嘩！你好好肉喎！（設計對白）
吓，我減咗好多㗎啦！（設計對白）
同你吟一吟
支持港片 郭富城唔做錢開眼
小小超要成功游說將約滿嘅郭富城留低繼續做電盈一哥，最近頻頻派糖表示誠意，早排搵城城傍住陳豪為旺角旗艦做開幕嘉賓，上個禮拜一（十月八日），城城又再出動幫公司拍廣告。
一晚走兩個地方，中環拍過馬路同苟芸慧擦身而過鏡頭，之後再轉位過海去旺角西洋菜街旗艦店拍室內。去到旺角，已經係凌晨十二點，食得又唔會肥嘅城城，索性走咗去食拉麵，食住等 set好機再埋位。
做巡迴演唱會長賺，加上有傳電盈開出億元條件留人，郭富城吸金力強，更難得係佢唔係錢開眼，好似下個月上畫，同梁家輝孭飛嘅新戲《寒戰》，由兩個冇人識、編劇出身嘅新丁做導演，拍警匪動作製作費冇得慳，投資者唯有向演員埋手，希望收順啲！二五話城城睇完劇本即 OK，接！
好老實，有啲大牌就算俾足錢，都企硬非大導不接，城城嘅態度，八珍借此空間讚，仲有願意為新丁導演客串嘅劉華。
同城城一齊拍電盈廣告，高登女神苟芸慧當然唔放過合照留念。
全身上下都係名牌嘅苟姑娘，拍廣告有專人服侍執妝。
城城以優惠價接拍新人做導演嘅《寒戰》，決定百分百冇錯。
拍完一個 take，城城都會緊張睇 playback。
拍完中環外景再過旺角拍室內，等 set機打燈，城城同經理人小美及工作人員食拉麵醫肚。
全站熱搜
留言列表
{{ article.title }}
