又到新一年，各大投行、報紙或雜誌都先後推出今年投資策略，一言留意女股神劉央喺某雜誌嘅推介，唔知係傳媒要吸引讀者，抑或女股神信心爆棚，竟然推介十隻必賺股。一言大為訝異，事關投資哪有必賺，如果有必賺，點解要話畀別人知？

曾經有個教人投資嘅專家話，跟足佢套方法投資，多嘅可賺幾百萬，少者每天起碼賺幾千，至於點解佢願意跟別人分享，答案係「威」；因為佢學生滿天下，隨時向佢請教，自己覺得好有光榮感。呢啲講法一言就唔信，你投資咁叻，真係賺到大錢，好多方法威，物質上可以買靚車買靚樓，社會上又可以做捐獻，何苦要月開廿幾班咁辛苦。

講番女股神，舊年喺雜誌推介股份，十四隻之中竟然有十隻個價跌低於推介時；至於佢去年投資的十七隻新股，竟然有十隻係低於招股價，今次所謂必賺股，大家又信唔信？事實上，就算股神畢菲特，都唔可能買親股票都必賺，市場又何來必賺股？

記得七、八年前，有人向一言推介，話佢有個必賺期權策略，一言聽完冇理佢，皆因小弟絕對唔相信有必賺呢回事。後尾佢搵咗間期貨經紀行支持；結果點？咪累到間行唔見成千萬，跟住仲要破產。

女股神劉央過往戰績彪炳，今次推介十隻必賺股，成績如何就拭目以待？

股神陸東都睇錯

即使被散戶視為股神嘅陸東，舊年夠預測恒指會到達二萬七千五百點，一言還記得佢講過，係根據盈利收益率差模型（Earnings Yield Gap Model）計出嚟，由於係科學方法，所以唔會錯。今天二○一一年，答案係點，相信大家心裏有數。當然，佢曾經喺年尾時話，二萬七千五係恒指合理值，換言之係市場偏低，並唔係個模式出錯。

但一言可以夠膽講，股市從來冇話合唔合理，市場永遠變幻莫測，如果真係一條數式可以計到指數，咁就好多人都發達。事實話畀我哋聽，即使有兩位諾貝爾得獎學者係合夥人嘅LTCM，都敵唔過市場，普通人更加冇能力。

強如陸東，都估唔中舊年恒指。

樓價升跌從來沒有跟通脹

其實，投資從來冇合理，唔好話股市，就算樓市亦然。一言留意發展商言論好多年，佢哋經常話樓市要健康發展，樓價唔好大升大跌，最合理就係跟通脹。不過一言回頭睇番過去十年香港樓價，從來冇跟通脹走，一年升幅一兩成好平常。至於通縮時，樓價亦唔會跟，下跌時可以一下子調整兩三成。

最簡單，大家睇睇發展商呢兩年，每次所開新盤，呎價較同區樓價動輒高出一倍，你話樓價點跟通脹？投資者千萬別當真。

明年樓價唔跌都偷笑

講到樓市，今年肯定較去年遜色，一言睇樓市高峰喺舊年政府出招後已完結。自從政府要向兩年內買賣樓宇抽多一次印花稅，可以講係趕絕炒家，香港樓市冇咗炒家，單靠班用家點推起樓價？

想深一層，香港幾乎係冇人冇樓住，市民唔買樓係冇問題，對住屋係冇迫切性。你睇發展商新建房屋單位，主力係八百呎，就知針對換樓客，市場再唔係好似八十年代，起啲四百呎上車盤，所以唔好旨意用家可以推動樓價。早前因為炒風勁，市民驚唔買個價仲會升，於是原本唔買都走埋出嚟買樓，現時樓價冇上升動力，用家就唔使急，睇定先入市。

好喇，你話仲有投資客，但買樓收租，扣埋管理費、差餉地租，回報都係兩三厘，並唔吸引。加上買樓後因稅金加重成本，通常要等兩年先會脫手，投資咁綁手綁腳，並唔划算。除非明年通脹爆升，出現雙位數字，啲人擔心現金被蠶食，將資金投入樓市，咁樓價先有機會上升，否則樓價跟今年高峰持平都偷笑。