娛樂八掛大放送★

全城恭賀天王做老豆，實情老婆仲未有 B，劉華今次真係無講大話。"
探熱針
等生仔兩年冇料到　劉華朱麗倩急尋名醫
2010年10月07日
44歲朱麗倩被指成功懷孕三個月，秘密到聖保祿醫院睇婦產科。家有囍事，劉德華本週一（十月四日）出席演唱會記者會公開澄清：「係啲雜誌亂寫，冇件咁嘅事。」
咪以為大話天王慣性講反話，或者怕 BB小氣隱瞞事實，據可靠消息指，雖然睇婦產科求子兩年，但朱麗倩個肚根本未「得手」，都想做老豆的劉華決定爭取時間，另覓生仔聖手，就算趕唔切「兔 B」尾班車，都希望生「龍 B」可以十拿九穩。
葉德嫻要抱孫
去年受「大話天王」事件影響，劉華用上整整一年時間重整天王江山，多得歌迷既往不咎，劉華十二月舉行的跨年演唱會，場數有增無減，證明人氣回勇，本週一，大會於洲際酒店舉行加場記者會，宣布開足十八場。
為盡顯天王架勢，記者會嘉賓陣容落重料，除了林建岳、張耀榮、樂易玲基本班底，還搵來當年拍板用新丁劉華孭飛拍《獵鷹》的李添勝，電影《投奔怒海》導演許鞍華，更唔少得「媽媽」葉德嫻和「神枱級 fans」徐小鳳。
嘉賓逐一上台講感受，分享劉華入行三十年辛酸史，「媽媽」葉德嫻更老實不客氣：「我希望華仔身體健康，錫老婆多啲，快啲整個孫仔俾我抱。」
犯禁提家事，見台下嘩聲四起，劉華逼住扮大方：「呢啲嘢（老婆、生仔）係你先夠膽講。」

自從榮升劉太，朱麗倩得老公痛錫，有三樓兩車過億揸手，但講到生仔，辛苦兩年仲未得手。
 
「媽媽」葉德嫻要求抱孫，劉華以笑遮醜，更加唔敢駁嘴。
 
記者提起朱麗倩，劉華變得扭扭擰擰，除了合十向記者求情，又在嘴邊拉拉鏈，半句都唔想再多講。 

有苦自己知
葉德嫻帶頭破戒，傳媒亦打蛇隨棍問劉華，朱麗倩是否如傳聞中有孕三個月，天王斬釘截鐵：「係啲雜誌亂寫，冇件咁嘅事！（點解咁多保鏢跟住你太太？）全部係司機，根本冇保鏢。」
傳媒再問究竟幾時還葉德嫻抱孫心願？平日鍾意鬧記者「唔乖」迴避答家事的劉華，今次以雙手合十求情，記者於是兜個圈問「係唔係同兔 B好有緣？」劉華繼續做默劇大師，在唇邊做出拉拉鏈動作，示意唔想再講。封嘴唔提老婆，其實劉華有苦自己知，事關老婆朱麗倩近年積極訪尋生仔名醫，可惜個肚一直無反應。
「其實兩年前朱麗倩已經四圍搭朋友問有咩生仔醫生介紹，中醫西醫乜都要，佢自己知自己事，成四十歲有多，就算之前有冇生過都好，呢個年紀要有 BB唔容易，難得華仔話想生，朱麗倩不知幾開心，佢有晒準備做媽媽，但睇咗咁耐醫生都未得。」知情人說。

結婚事實被傳媒公開，劉華終於認妻兼認衰，拖住老婆朱麗倩現身，之後經律師發聲明，強調二人並無子女。（《蘋果日報》圖片）
 
09年 2月，劉華接受有線專訪，口口聲聲話結婚一定公開，但原來早在 08年 6月，已經同朱麗倩到美國結婚，大話連篇。

家事唔擺上枱
時間唔等人，朱麗倩轉眼四十四歲，錯過最佳成孕黃金時間，加上劉華已經四十九，生仔大計不能再拖，天王於是另覓婦產科聖手，希望有轉機。
「朱麗倩咁耐都無料到，華仔唔想再拖，同老婆商量過，決定轉睇其他醫生，而家四圍問緊人有咩好介紹，不過華仔唔想咁高調親口問，都係搭朋友幫手四圍八吓，就算要飛去第二度睇都無所謂，最緊要佢哋兩公婆家陣一條心，真係好想有 BB。」知情人說。
自從被迫公開已婚消息，一向唔衰得的劉華孭住大話天王污名匿埋內地密做一年，雖然演唱會銷情理想，證明自己冇一鋪清袋，劉華終於可以放下心頭包袱，但老婆生 B大計，家事一概唔想擺上枱。
30年風浪

《獵鷹》劇照

1982年　第一次做男主角，接拍電視劇《獵鷹》一炮而紅，劇中與葉德嫻飾演母子，令人印象深刻，後來得無綫力捧，與梁朝偉、苗僑偉、湯鎮業、黃日華組成五虎將。
1985年　開始加入樂壇，推出處男專輯《只知道此刻愛你》。
1986年　成為影壇新貴，劉華打算離開無綫向影圈發展，但遭無綫雪藏，遇上演藝事業第一個低潮時期。
1988年　得王晶提拔正式加入影圈，接拍《精裝追女仔 2》以及《最佳損友》系列，之後接拍《旺角卡門》、《天若有情》等作品，成為影圈第一代古惑仔。
1990年　成立天幕電影公司，創業作《九一神鵰俠侶》票房大收，劉華心雄，投資數千萬繼續開拍電影，可惜風光不再，有傳他累積虧損四千多萬。
1992年　電影王國雖然蝕多過賺，但劉華樂壇成績卻相當理想，與黎明、張學友、郭富城成為四大天王。
2000年　天幕繼續蝕大錢，後得「中建電訊」主席麥紹棠入股才起死回生，更乘科網熱潮，合作推出 http://andylau.com，預計兩年後集資八千萬搞上市。

2002年　與麥紹棠反目，劉華入稟高院向麥追討一千五百多萬欠薪，麥紹棠反擊，指劉在外秘撈導致公司損失，反索償 1.5億，並要求法庭禁制劉華演出，包括即將開拍的《無間道》電影，有傳劉華得林建岳相救，以五千萬向麥紹棠回購天幕股份。
2004年　冇咗麥紹棠，劉華高調加盟「加際娛樂」另覓靠山，但 04年雙方關係決裂，「加際」禁止劉華與黎明、梁朝偉合唱《無間道Ⅲ》主題曲，劉華則要求對方清盤，最後官司庭外和解，劉華回復自由身。

2005年　劉華唯一承認的女友喻可欣，推出自傳《情海星空》，揭露二人感情事，包括初夜莽撞過程。
2007年　國內女 fans楊麗娟來港要求見劉華不果，楊父一怒之下跳海自殺，更遺下 12頁遺書指責劉華「冷漠無情」。
2009年　朱麗倩父親朱金城在大馬病逝，劉華雖然有陪朱返大馬奔喪，但拒現身喪禮，並禁止朱家刊登訃聞，未幾再被揭發與朱麗倩早在○八年六月於美國結婚，被封為大話天王，劉華被迫與朱麗倩上演「世紀拖手」補鑊。
生仔聖手
圈中女星大多數遲婚，錯過生仔黃金時間，加上婚前顧住拍戲搵食，無好好保養身體，想生仔，唯有訪尋名醫打救。
何永超　有傳吳君如 05年經香港生殖醫學會會長何永超醫生指導下，成功懷孕， 06年誕下女兒陳是知，而陳慧琳與黎姿生仔都幫襯何醫生。
李國勝　明星御用中醫師，袁詠儀、邱淑貞、黎姿等人生仔前都搵李醫師開藥調理身子。
葉展生　助盧淑儀以中藥調理身子成功生仔而打響名堂，不少不育夫婦都搵葉醫師睇症。有傳盧淑儀介紹當年常有經痛又諗住生仔的陳慧琳求診。