國台扮
星級阿兵哥 鄭元暢最型
自從台灣國防部收緊有關法例，等班明星冇機會藉口多多做閃兵後，既然避無可避，唯有死死地氣入伍報到，最快舉手當兵 嘅係小天阮經天，之後有明道、鄭元暢。
三大偶像劇一哥被分派到唔同部門駐守，當中以鄭元暢最威水，被派到海巡署岸巡二總隊服役，早排荷槍實彈參與行動，成功搗破私煙集團，起出 500箱私煙，對比起 响替代役，似做義工多過當兵 嘅阮經天，平日幾 man都冇用啦！
破大案
真槍真避彈衣，本身 6呎 2吋高 嘅鄭元暢，操兵操到得番 124磅，同佢以前 嘅長髮 look相比，家陣真係 man好多囉！
早排台灣雙十國慶，有關部門收到線報會有大批未完稅香煙，從海路偷運入境，於是派出多個部門組織出動封艇拉人，而鄭元暢效力 嘅海巡署岸巡二總隊，都有份參與今次 嘅大型行動。
當晚行動相當成功，一共起出 500箱私煙，著住避彈衣，手持真槍 嘅鄭元暢，負責睇住批私煙， 响現場採訪 嘅記者一眼就認得出佢，仲想埋去做訪問，鄭元暢尷尷尬尬話：「不好意思，我正在執行勤務，不方便回答。」而鄭元暢 嘅阿頭，見班記者影佢多過影私煙，於是埋去幫佢拉番好件避彈衣，等鄭元暢可以整整齊齊上鏡，唔會失禮海巡署。
有驚無險
已經 32歲 嘅明道，被指係歷年來年紀最大 嘅陸軍，好在體能仲頂得住，平日佢 响圓山忠烈祠駐守，國防部怕佢俾 fans騷擾，附近會有便衣保護明道安全。
一身制服誘惑，鄭元暢呢個阿兵 look深受外界激讚，話佢又 man又型仔，好在明道都唔輸蝕，以陸軍儀隊身份，國慶日 响總統府外參與三軍儀隊國慶表演，轉槍拋槍操兵有板有眼，雖然俾人發現佢不時斜望隊友怕做錯動作，但最後都順利完成整個表演。
鄭元暢、明道做個真的漢子，相反，阮經天 响替代役當少爺兵，一直俾人鬧完又鬧，試過執行公務期間偷食煙，休假返屋企揸跑車鬧記者，平日所謂 嘅當兵，只係去公共機構做義工，耐不耐拍吓公益廣告，悠悠閒閒又一 day，當兵喎！ 
阮經天當少爺兵，執行公務有煙食（紅圈），唔俾人鬧先出奇！
年頭入伍到而家，只係 响頭三星期接受真正軍人訓練，之後日日他他條條做公益活動，早排擔任老師，教班小朋友學做戲，爽！
趙薇老公晒女
自從 2008年踢走葉翠翠，下嫁富商黃有龍後，趙薇 2年前再為老公誕下囡囡「小四月」。做 咗黃太，又做埋媽咪，但趙薇甚少將家事公開，甚至已經兩歲半 嘅囡囡都好少提起。
但佢老公黃有龍就唔同，耐不耐就會公開囡囡 嘅生活照，大晒幸福。上個禮拜，黃有龍上載愛女 踎地玩 iPhone相片，剪 咗個新髮型，加上個樣似足媽咪，超萌照片獲二千多個留言激讚， fans人數遲早多過媽咪趙薇！
玩 iPhone
剪 咗個斜 cut新髮型，趙薇囡囡 踎低玩 iPhone嘅照片獲網民激讚超可愛！
一家三口
趙薇甚少提起家人，反而 响黃有龍微博入面，經常見到佢 哋一家三口 嘅溫馨照片。
天后 auntie
黃有龍留言話王菲係囡囡 嘅粉絲。
泳裝照
十．一國慶日，兩歲半女兒著住救生衣游水，一 啲都唔驚。
金城武唔認姪女
金城武近年雖然台、日知名度大減，但佢 22歲 嘅姪女曾馨嬅成功借叔叔個名入行做明星，去年 响台灣做模，今年已經有日本公司同佢簽約， 啱 啱拍完個線上遊戲廣告，公司計劃明年幫佢出碟做歌手，而家曾馨嬅 响日本受訓，學日文學唱歌學跳舞，再改埋藝名曾宇璦，以英文名「 U」強攻日本藝能界。
講真句，阿姪女個樣唔係特別可愛，如果唔係阿叔叫金城武，又點會有呢個好機會，不過唔講唔知，原來金城叔叔對於姪女借佢個名做明星好不滿，事關曾馨嬅爸爸只係金城武同母異父 嘅哥哥，當年阿哥兩夫妻鬧離婚搞到家嘈屋閉，曾馨嬅承認有呢件事，仲話當時金城武幫理不幫親，俾埋錢佢妹妹讀幼稚園。
N年前 嘅事攞番出 嚟做宣傳，金城武經理人已經講到明，要曾馨嬅做訪問唔好再提金城叔叔，否則一場親戚都冇面俾。
已經 38歲 嘅金城武，近年多拍大陸戲，就算長住日本，當地藝能界 嘅工作其實唔多。
曾馨嬅首支日本線上遊戲廣告已經見街，聽聞反應唔錯，多得佢阿叔叫做金城武。
報稱身材有 31D，曾馨嬅唔同打扮，心口 cup數都會唔同，奇！
留言列表
{{ article.title }}
