娛樂八掛大放送★

經常三代同堂四圍去，甘比全身打扮件件貴嘢，囡囡秀樺亦著住今年流行嘅鴛鴦色legging，反而甘比媽永遠T恤牛仔褲，打扮普通。

香港兩大富豪背後嘅女人，李嘉誠有周凱旋，大劉劉鑾雄有甘比，兩位紅顏知己無論年齡、出身都唔同，對物質要求當然有分別。

早兩個禮拜，《壹》仔响星街撞見周凱旋同兩位女性朋友，幫襯日系時裝品牌45R。
平日打扮樸素嘅周凱旋，估唔到買衫亦鍾情設計簡潔嘅45R，仲撞啱半價清貨大減價，朋友滿載而歸，反而周凱旋齋睇無幫襯，兩手空空走人，最後由兩位經常响超人身邊護駕嘅大隻外籍保鏢，送周凱旋上車離開，尾隨仲有另一架車負責護航。
周凱旋裡裡外外對物質睇落無要求，反而大劉紅顏知己甘比，最鍾意將名牌由頭笠到落腳。上個禮拜三（八月四日），甘比孭住啱啱上個月先有得賣、價值$31,700嘅Chanel新款手袋，同埋媽咪以及囡囡劉秀樺，去中環Chanel檢閱新返嘅秋冬裝。
有貴客光臨，店內職員落力推介只有VVVVIP先可以率先買嘅秋冬貨，睇到笑晒口嘅甘比，仲預埋媽咪一份，安排店員攞戒指出嚟俾阿媽試戴任揀，母女有福同享。

周凱旋慳家
無幫襯嘅周凱旋邊行邊同身後黑裙女友揮手講拜拜，大隻外籍保鏢繼續企門口唔郁，因為周凱旋另一位朋友仲响入面俾緊錢，連老闆娘嘅朋友都保護埋。

另一外籍保鏢開定車門送周凱旋登上黑色寶馬7系房車後，尾隨另一架銀色5系寶馬即刻開車尾隨保護，兩架車車牌一樣，只係英文字頭唔同。

攞住Chanel袋行Chanel，甘比見到新貨到港嘅秋冬裝，响樓上睇到笑晒，落到樓下，職員再推介新款手袋，努力硬銷！

甘比媽咪睇中隻戒指，因為要抱實孫女，職員幫佢套入手指試戴，甘比亦從旁幫眼。