估唔到你咁勁！（設計對白）
夠膽再挑戰我！（設計對白）
一直鍾意拍戲唔用替身的謝霆鋒，無時無刻都想搵機會展示一身好武功，早前便將跟鍾嘉欣男友伍允龍黐手肉搏真功夫片段，放上網任睇。見謝霆鋒打得，有兩年詠春功夫底的張繼聰，即時「身痕」向對方下戰書，擇日到新蒲崗擺擂台比武，可惜技不如人，結果被謝霆鋒連贏兩局擊倒。
葉問徒孫
謝霆鋒跟張繼聰雖然同屬詠春宗師葉問徒孫，不過謝霆鋒師傅伍允龍，師承葉問得意弟子黃淳樑（電影《葉問2》裡黃曉明飾演的角色），張繼聰則於兩年前拜葉問兒子葉準為師，故此二人一直未有機會切磋。
有鋪「挑戰癮」，習武以來不時跟同門師兄弟較量的張繼聰，除愛與玩泰拳的胞弟在屋企天台比武打到眼腫鼻腫，更試過膽粗粗搵人傳話，希望同自細習武手瓜起的樊少皇過招。以為自己好好打的張繼聰，收到風知道謝霆鋒打得，一個月前向對方下戰書，繼續撩交打。
一口答應
「張繼聰入行咁多年，都冇試過同謝霆鋒合作，不過佢好留意武術界嘅新聞，睇過謝霆鋒同伍允龍黐手，以及同安志杰練搏擊嘅片段，知道謝霆鋒真係打得，於是喺一個公開場合自我介紹，約對方切磋。」
本身是詠春狂迷的謝霆鋒，習武多年未曾收過挑戰書，難得張繼聰肯自動獻身，謝霆鋒當然一口答應。
「平日喺片場拍戲已經鍾意郁手郁腳，成日搵人同佢（謝霆鋒）對打，拍《十月圍城》時，除咗纏住甄子丹唔放，研究詠春，仲請埋師傅喺片場同佢練拳，練詠春練到着晒魔。」知情者透露。
據知，兩人在三星期前，於張繼聰及師兄弟租用的新蒲崗武館擺擂台，當日被邀出席觀戰的只有七個人，其中有伍允龍以及張繼聰幾個師兄弟。
禁止拍攝
「其實嗰個唔算係正式武館，只係張繼聰同師兄弟用嚟練武嘅地方，為咗唔想有消息漏出去，淨係叫咗幾個師兄弟嚟睇比賽，連老婆都冇通知，仲事先講明唔可以錄影同埋影相，事關任何一個打輸咗，傳出去都唔係咁好聽。」
有多次比武經驗的張繼聰，終於遇上強敵，整場比賽完全處於下風。「張繼聰平日都有同人比賽，又俾人讚有潛質，但嗰日一開始打，就明顯唔夠班，由頭輸到尾，三盤兩勝制，謝霆鋒連贏兩局，不過佢哋玩得都算斯文，點到即止，唔似拍戲咁誇張，打到流晒血瞓晒地，比賽之後，佢兩個仲傾咗一輪偈，張繼聰話自己輸得心服口服。」知情者透露。
栢芝殺到
據知在比賽當日，未被邀請的張栢芝突然在第二局現身，知道老公跟人比武，索性留低打氣唔肯走：「其實霆鋒冇通知老婆，嗰日栢芝有事搵霆鋒，上到去武館先知呢件事，不過佢一啲都唔驚訝，仲話要留低睇埋場比賽，其實霆鋒一早已經攞咗詠春導師牌，栢芝知道老公不嬲都好鍾意詠春，所以唔覺得係一回事，只係驚個老公受傷啫。」知情者說。
老公，掂啊！（設計對白）
張繼聰不時返武館練功，更將跟師兄切磋的相片放上facebook。
拜師兩年，張繼聰被一班師兄弟大讚有潛質。
張繼聰（右一）跟師傅葉準（左二）合作首部電影《葉問前傳》後，跟戲中演員及老闆冼國林（左一）一齊食慶功宴。
謝霆鋒跟伍允龍在他的三千呎豪宅練詠春的片段上載土豆網後，即時被張繼聰睇中，向謝霆鋒下戰書。
生完兩個的張栢芝，近日頻頻出動，早前就帶住Lucus到上海宣傳，不過只要老公唔使開工，她一定黐到實。
樊少皇自小在內地學武，據知張繼聰亦曾向他挑戰，不過最後應該打唔成。
謝霆鋒跟安志杰及一班師兄弟在武館練功，胞妹謝婷婷亦有到場探班。
有份在《葉問前傳》演出的張繼聰，之前就跟男主角杜宇航以及女主角陳嘉桓在台上耍詠春。
留言列表
{{ article.title }}
