仇富思想，怨毒沖天。人各有志，誰能阻止？人生定律：拙於思考，必愚；自怨自艾，必頹；缺乏反醒，必墮；憎人富貴，必貧。凡將自身諸種問題，皆以「地產霸權」、官商勾結、無能政府、衰同事、賤老闆、狗朋友等合理化，愚、頹、墮三位一體，想成功，難矣！

二○○三年，太古城三千蚊呎時，又怨；現在百業興旺，又怨；升，又怨；跌，又怨；好，又怨；壞，又怨。你見過有人怨人怨到發達未？ Rich people focus on opportunities. Poor people focus on obstacles. 心神焦點所在，決定了人的命運。只有集中尋找機會，才能發現機會。

英國富豪鄧肯·班納坦（Duncan Bannatyne）的發迹史，可以說明此理。此君出身寒微，讀書不成，當兵揾食，又年少氣盛，差啲掟咗個玩針對的軍官落海，要坐九個月軍監。基本上三十歲前，都是打散工為生。但有意無意之間，累積了幾道板斧：

在海軍服役時，鄧肯學識維修器械；之後揸的士，學識幫人整車；終日滑浪，閒時在沙灘替更賣雪糕。鄧肯的富豪之路，始於一輛待售的殘破二手雪糕車。用了450鎊（計入通脹，約是現今港幣兩萬多元）買下，修妥後不遜新車。人家賣名牌雪糕，易賣利錢卻低。鄧肯沒怨天尤人，而是揭黃頁逐家問價。最終搵到平價批發商，開張大吉。

賣雪糕可致富

賣雪糕無門檻，鄧肯如何突圍？他引進來路匙羹，比對手快一步「畢」好雪糕，快手搶客。此外，米飯班主是細路哥，鄧肯出盡法寶，吸引小孩的注意力：在雪糕球面，用模具加上眼睛和微笑，再用朱古力豆、餅乾等造出不同面相，改埋不同卡通人物的名字，小孩天真無邪，嘻嘻嘻被o氹落叠。鄧肯冧客功夫，實在鬼哭神號：為小朋友拍照，仲叫得出「客仔」大名，客仔幫襯一角幾毫，感覺恍如上賓。當然不是特異功能，而是當年小孩衣服多繡有名字：有腦加有心！

生意紅火，迅速擴張，轉眼已有雪糕車隊。無牌經營的行家眼紅，偷偷入楔，交足稅項、牌費的鄧肯當然深深不忿，但報官需時，就直接調動兵馬，以三敵一，將「游擊隊」團團圍住，搞到對方雞毛鴨血。

鄧肯另一秘技，是熟讀政府部門的小冊子。孜孜苦讀發現，原來可以申請牌照，獨家在市政公園內賣雪糕。由於無人知曉，標價極低，獨市生意好做，正過印銀紙。鄧肯在回憶錄中笑言，不知何故對手會懶蠢如此，將印鈔機拱手相讓。