NBA 2K12 大玩名人堂 @ 娛樂八掛大放送★

去年《NBA 2K11》用上「籃球之神」Michael Jordan掛頭牌，又加入咗Jordan Mode，創造出全球逾500萬套銷量。今年《NBA 2K12》就玩得更大，唔止有Michael Jordan，仲搵埋Magic Johnson、Larry Bird兩大80年代超級巨星，一於懷舊主導，懶理今年NBA賽季到底傾唔傾得掂數開波！

十五位巨星登場

Michael Jordan基本上係銷量保證，所以舊年就由Jordan擔大旗，又封面、又專用模式、又要蒐集Air Jordan波鞋，結果大收旺場。可是今年無理由再出Jordan一招，因此就索性玩大堆頭，加入眾多名人堂超級巨星，除Magic Johnson同Larry Bird之外，新增的「NBA's Greatest」模式仲有近代嘅Scottie Pippen、Karl Malone、John Stockton、Patrick Ewing，或再早一代的Abdul-Jabbar、Isiah Thomas或幾十年前神級球星Bill Russell，以及創單場100分紀錄的Wilt Chamberlain等，共十五位超級球星登場！玩到咁大，下年都唔知點收科。

實況重演經典場面

每個超級球星都有專屬的經典賽事畀大家體驗，成功達成目標仲可以Unlock球隊、球賽及球星，非常好玩。各場經典賽事都製作得相當認真，球員衣着固然跟足歷史，如以前球員都係着短身褲配長襪打波，而球場上的廣告招牌同分牌都跟足時代，像Bill Russell的1964-1965年賽季，球場旁既無任何廣告牌，球場上亦無三分線，甚至連畫面都變成黑白兼在四角出現黑角，模擬當年黑白電視轉播嘅感覺，而旁述方面亦改成單聲道加上當年語氣，正到暈。

育成模式　畀錢買球星絕招

此外，遊戲系統都特別經過修改，令一般玩家都可感受到其好玩之處。之前一集都只會在球員腳底加入體力同「手感」計，全紅就代表「着晒火」。今集就用上環形設計，並且換上「位置」指標，當球員企入佢擅長的得分區時能力值就爆標，唔熟悉各真實球員的專長都一樣可以打得順風順水。上集都已有嘅「My Player」模式，今集加以強化，原創球員除自己揀選身高、外形、裝備同紋身外，仲可以用錢買埋球星們的招牌動作，好似Jordan式入樽動作就要賣到四百萬，最初Rookie階段根本買唔起，但平平哋執番對真實籃球鞋都仲得。當然，Keep住打得好，唔好有咁多Turnover，人工又會有得加，兼會有名牌球隊招攬，又可拍埋廣告同有人贊助。如果有時間，喪煲這個育成模式都好襟玩。

港隊球員評《NBA 2K12》

陳翊麟

NBA偶像：Michael Jordan

最想遊戲加入的經典球星：Penny Hardaway、David Robinson

評語：「上集Pick & Roll好煞食，但試過今集威力無咁強，要再揣摩一下，但遊戲相當好玩。」

蔡龍德（左）

NBA偶像：Michael Jordan

最想遊戲加入的NBA球星：Ray Allen

評語：「之前幾集都有玩開，出外集訓都有帶埋去玩。今集造得更真實細緻，平衡度亦相當高，一定會買嚟玩。」

INFO

類型：運動

開發：2K Sports