其間加插多段環遊世界享福片段，去巴黎、荷蘭、加拿大甚至一齊到街市買餸和公園耍太極。老實講，這幕兩分多鐘，搵祥仔唱插曲〈紅蝴蝶〉襯底，與《義海》氣勢萬鈞的調子唔多夾。
祥仔第31集結局，為護送岳華返廣西而受傷昏迷六天，甦醒後驚見人面全非，最慘的是竟然失咗憶。
祥仔同九姑娘雖然山盟海誓，但內戰令二人無奈分隔兩地。鏡頭一轉去到十年後，移居到檀香山的雯女為求可以盡快與祥仔重聚，每日都在報章刊登尋人啟事，每隔三個月就會到報社交一次錢。
黎耀祥：好鍾意劉醒個角色，最欣賞係30年後劉醒同九姑娘重逢嗰幕，做番同一動作，真係好感動。可以演到劉醒，可遇不可求，我絕對希望今次可以攞獎（視帝），個獎屬於台前幕後所有人！
鄧萃雯：我冇機會經歷劉醒同九姑娘呢種愛，依家邊會有以命換命，為你擋子彈嘅男人。祥仔嘅演繹好平實，但真係好感人，有幾幕佢都打動到我，令我流出真淚水。
老妝全面睇
《義海》大部分演員均由後生演到老，尤以最後一集尾段的雯女多個不同年代不同年紀的造型最多變，美指和化妝應記一功。去片！
心姐冤魂索命
被岳華命令離開廣州的心姐（朗喜）直頭冤魂索命，於周日（28日）播映的第31集再次現身問雯女度水，話要同黃智賢（少康）搞鴉片生意。
借錢不遂，黃智賢聯同心姐踩上門，衰到用槍指住得番半條人命的岳華。
話晒岳華曾經是一代龍頭，咁俾人威脅法，激到佢戚眉歪嘴，好戲！
正當雙方人馬對峙之際，岳華冷不防揭開腳上毛毯，拔槍向黃智賢兜心口連開四槍，總算臨尾威番鋪。
心姐這集扮相比之前內斂，頭上亦出現多條白頭髮，不過眼見個仔當場斷氣，心姐進入癲瘋狀態，不停叫人救個仔，七情上面。
心姐癲喪無倫，在場人士只投以同情目光，冇人夠膽惹佢。最後心姐就一路拖住條屍，一路自言自語，睇見心酸！
謝雪心：試問見到個仔一下子死咗，點會接受到，發癲係好正常嘅事。我就係本住自己係阿媽嘅心態去演呢個劇。今次喜姐偏幫個仔未必啱，但做人阿媽就係咁。
岳華娶了胡定欣後，為了確立老婆威信，不惜將東泰一班老叔父的花紅由她來話事，胡定欣在大會逐一發放花紅時，意氣風發。
坐輪椅的岳華自知在亂世九死一生，就叫胡定欣跟隨雯女到檀香山過新生活。一直要服侍阿伯博上位的胡，仲唔冇鞋挽屐走咩。
岳華逃難炸死
臨老入花叢的岳華，最尾放生嫩老婆，以為有好報，點知逃難時卻遇上戰事，背脊更被流彈炸到應。
軍隊到處放砲彈，岳華不幸背部中彈歸西，與外間有傳的病死結局差天共地。而他的死樣幾乎連假髮都跌埋。
岳華暴斃，不過祥仔堅拒將屍體棄於草叢，決定孭起條屍逃亡，完全秉承祥仔宗旨：「生要見人，死要見屍」。
法拉返豬籠里斷氣
一直有心漏病，折磨咗大半世的陳法拉（劉晴），喺第31集終於要死。她臨死堅持出院，成班街坊坐三輪車成隊軍隊咁駛返豬籠里，睇住法拉斷氣呢幕，算係全集最感人。
黃浩然攬住法拉帶頭，祥仔等人坐三輪車跟喺後面，大家都露出一副慘樣。
法拉死後，黃浩然為她在豬籠里搞了個追悼會，還不停朗讀法拉所寫的日記。
下場有喜有悲
芸芸角色中，一班忠肝義膽的街坊差不多全部都得善終，至於一班毒販、漢奸及蘿蔔頭，則全部不得好死。
敖嘉年做爺爺
演活排骨一角的敖嘉年，尾集交代他有仔有孫，重返豬籠里居住，享盡家庭樂，但冇交代邊個係排骨嫂。
惠英紅激似阿婆
大結局的一大驚喜相信是惠英紅的阿婆造型，她無論由化妝、動作到表情都睇唔出有破綻。大家到時一定要留意呢part。
惠英紅：我為咗扮80幾歲嘅楊師奶，花咗兩個鐘染白啲頭髮，洗到頭皮都甩都未洗乾淨。呢場戲拍嗰陣要雙手曲起兼縮起個胸，成個人縮到得4呎幾高，咁做都係參照86歲嘅媽咪。如果有個最佳扮相獎，我會更加開心！
麥包金剛遭槍殺
作惡多端的麥包（梁非凡），因為向金剛（向山大佑）報殺妻之仇，反被金剛槍殺。金剛下場都唔好得去邊，被敖嘉年擊斃，大快人心。
暗場交代瓜柴
成日講要掟九姑娘落海嘅魯振順（大鳳哥），尾集暗場交代他在坐船避難期間不幸中槍，被推落海身亡。
而跟雯女逃亡到檀香山的馬海倫（鐵姐）則在途中身患惡疾而瓜柴。
二人風雨後重聚
鏡頭轉到1983年的香港，八十多歲的雯女和祥仔，在山上睇香港日落。二人一頭白髮，滿面皺紋，眼袋超大，扮相經過四小時化妝後，總算維肖維妙。
之後祥仔突然闔埋雙眼，頭部慢慢挨落雯女膊頭，雯女神情亦變得憂傷。劇情冇講到明，但照計祥仔是安詳老死。
我好似約咗人呀，點解我咩都唔記得晒。生要一齊生，死要一齊死，點解我要講呢句說話，我同邊個講？
係咪都冇消息呀？咁你幫我登多三個月啦！你今次幫我加多兩句。但願人長久，千里共嬋娟！
呢個女人曾經將全廣州鴉片一把火燒晒！佢為咗救人自己上埋鴉片煙癮，你哋做得到咩？九姑娘做嘅嘢，只有天知我知，你哋想殺佢嘅方法，就係先殺咗我，然後踩我條屍去殺佢。
我預咗收尾嗰兩年好慘，少康鍾意做龍頭大佬，唔通唔俾佢做呀！
上次你分咗四分一身家，唔該你唔好再嚟騷擾阿爸，阿爸亦一個仙都唔借俾你。
過到嗰邊，你搵番個年紀同你差唔多嘅男仔，好好生活！
軍爺，你都好好保重！
你見攰就瞓陣先，返到豬籠里叫醒你！
唔制呀！我突然間好想踩單車呀！
晴晴最鍾意寫日記，最後嗰篇係未發生，但傻妹一早寫定，我讀俾大家聽。阿哥，我知要你唔難過係冇可能嘅，但只會俾一個月時間你！
留言列表
{{ article.title }}
