雖然有億萬男友照住，但 22歲 Vilian仍然瞓身博上位，但係寫真嘅性感程度就只限於三點式加件背心密冚。
剝嚟玩
Rainbow師妹啜掂 3億波鞋大王
2010年06月09日
唔係個個 o靚模拋胸影寫真為搵錢，除大馬拿督千金莊思敏賺錢買花戴外，仲有 model剝衫只為名不為利。
最近孖師姐 Rainbow（胡心諾）出寫真、變身組合 Donut成員之一嘅 Vilian（劉瑋欣）， 22歲屋邨妹出身嘅佢，一心只為做女模過影相癮，咁把炮全因 Vilian一早秘釣身家逾 3億波鞋街大王長子彭俊峯（ Billy），拍拖兩年大把貨。
上週六（ 5日），本刊發現 Vilian與男友除出入男方跑馬地 5千萬豪宅，仲以女主人姿態落波鞋鋪坐鎮，兩人情到濃時更在車廂啜爆。男友大水喉射住，對女友做 o靚模舉腳贊成，還自豪對本刊說：「佢三點不露就得啦……我養得佢起！」口爽荷包脹！
中五畢業，讀過兩年美容課程，從未正式做過長工的 o靚模 Vilian，今年以 Rainbow師妹之名正式攻入娛圈。名花有主唔怕公開，何況男友係有米之人， Vilian拍拖更加「揚」。早在 Vilian入行前，已和波鞋太子爺彭俊峯（ Billy）拍拖。據彭的友人透露， Billy好錫女朋友。
餐餐食日本菜
「佢哋經朋友介紹識咗，拍拖差唔多兩年啦， Billy對女友好好 o架，明知 Vilian唔鍾意食肥膩嘢， Billy就餐餐同佢食日本嘢，淨係同我哋班 friend出嚟或者喺鋪頭食飯，先可以食自己想食嘅嘢。就算幾忙， Billy都唔怕麻煩，經常車出車入，佢哋成日連體嬰咁出現， Vilian又會成日落嚟幫手睇鋪，我眼見佢哋一星期起碼見 4、 5次，見親佢哋都好恩愛。」
攬
上週六本刊見到 Billy同 Vilian行落嚟嘅大廈，正是 Billy與家人同住嘅跑馬地樂活道柏樂苑， Billy家人自置嘅 3千呎大屋，市值 5,200萬。
錫
雖然已經拍拖近兩年，但 Vilian同波鞋街太子彭俊峯仍然超恩愛，出門口攬拖唔放手外，上到車仲忍唔住要錫錫。
波鞋太子彭俊峯的平治 C Class座駕價值約 42萬，車牌是其父親彭漢釗名下的富豪體育用品公司名義登記。
「老爺」政策
有錢又專一，據知 31歲波鞋太子同 Vilian感情相當穩定，仲一早已經見埋雙方家長，彭父對未來新抱仔印象良好，兼下旨叫 Vilian可以任攞新鞋新貨。「 Vilian好識做 o架！過時過節都會自動波買禮物畀釗叔（彭父彭漢釗），仲經常趁釗叔星期日放假唔使返 office，捉埋 Billy一齊陪老人家飲茶， Vilian份人本身都好孝順，所以釗叔都好鍾意佢。」知情者說。
睇 Chanel
二人離開柏樂苑第一站，就係去銅鑼灣利園嘅 Chanel專門店 shopping，眼見 Vilian睇完首飾再睇手袋，識貨嘅佢手上試緊嗰個係價值 3萬幾蚊嘅新款 Chanel羊仔皮袋。
服侍
Vilian為人嬌嗲，去到男朋友波鞋街公司睇鞋連綁鞋帶都唔使做， Billy寧願放低男人尊嚴跪低幫女朋友試鞋。
「我養得起佢」
男友彭俊峯︰搵埋佢代言！(真實對白)
當記者上前問波鞋太子 Billy介唔介意女友影寫真， Billy好大方咁話：「唔介意，睇完覺得好靚，遲啲想搵埋佢做代言人添。」
學徐子淇行老爺政策未算叻， Vilian最醒唔煩唔黐身，但做每件事都徵詢男友意見。上週二人拍拖巡鋪之後，記者上前採訪，難得 Billy大方，唔介意女友拍寫真益宅男：「我覺得影得好靚吖！性感都係美感，我哋大家有共識，佢唔露三點就得，我好了解佢（ Vilian），就算我肯佢都唔會露太多，佢鍾意做咩咪做囉，最緊要佢開心，如果有日佢做得唔開心唔做都冇所謂，我養得起佢。」
花園街小霸王
喺花園街彭氏家族波鞋運動門市約有 15間，多到真係入咗去幫襯都唔知。其中由 Vilian男友彭俊峯主理嘅 Dahood同 Converse專賣店齋計花園街都有 4間，分布於街頭同街尾，殺晒所有油水位，專賣潮貨、水貨。
波鞋街霸王狂開 38鋪
彭俊峯老豆係富豪集團老細彭漢釗（右圖），行內稱他為波鞋街霸王，係最早（ 8、 90年代）喺波鞋街賣波鞋嘅老行尊，旗下分店共 38間，店鋪包括 Nike、 Vans、 Converse及 adidas專賣店，另有 Dahood、 Fulvo、 Livo、 Jivo、 Apex等，近年更自家推出運動品牌「 FITTER」，運動鞋連服裝出品多元化，每月生意額閒閒哋逾 2千萬元。運動王國愈做愈大，彭開始購入地鋪自用，喺 85年期間，以 3百萬元買入花園街 45號地鋪，現時估值已經超過 9,500萬，現持有物業估值超過 3億元。
Donut舌戰新 8模
Donut頭炮寫真《 SUMMER DIARY》搶先於本週尾出，同是 6月出寫真嘅新 8模突然被班 o靚妹硬搶頭啖湯，新 8模之一的「嫩版范冰冰」 Jeana上週在報章就暗寸話：「 Donut肥膩兼冇人鍾意食！」而 Rika仲刻薄咁話：「祝佢哋早去早着，早登寫真極樂！」後生女邊抵得頸，呢 6件 Donut齊齊發炮還擊，塞住新 8模個嘴。
Donut
新 8模
Rainbow
香港冇得賣 Donut？佢係咪香港人嚟 o架？（插 Jeana冇常識）
Irene
唔夠人哋是非多，我哋個底細好乾淨。（暗寸 A.Lin被花心蘿蔔曾國祥呃感情，好 dirty。）
阿 Yu
我哋個個都真材實料，連一支 botox都冇打過。（明篤爆 Jeana神奇面尖鼻高，潮媽 Mia認打 Botox）
Caroline
我唔識自爆大鑊，更加未做人哋阿媽。（寸生過仔嘅 Mia）
Vilian
淨係贏青春都有排數，今年港姐年齡上限都係 27歲之嘛！（寸新 8模嘅 Vikebe 28歲）
Sweet
我得 16歲， Donut最大嗰個都係得 22歲。
留言列表
{{ article.title }}
