餐廳即使未變身酒吧，燈光一樣咁黑，想影靚相再上載 facebook都有難度。

試食王

樂基兒始終愛蒲

2012年10月18日 ~~ 第1180期香港《壹周刊》

多謝黎明和樂基兒，娛樂新聞又精彩起來。更多謝狗仔爆料，俾我知道樂基兒與舊相好在中環開了間墨西哥餐廳。鍾意食，當然要去八卦一下！
Socialito開在 Dragon-i樓下，單看門面，似間意式薄餅店加酒吧仔。原來餐廳前半部主打 Taco和 Tostada等小食，同員工講話想食晚飯，先有人帶你打開十足廚房門的入口，進入用餐區。好隱蔽喎！樓底算高，裝修好似都幾有特色，但實在太黑啦，基本上只見到點點黃燈和家具的黑影輪廓。

六個人以上才可訂位，我一行四人唯有六點九就到餐廳霸位，好彩大把吉位。大廚 William Otis來自智利，望望餐牌，有 Taco有 Guacamole chips，但大部分菜式怎看也不太像墨西哥菜。無所謂，如果新派菜式有創意得來夠好吃的話。頭盤點了龍蝦劍魚刺身和海鮮 Ceviche，主菜有帶子和羊。頭盤很快上枱，好彩有員工解釋每碟菜特色，否則完全唔知自己食乜。尤其是頭盤，醬汁幾搶味，加上黑到睇唔到碟中食材，真係分唔出那一片片或者一粒粒的究竟是龍蝦定蝦，又可能是八爪魚。主菜好得多，起碼羊和帶子是主角，兩者也處理得不錯，鮮味十足。

Wagyu Taco$135
兩小件，都幾好食，牛肉軟嫩，肉汁豐盈，但無咗墨西哥菜的濃郁惹味。

Sea Scallops Pasilla Mojo$310
帶子夠巨型，充滿鮮味。香菌有點太搶味，最不解是 on top的炸朱古力，侍應話當中酸味可令整體取得平衡喎，都幾得意嘅！

Bultarra Ranch Lamb$250
羊肉腍身，不過可能香料用得有點過火，酥香被掩蓋。

Ceviche Acapulco$140
有八爪魚、帶子、蝦和牛油果等，但食落同一種味。酸甜刺激，都幾開胃。

食物都幾有新意，不過不失咁啦。相信餐廳的重點其實在深夜， Socialito每逢星期三至六，十一點半至三點，都會將用餐區變成蒲場。如此昏暗燈光，根本就是為蒲精而設。飲品，竟然與晚餐同一個 menu。雞尾酒、紅白酒選擇唔多， Tequila最平一杯要二百六十蚊，即係想趕絕窮人。星期三 Salsa night再去八多次，七成以上係老外，感覺上流，唔太啱窮人玩。不過，啱晒回復單身的樂基兒就得啦﹗

Menu上得三、四款 tequila，最平呢款 Don Julio 1942$260。係靚貨，不過一杯未醉，心已赤赤痛。

Lobster and Swordfish$180
其實賣相都幾靚，但真係好黑，影唔靚。龍蝦和劍魚加上椰汁辣椒醬，好新派，不過太多汁啦！

評分

食物：★★★
服務：★★★★
環境：★★★
價錢：★★ 1/2

Socialito
地址：中環雲咸街 60號中央廣場地下 2號
電話： 3167 7380

試食王

喜歡外出用膳，也喜歡誠實，不相信飲食網站的所謂評分，也怕了所謂食家獲得優待後的意見，情願隱姓埋名，真金白銀，測試飲食雜誌飲食網頁捕捉不到的真實一面。

鏞記經典菜配美酒

套餐內有多款鏞記經典菜。

鏞記為慶祝 70周年，首次與大亞洋酒有限公司合作，推出美酒佳餚套餐。由現時至 11月期間，想歎到盡，可於鏞記 8樓私人粵菜會所「嚐真」，享用每位$2,188套餐，或者於 3、 4樓「蘭亭閣」享用每位$800套餐。除品嘗到鏞記經典美食和紅白酒外，更可獲贈 Lucaris動感香港系列水晶杯兩隻。又食又飲又拎，套餐好搶手，最好提早一星期預訂。

售賣點：鏞記蘭亭閣、嚐真
地址：中環威靈頓街 32至 40號鏞記大廈 3、 4及 8樓
電話： 2522 1624

穿高跟免費食龍蝦甜品

金箔龍蝦他他慕絲$105每件均有半隻龍蝦分量。

新都會廣場將舉行「十月女皇」甜品盛宴，邀請到獲獎無數的新加坡甜品天王 Daniel Tay以松茸及龍蝦創作多款甜品。廣場 2樓於 10月 17至 28日會設置甜品專櫃，發售 Daniel設計的甜品。另外，於 10月 28日，女士只須穿著兩吋半或以上高跟鞋，便可進入甜品盛宴會場免費食甜品。名額有 500名，先到先得，男士恨唔到咁多。

「十月女皇」甜品盛宴
地址：新都會廣場 3樓天晶館
日期、時間： 10月 28日、 5pm
參加方法：男士或者不想穿高跟鞋的話，只要於現時至 28日逢星期六、日及公眾假期，於新都會廣場內最少 2間不同非食肆商戶，以電子貨幣即日累積滿$1,200，即可獲贈甜品盛宴 VIP優先入場券乙張。
查詢： 2429 6500