吳帥深圳夜總會攬女　楊思琦：同呢個人再冇任何關係忽然1周 871期 @ 娛樂八掛大放送★

產後首復出本周三（4日），楊思琦產女後出席大埔超級城的商場騷。強裝笑容的思琦，間中眉頭深鎖，每當記者追問吳帥下落，思琦都避談。對於吳帥深圳攬女，她很冷漠回應：「呢個人以後同我冇任何關係！」

大話媽咪楊思琦2月中在美國洛杉磯為空心吳帥匿埋產女後，上月22日思琦攜女返港，之後匿埋清水灣半島寓所避世，樂易玲更向傳媒大爆思琦產後抑鬱。抑鬱都要生活，自己唔食囡囡都要食。吳帥走佬，經濟支柱落在身兼父職的思琦身上。一句講晒，要撲水搵錢。本周三（4日）她終於出山，產後復出做商場騷，酬勞12萬。思琦搏命接job孭起頭家，大家都意料得到，不過BB生父吳帥去向始終未明。本刊記者收到可靠消息，吳帥上月23日曾在深圳寶安區的夜總會出現。當晚他與友人唱K兼攬女，風流快活。原來，一世人流流長，總會愛上幾個人渣，難怪思琦對本刊記者說：「我同呢個人再冇任何關係！」態度決絕。

楊思琦今年2月在美國誕下女兒後，為了與潛藏在大陸的吳帥割席，決定B女跟自己姓楊，改名叫楊卓穎（譯音）。上月尾思琦終於抱B女返港，吸引大批傳媒採訪。當日記者追問吳帥下落時，思琦一概不回答，只說會努力照顧BB，希望盡快投入工作。未婚產女，又要獨力照顧BB，思琦終於壓力爆煲。一直與思琦緊密聯絡的樂易玲早前透露思琦患有產後抑鬱症，希望她去看醫生，更建議她借工作治療。

返港後自閉
3月22日由美國返港的思琦，疑產後抑鬱，終日匿家自閉。大批傳媒連日守候在思琦家樓下（左圖），都不見她出入。

逼爆衫露束衣
楊思琦話生完女身形大咗成個碼。現場所見，她條裙窄到逼爆上圍，仲隱約睇到入面件收腹束衣。

半百記者採訪
谷胸餵人奶的思琦現身，引來半百記者前來採訪。驟眼睇她修身成績算係唔錯，不過側身睇身形仲好圓，有一雙麒麟臂。

宣布自己做老竇
不過，大家最關心的，始終是BB生父吳帥身在何處。其實自從去年12月有記者影到吳帥前往美國洛杉磯搵安胎思琦，他至今一直無影，早前有傳他潛藏大陸廣州。記者收到消息，指吳帥3月23日曾經在深圳寶安區一間夜總會出現。當晚他與數名友人在內唱K攬女，目擊人士透露：「嗰晚吳帥同幾個friend落到去東帝豪（夜總會），book咗間大房，一人mark一條女都不知幾爽。佢哋飲咗好多啤酒，啲女（夜場小姐）都怕咗佢哋。佢哋最鍾意叫人拎個大湯碗，倒滿啤酒一口氣飲。嗰晚吳帥飲大咗，仲同班兄弟講自己做咗老竇，周圍同人飲杯，不過睇落似借酒澆愁多啲。」據知一般客人在夜總會K房同小姐玩到咁上下，就會帶小姐上房再有下文。知情人士續說：「佢哋幾個人玩到凌晨兩點幾，消夜都冇出去食就直接由秘道上酒店房，門口都唔使出，好方便。」本刊記者親身到該夜總會視察，「東帝豪」格局有如大型K場，不設大廳，只有房間。細房可容納十幾人，大房可容納五十人，全部設有獨立洗手間。

吳帥蒲深圳

夜總會攬女
近月匿藏在深圳寶安區的吳帥，原來閒時亦喜歡去夜總會消遣。據東帝豪夜總會的女知客透露，吳帥上星期才幫襯過。

女知客認出吳帥
現場所見，夜總會小姐在房間內大跳熱舞，走廊不時有穿着性感的女知客行來行去。記者以手機向女知客展示吳帥照片，其中一名女知客認得吳帥是熟客仔，她以普通話說：「這個老闆經常來，每次都用大房間。嘿！我上個禮拜才見過他，他很能喝的，酒量非常好！」去年有傳吳帥避債返回內地生活。一名高爾夫球節目主持人黃江，更在微博上載兩張同吳帥打高爾夫球的合照，地點正位於深圳寶安區，可見近月吳帥原來一直活躍於該區一帶。記者到聚豪高爾夫球場視察，該處環境清幽，場地亦合乎國際水平。記者向球僮展示吳帥照片，其中一名球僮表示約兩個月前見過吳帥在這裏打高球，他說：「他（吳帥）和兩位朋友一起來。我記得他當時戴帽，但也要我幫他拿雨傘擋陽光，很奇怪。不過他的球技蠻好，有業餘水準。」去年7月，身懷3個月身孕的楊思琦在深圳「金至尊」夜總會登台，地點亦是寶安區。據知該夜店老闆是透過吳帥邀請楊思琦到夜總會獻唱。知情人士透露：「吳帥同『金至尊』老闆好老友，以前佢成日都喺呢個場玩。有次老闆話要請香港明星嚟唱歌，吳帥就提議請楊思琦。老闆淨係知佢（楊思琦）係香港明星，根本唔識佢，不過吳帥肯定收唔少佣。表演嗰晚台下觀眾反應麻麻，佢（楊思琦）唔識搞氣氛，唱歌跳舞又唔掂。不過後來老闆搭佢（楊思琦）膊頭咬耳仔，佢都唔抗拒，老闆就冧爆。」搵自己女友俾夜總會老闆抽水，此情此景應該不復再，皆因該夜總會今年1月已被公安查封。據知因為該夜總會涉嫌賣淫，門外把守的保安表示查封了三個月，無人可以再出入。匿大陸都這樣風流快活，難為思琦日日擔心供樓兼冇錢買奶粉，要樂小姐幫她四處傾job。不過，上天都算對思琦不薄，據知，思琦曾代言的纖體公司最近搵樂小姐傾合作條件，想以六位數字再簽思琦。其經理人Pansy則承認有很多廣告商打思琦主意：「依家係同幾間纖體公司傾緊細節，未落實，唔可以公布。」

去年7月吳帥拉攏登台
思琦去年中與吳帥打得火熱，佗住3個月B都去深圳「金至尊」夜總會登台。原來呢次登台係由吳帥做中間人，據知他仲收咗唔少佣金。

當眾遭抽水
吳帥做中間人抽佣都算喇！佢仲衰到送個女友俾夜總會老闆抽水，自己就龜縮冇蒲頭。

今年1月夜總會被查封
去年思琦登台的夜總會，曾是吳帥最愛流連的地方。不過今年1月夜總會因涉嫌賣淫而被查封，現而人去樓空，得個保安員守門口。而大堂內的過年桃花仍原封不動。

後門撇記者
本周三（4日）楊思琦出席活動後前往海港城IL COLPO髮型屋，記者以為她執靚個頭，點知髮型屋職員踢爆思琦早已由後門離開。又出蠱惑撇記者。

以後靠自己
對於吳帥身在深圳風流攬女，本周三思琦出席活動，一聽有關他的行蹤時，她冷淡說：「我同呢個人再冇任何關係，要講嘅都講晒。我依家重新開始，唔依靠任何人。」呢個moment，思琦搵錢至上，感情事唔使旨意再諗。

勒令豪仔收口
每次有思琦的新聞，記者都搵李泳豪做回應。據知樂易玲已下令豪仔收口，希望淡化件事，給思琦一個重生的機會。 ####

思琦冇咗吳帥，多咗個囡囡楊卓穎。為咗個女她除咗要努力搵錢，仲要出力挽救形象。