婆、潮人的阿徐，最近，仲加埋業餘跑手一角，每日24小時，應付拍檔同事老公囡囡傳媒……
公事私事一大籮，連Eason都話佢自己攞苦嚟辛！
笑佢貪心？言重了。地球自轉，也是安於軌道而行，只是連佢自己都估唔到轉轉吓會轉出新世界一個又一個。
別人的38歲，大抵已經叠埋心水相夫教子最好連份工都辭埋心甘命抵
攞正牌做小女人；然而，店鋪開完一間又一間的她，立定心志，衝多兩年，再生多個。
你以為她意氣風發，實情風光背後藏着一個失落媽咪，「最近，個女嫌我煩。」噢！Relax。

Hilary Tsui
白色tweed連身裙 $36,200 Chanel
黑色格仔通花腰封、皮手套
both Hilary's own

Profile 　
Hilary Tsui 出生日期：1974年3月7日（雙魚座）出生地：香港身高：5呎4吋體重：98磅語言：廣東話、普通話及英語。學歷：庇理羅士女子中學畢業簡歷：93年，參演劉德華MV，正式入行。00年，逐漸淡出幕前。04年，跟陳奕迅結婚。09年，開設時裝店Liger。微博：http://weibo.com/tsuihoying

Hilary Tsui 粉紅色中褸 $46,200 Chanel 蝦肉色薄紗連身裙 $2,890 Johanna Ho from Liger 米色高踭鞋、灰藍色喱士絲襪 both Hilary's own

攬得就攬　
早前，去巴黎買貨兼為雜誌影相兼睇騷兼過生日，去足10日，歷來最長，最後連老公都飛埋過去慶生，剩低獨生女康堤日日掛住媽咪，生日卡上寫明「好想你即刻返屋企」，心都軟了！「時間過得好快，佢已經7歲，我哋仲成日攬住一齊瞓，個女性格又唔見得唔夠獨立噃！小朋友一過10歲就唔會再睬父母，我湊返學，佢一入校門頭也不回走入去，最近，教佢應付拐子佬問題，直情嫌我煩。「去完歐洲，原本再去日本買貨，唔得喇！農曆年至今都未停過，我要俾番多啲時間個女。工作、家庭想平衡，要懂得放手。「個女考試，我要飛的話，交俾婆婆去跟，情況好似我細個，佢好緊張學校成績，成日鬧我帶個女去街唔溫書；「學業成績，婆婆跟好過我跟，我係一個鍾意同個女去玩多過做功課嘅媽咪，老師都知。「以後，佢想做乜都冇所謂；佢似爹哋有唱歌天份，又似我性格含蓄，因為咁樣，佢去比賽上台就少咗一份爆炸力。「最好唔好入行，唱得好，寧願佢去唱歌劇或教唱歌；「我唔想做星媽。「最緊張個女品德，好彩佢對物質一向冇乜要求，唔知係乖，還是已經擁有得夠多？我哋兩個又好難以身作則，爹哋成日話炒咗司機，等佢搭校車，冇得舒服，得個講字！婆婆 / 嫲嫲間中帶佢去坐公共交通工具，過吓平凡人生活；「佢好鍾意搭地鐵，爹哋湊佢去搭，冇喬裝㗎！Eason話唔係我所想咁群情洶湧，叫我都去試，唔喇！我懶得再去搵每個站出口！」

Eason投訴　
做夫妻，梗要互撐。曾幾何時，陳生對於陳太染指時裝界做老闆，十分贊成，甚至自豪自己有個叻老婆，隨住對方愈做愈旺，調番轉頭，一家之主偶爾客串家事，男人嘛！點會啞忍？「Eason夜瞓，有時又去搵Josie（何超儀）傾偈傾天光，而我每晚10點一定陪個女上床，7、8點起身，大家時間交錯，夾唔到；「反而，早排佢隻腳做手術，日日留喺屋企，結婚周年都可以出去食餐飯，佢聽我呻忙呻辛苦，就話『你可以唔使咁忙㗎！』、『你可以唔做㗎！』唔知算唔算投訴？！「我洗濕咗個頭，仲洗到咁濕，點可以無啦啦乜都唔做，匿埋泵一件（小朋友）出嚟？惟有盡量調配時間陪屋企人，佢四月尾倫敦開騷，我已約埋成班朋友40人飛埋過去支持，最慘個女返學睇唔到爹哋，惟有等到復活節、暑假我再帶佢飛一飛。「人係要掙扎，有得揀好過冇得揀，忙碌一段日子，我又想湊女接放學幫佢孭書包，湊女耐咗，做吓嘢囉！「朋友就要放棄。「Josie天光至瞓，半夜留言，我要第二朝至覆到，等佢夜晚起身至搵番我！我同佢，盡在不言中。梁炳（梁漢文）同佢老婆亦少見，只會間中通message；「有時間，我寧願湊女或工作。」

Hilary Tsui 粉綠色tweed短褸 $30,600 淡粉紅色半截裙 $28,200 both Chanel 杏色喱士兔仔耳頭箍 $4,200 Maison Michel from On Pedder 灰藍色絲襪 Hilary's own

Hilary's tips 　
Q：跑完步通常食唔食嘢？ A：想食咪食。跑馬拉松，我以為自己唔夠力，猛食澱粉質，搞到肥晒！其實，食菜、米粉已OK。 Q：買完貨，有乜新心水？ A：依家，我買名牌唔會亂嚟，CÉLINE、Chanel秋冬季大褸好靚，值得投資，Chloé鞋我每季買一、兩對；自己鋪頭，Oh My God將會跟Johanna Ho搞交叉乘，好鍾意。

Hilary Tsui 黑色羊仔皮長褸 $136,400 Chanel 黑色薄紗長裙 $2,890 Johanna Ho from Liger 黑色漆皮搭帶platform shoes $8,900 Giuseppe Zanotti 杏色皮革頸及腰飾、黑色喱士絲襪、閃電藍短襪 all Hilary's own

後記　
今年，阿徐將會更忙，在公，開第3間鋪、擴充office、跟MBT再交叉乘、入新牌；在私，還要去台灣跑馬拉松，意味着，生仔計劃拖得就拖。「我一直等緊40歲，唔爭在啦！仲等得。」 40大關當前，我已想退休，她的人生愈走愈火，還說在職阿媽一字記之曰「放手」，令我想起牧師曾言，「握緊拳頭，甚麼都沒有，懂得張開手，得到反愈多。」原來是真的。

Shop List : 　
Chanel　中環太子大廈G18-20號鋪 2810 0978 Giuseppe Zanotti　中環國際金融中心2072-73號鋪 2805 0890 Johanna Ho　http://www.johannaho.com Liger　銅鑼灣白沙道 11號 1 樓 3483 3948 mademoiselle　銅鑼灣皇室堡 G12號鋪 2881 7708 On Pedder　中環皇后大道中新世界中心 1 樓 2118 3489 ####