娛樂八掛大放送★

新城高層生日，林峯親手幫佢戴頭箍，搞到班fans V嘩鬼叫。蕭敬騰同何潤東就一人一大束鮮花賀壽（右圖），擦鞋騷做到上舞台。

上星期六（八月七日），新城舉行一年一度國語力頒獎禮，年年俾人投訴個騷又長又悶，今年頒少十幾個獎，以為可以提早收工，點知又要幫新城高層慶祝生日。

 
話說新城董事總經理馬健生上台頒「亞洲人氣偶像」大獎，三位得主林峯、蕭敬騰同何潤東攞完獎，司儀忽然話馬董事今日生日，要全場同佢唱生日歌，林峯負責送頭箍，其餘兩個就做花仔送花。
免費做完歡樂先生，亞太區最受歡迎男歌星去到慶功宴，被酒樓人客圍實影合照，連帶同一圍枱嘅英皇一姐Joey影合照都影到黑晒面。
食客無掩雞籠四圍走，酒樓經理更加得寸進尺，要Sa爸介紹乖女俾佢認識，仲遞上卡片自我介紹。做頒獎禮坐足成晚，阿Sa已經攰到無表情，唔識交戲娛賓。

Sa爸向來識做，酒樓高層話要「派片」俾阿Sa，Sa爸無托手踭，只係阿Sa苦口苦面交唔到戲！

去到慶功，酒樓任由食客四圍走，圍住歌手影合照，林峯經理人忙於擋駕（左一）。

超女周筆暢改變中性形象，頒獎禮上著喱士短裙legging，加埋師奶曲髮襯金絲眼鏡，轉look轉錯晒，醜絕全場！