美國兩大富豪蓋茨與畢菲特發起「捐獻誓言」慈善計劃，招募到四十名億萬富豪承諾，喺生前或死後捐出一半身家，呢班富可敵國有錢佬加埋嘅財富達兩萬幾億（港元，下同），一半就係成萬億銀，佢哋嘅精神確係值得欽佩。

被傳媒譽為中國最大慈善家嘅余彭年，喺香港前後兩次話捐獻，到今時今日似乎都係只聞樓梯響。兩年前四川大地震，余老就將五項豪宅物業拎出嚟拍賣，話成功賣出每一幅，就捐二千九百八十八萬元賑災，結果點？暫時一間都未賣得成。

一言好奇怪，做善事就做善事，何解又要搞咁多嘢，直接捐一千幾百萬就可以喇！

被譽為中國最大慈善家余彭年（左）會否考慮效法畢菲特（中）及蓋茨，捐出一半家財？

李小龍故居遲遲未捐出

余老最經典就係捐出九龍塘李小龍故居做博物館，但就列出好多條件要政府應允，例如提高地積比率，由原有五千三百五十方呎增到三萬方呎，又要加入商業元素，最近仲要話加建地庫三層，其中一層更要作為余彭年慈善基金辦公室之用。

小弟認為，要捐就捐，何必開出咁多規限，而且呢啲條件係唔容易達到，特別你要加建樓面及增設地庫，涉及九龍塘一帶的規劃發展準則，政府唔可以輕言開先例，否則隨時被其他發展商鑽空子。再講，嘅然做李小龍博物館，又點解要將自己個慈善基金辦公室設喺嗰度？

至於要加建咁多樓面，余老曾跟傳媒解釋，話要做就做到好體面，唔係自己好冇面子。但一言可以講，做善事並唔係講面子，最重要係點先可以最有效幫到有需要嘅人或解決社會需要。

畢菲特○六年話將八成身家捐出，當年講緊係三千幾億，可以話係天文數字，但股神並唔係用自己個名成立基金，反之佢認為做慈善沒有蓋茨咁好，於是決定將大部分捐獻交畀蓋茨基金會，其他分別捐予幾家基金，自己連個名都冇，呢啲高尚情操，真係冇乜人做到。

余彭年話捐李小龍故居，講咗兩年都未成事。

大企業別慷股東之慨

講起做善事，最近市場有消息，幾家大企業計劃牽頭成立扶貧基金，資金來自相關公司每年利潤百分之零點五至一，即係話公司賺一百億就捐五千萬到一億。件事引起個別投資者批評，話唔應該慷小股東之慨。

一言都好認同，公司嘅錢係所有股東，別人投資你的公司，並非係做善事，而係着眼於盈利，唔好將兩件事混為一談。事實上，大富豪家財萬貫，自己拎錢出嚟都得，何必搞到咁複雜。蓋茨都係將夫婦私人財富拿出來成立基金，香港首富李嘉誠，亦係自己成立基金會，跟上市公司沒有任何關係。

小股東買股票係希望公司為佢賺錢，唔係做善事。

潘石屹要為廁所攪革命

大陸近年經濟急速發展，冒出唔少民企富豪，班大款新發財之餘，都會捐吓錢，過一過慈善家癮。

Soho中國（0410）老闆潘石屹就更絕，竟然諗出捐厠所，老潘話覺得啲偏遠地區學校設施好差，特別衞生情況更惡劣，於是忽發奇想，作出壯舉，要為呢啲學校來個厠所革命。

老潘決定斥資一百八十萬人仔，打造十個星級豪厠所，每個做價十八萬。呢批厠所每個面積一百三十三平米，可以處理一千名學生所需，除裝修得美輪美奐，最重要係厠所有抽水沖厠系統，大大提高衞生水平。

之但係內地有人批評，呢啲偏遠地區係好缺水，沖水式厠所起好都冇咁多水用。而且，偏遠學校經費一直唔多，整個星級厠所後，又要買水又要打理維修，變相加重學校負擔。

一言就認為，偏遠地區要起間學校費用唔會好高，以老潘嘅財富，又何需節儉到只係捐個厠所，捐幾間學校都可以喇。老潘應該要聽李超人講：「用之有道」。

潘石屹咁有錢，應該捐間學校，區區捐個廁所（圖）實在唔足夠。