無綫一線小生花旦相繼離巢，林保怡、佘詩曼帶頭後，效力無綫十七年的張可頤，去年十二月底約滿後，亦決定不續約。
據知，無綫以加薪接近一倍捆綁三年留人，但有關接拍大陸劇卻諸多限制，同一時間，「城市電訊」的王維基向張可頤開出無綫七倍價錢，每集十四萬兼度身訂造劇本做利誘，糖同屎，張可頤諗無可諗，拜拜！


簽 TVB把鬼咩！（設計對白）
據知張可頤與王維基簽了五十集，總共袋走七百萬。（《蘋果日報》圖片）

綁死三年

正身在橫店，十二萬人民幣一集接拍大陸劇《女相》的張可頤，這段時間原本是埋位拍無綫年度大製作《大太監》，同視帝黎耀祥再做對手。
在去年八月開始，無綫分別派出兩大高層樂易玲及陳輝光，與去年尾滿約的張可頤傾續約，條件是加薪接近一倍，由本來兩萬一集，加至三萬八一集，對無綫來說，出手算闊綽，加薪之外，又講明她做《大太監》女主角，還有稍後開拍，李添勝監製的《呂后傳》，更是為她度身訂造。
「原本可頤都心郁郁，但咁啱有幾部大陸劇搵上門，同時間王維基又係咁約可頤傾過檔，講錢， TVB一定無得比，加上嗰幾部大陸劇落實咗會喺最高收視嘅湖南 衞視播，可頤都諗咗好耐心大心細，到聽見添哥遲吓拍埋《神探哥侖布》之後就退休，根本唔會拍《呂后傳》，同埋無綫突然話要可頤一簽就三年，無得講數，否則就唔安排佢拍啲大（製作）劇，可頤梗係唔就範，唔俾無綫綁死。」張可頤身邊人說。
張可頤決定唔再同公司傾續約後，亦拍板接拍大陸劇《女相》，無綫唯有臨急變陣，搵米雪埋位，頂替張可頤拍《大太監》做慈禧。


王維基積極撬走無綫人，最近成功以銀彈攻勢，令到張可頤轉台。


去年張可頤幫無綫拍《呂后傳》宣傳片，當時有傳是由李添勝監製。


原本由張可頤主演的《大太監》，因為她唔續約，最後由米雪夥拍黎耀祥。


《法證先鋒 3》是去年無綫最高收視劇集，但女主角及監製梅小青都相繼離巢。（《蘋果日報》圖片）


去年樂易玲與張可頤多次傾續約，但因為條件苛刻，張可頤決定走人。（《蘋果日報》圖片）


現在張可頤身在橫店拍攝古裝劇《女相》，之後緊接拍多一部一陸劇，預計五月先為王維基開工。

收視保證

94年參選港姐，張可頤雖然三甲不入，卻被無綫睇中簽約成為旗下藝人，第一套劇集《地獄天使》已擔正做女主角。 97年在《難兄難弟》中飾演程寶珠一角大受好評，令她人氣急升，無綫亦趁機力谷她做一線花旦。其後接拍多部重頭劇，如《茶是故鄉濃》、《烈火雄心》等，全部有收視保證。 03年，她憑《九五至尊》中呂四娘一角撼贏佘詩曼、宣萱等花旦奪得台慶視后。 04年，張可頤有份參演的重頭劇《金枝慾孽》，最高收視達 41點，破晒紀錄。去年，與黎耀祥合作台慶劇《法證先鋒 3》，平均收視 36點，是全年劇集之冠。


張可頤曾奪視后，亦憑《金枝慾孽》打入大陸市場。

自由度大

據知，張可頤亦已落實同王維基簽約，對方出手每集十四萬港幣，足足是無綫的七倍價錢，以港劇計，絕對是新高。除此之外，王維基更答應會為她度身訂造劇本，又給予極大自由度，讓張可頤接拍其他電視台劇集，這些條件，無綫根本無法招架。
「王維基預計今年九月可以開台，所以好積極搵啲一線小生花旦開劇，就算價錢貴啲都無所謂，因為開台頭幾部一定要夠爆炸性，先可以搶無綫嘅收視；嚟緊三月開始陸續開劇，張可頤嗰部就要等佢拍完兩部大陸劇，大約五、六月至開，會分別喺香港同北京拍，因為係開台武器之一，所以製作費要成百萬一集。」一名城市電訊幕後員工說。


去年底，張可頤與陳豪拍完《天梯》後，便正式同無綫結束賓主關係。


近日黃日華與王維基經常在微博對話，黃日華擺明有興趣過檔。


林文龍與郭可盈兩夫婦，亦落實泊王維基碼頭。

承認離巢

目前為止，除張可頤會過檔外，林文龍、郭可盈兩公婆、馬德鐘、廖碧兒均會幫王維基拍劇，而劉青雲老婆郭藹明亦被利誘復出，還有近日經常同王維基在微博隔空對話的黃日華，相信好大機會轉投王維基旗下。
本週二，記者致電身在橫店拍劇的張可頤，她承認與無綫傾唔掂數，「係呀，上年年尾滿咗約。（會唔會續約？）暫時未有呢個打算，依家開始拍緊兩部內地劇，未有時間傾。（你會簽王維基？）依家未有嘢可以公布。」之後便以要埋位，匆匆收線。

等住開台

今年廣管局將會增添三個免費電視台，除了現有的無綫和亞視外，由王維基統領的 CTI城市電訊，以及李澤楷旗下的 NOW亦準備就緒加入戰圈，電視戰一觸即發。

NOW


林保怡正式加盟 NOW旗下「大國豐臣」。

李澤楷旗下電訊盈科的 NOW，去年高薪挖走無綫綜藝科製作總監何麗全，擔任電訊盈科電視及新媒體首席總裁及製作部經理，他同時帶走無綫綜藝科近三十名製作人。年前，何麗全成功搵「無綫契仔」李克勤為 NOW主持講波節目，曾經為無綫製作不少高收視劇集如《溏心風暴》、《法證先鋒》等的金牌監製夫婦劉家豪及梅小青，亦將在數月後正式過檔 NOW。 NOW亦將主力與全國高收視率的湖南電視台合作拍劇，設立 NOW芒果頻道，而林保怡及王喜上月亦正式與 NOW簽約。

城市電訊

王維基揸弗的城市電訊（ CTI），早前公布投資六億，並展開連串挖角行動，以「天價」吸引無綫一班花旦小生過檔，已落實簽約的有馬德鐘、郭可盈、林文龍、廖碧兒、周家怡等。此外，一班老戲骨包括岳華、姜大偉、元華等亦是目標人選。幕後亦唔放過，以高出一倍人工，成功撬走三十一名編劇、編審，超過二十名監製導演，以及多名資深配音員等近百五名工作人員，金牌編審張華標、朱鏡棋等已答應跳槽， CTI預計今年三月正式開工，先開拍兩部時裝劇，新劇預計九月播出。


將軍澳建電視城。


早前王維基舉行聖誕 party，林文龍與姜大偉都有出席。

arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄