國際美容集團Angel Face老闆唐安麒（Angel），對中醫及自然療法都有一套心得，扮靚就是她的專業，她更把專業知識活用在家庭生活上。

自四年前知道懷有女兒後，Angel就開始她的扮靚食療，並配合胎教及多寶調理，令如今四歲的女兒Janice自出生起，亦和媽咪一樣，身體健康兼皮膚白滑又漂亮。

懷孕補足

中醫營養學根底十足的Angel，原來是有計劃地生育，並在懷孕前已經開始做準備，「我知道懷孕最重要係補身，飲多啲補腎滋陰嘅湯水，更重要是暖宮，飲多啲雞湯同埋食烏雞白鳳丸，調養身體兼大補元氣。」

在得知懷的是女兒後，Angel更注重飲食，務求令女兒皮膚白滑，「我會偏向多吃白色食物，好似牛奶、珍珠粉、雪耳，更戒吃煎炸食物。」

飲食重要，胎教也不能忽視，「我相信七田真派（相信胎兒已有認知及記憶），加上我知自己好感性，好易喊，所以胎教第一件事就係唔睇新聞，唔使見到虐兒或死人塌樓，情緒唔會大起伏，睇多啲笑片來保持心境平靜。」

與此同時，Angel還聽莫札特音樂、和胎兒傾偈及唸經，果然，女兒Janice出生後皮膚已經靚過人，滑淨嬌嫩，連長時間困擾BB的尿布疹也不過出了幾天就已經不復見，食療及胎教在Angel母女身上效果顯著。

Angel指Janice是一家的小公主，而小公主最愛去迪士尼，為人母的當然常伴左右。

美容保健

不少嬰兒都會受諸如濕疹、癬等皮膚問題困擾，女兒Janice先天準備足鮮少發生這類問題，唯一經歷更令Angel確信自然療法及中醫對女兒美容保健更為有效。

「囡囡兩個月時，唔知係咪因為執房時揚起好多塵埃，她全臉長滿疑似粉刺嘅粒粒，前後找過兩位名西醫診症，都係開類固醇藥膏畀囡囡，差的只是濃度，我同老公都唔肯搽，幾日後，有個三個月大BB的媽咪級朋友建議我用娥羅納英雪花膏，結果搽咗兩日就好番晒！」

此後，Angel都以天然食材及中藥，作為Janice平時保健美容之用。若女兒發病，她也以自己豐富的中醫學及自然療法知識配合草藥，讓女兒自行康復。更重要是，這療法令女兒美麗而健康，「囡囡到今日吃過的西藥都不超過兩次呢！」

Angel在懷孕期間（左圖）注重為女兒健康、靚靚而飲食，產後（右圖）她以專業知識，極速收身。

2個月上堂認字

Angel常自稱為全職媽咪兼職CEO，全因她將大部分時間都放在女兒身上，教導女兒也從不假手於人，「囡囡兩個月大時，我就抱佢上七田真課堂，好多人都話我黐線，話上堂其實畀佢玩，45分鐘嘅課程，佢睇住Flash card真係睇到目瞪口呆，返到屋企我仲會同佢玩，佢15個月大就已經識得26個字母、200個中英文生字，兩歲多三歲就已經可以睇menu，指住簡單英文同我講，『I want to eat hamburger』或者『我想食fish』。」

Angel指Janice英文好過中文，但她認為中文很重要，因為未來將是華人世界，加上自己和先生均是中國人，所以囡囡上playgroup開始，就以普通話及英文為主，「我先生係台灣人，以普通話和囡囡溝通，國語係國際語言，學好國語可以接觸好多事物，廣東話都只係地方語言。」所以，Janice到三歲才開始說起廣東話來。

Janice很愛迪士尼，她還喜歡作公主打扮，煞是可愛。

「七田真派」乃一種由日本教授七田真創立的教育方法，由三個月大開始刺激兒童右腦發展，坊間亦有不少相關的參考書籍。

4歲多方面發展

Janice今年雖然只是四歲，但已經一身好武功，說的並非曉玉女心經、如來神掌，而是從小就學詩詞歌賦兼多元興趣，「從小我就播唐詩、三字經、弟子規、廿四孝故事畀佢聽，又會成日同佢講古仔，又借故事同佢傾偈，用中國傳統來教育，遇着佢鍾意嘅都會安排畀佢學，好似唱歌、跳hip-hop、功夫、畫畫、小提琴、鋼琴等，最近佢唔鍾意彈鋼琴咪唔好彈囉，最緊要佢鍾意又無壓力。」

Angel在事業上是女強人，在家她則是一個不折不扣的慈母。