我返香港搵錢！真實對白
Jessica C.今次返香港，講到明要再搵宅男錢，仲好有信心話：「我離開咗香港咁耐，都會畀到新鮮感大家嘅！」
憑 34C警鐘胸響朵的 o靚模混血女神 Jessica C.，上年 10月突然宣布離港，聲稱要勇闖荷里活，誓要升呢踩入洛杉磯變新版 Maggie Q。
失蹤 3個月，上週 JC終於回歸香港，做埋 Goyeah.com新 game代言人。據知回歸首個工作已有近 6位數字收入，原來 JC留美期間，雖參與超過 20個 casting，但全部只屬初步試鏡，十畫未有一撇，留美等運到齋燒錢冇收入，唔想坐食山崩，都係返嚟吸轉金最穩陣。
現年 22歲的 Jessica C.，雖然一句中文都唔識講，但憑住「警鐘胸」去年暑假惡鬥成班陀地 o靚模，做騷接 job狂拋胸吸納電車仔 fans，香港撈得掂，難怪 JC更大想頭要返老家美國博一鋪，上年 10月臨去美國前還滿懷壯志話：「離開香港係想挑戰自己，因我貪心，想試吓去外地發展。」
荷里活好難活
JC話要升呢攻美，其實近年有唔少中港女星攻打荷里活，算成功嘅有楊紫瓊、章子怡、 Maggie Q及同李澤楷拍拖前嘅梁洛施，不過亦有大堆攻美脫腳例子，呢條水好搵，不過好難行。
廖碧兒未有耐上
09年廖碧兒曾跟 Maggie Q合演，由陳嘉上執導嘅荷里活動作片《拳王》，但至今一直上映無期，搞到一心以打女形象闖美嘅廖碧兒「荷里活」夢碎。
鍾欣桐戲分全 cut
3年前，鍾欣桐因淫照事件被迫停工期間，與其發霉不如發掘新大陸，曾赴美拍奧利華史東執導嘅《殊不簡單》，客串中東舞孃跳肚皮舞，但到正式上畫時，阿嬌戲分全部 cut晒。
章小蕙撈過監製
05年已唱通街攻荷里活嘅章小蕙，成日話埋到大碼頭，最大成就係做過奧利華史東套《殊不簡單》嘅監製，戲中仲扮埋記者做大茄。
攻美還心願
闖美 3個月，上週 JC突然返港，除擔任港台「十大中文金曲」做頒獎嘉賓，上週率先接受本刊訪問，原來今次 JC闖美是經她 14歲時在紐約發掘她入模界的當地小型模特兒公司 Power Model搭路，引薦她到多間於洛杉磯的製作公司， JC興奮自爆：「以前我已經想喺美國發展，但當時我好新，未有足夠信心，加上喺美國發展，要等好耐先有機會，之後去過日本發展，又喺香港拍過戲，我覺得儲夠經驗又儲夠錢，令我有足夠信心返美國發展。」
Jessica C.喺香港屬 Ana R.嘅 Model One旗下模，她表示有機赴美，由美國的蚊型 model公司 Power Model搭路，雖然暫時未有工作落實，不過 Jessica仍好有信心話：「嗰邊好多都唔會咁快有回音，係要等嘅！」祝你好運。
試鏡騷寫真
留美期間， JC密密 casting，包括 Olay護膚品及當地百貨公司 JC Penny廣告等試鏡，但全部仍未有回音， JC解釋：「我去到冇耐就撞正感恩節，之後又到聖誕同新年，拖慢第 2次試鏡機會。佢哋冇要求我騷身材，但我就畀我本寫真集佢哋睇，佢哋仲好 surprise咁讚我影得好靚。」
美國對手勁，以為佢會剝得更徹底，但 JC話：「性感唔抗拒， Jessica Alba都係咁，但全裸就唔得，因為唔想被定型為脫星，唔想做 cheap自己。」攻美三個月零收入，仲要照顧埋奀模男友 Seigio幾富貴都死，難怪佢話：「喺美國一直使錢，返港就有機搵錢，我唔會放棄香港，美國公司都鼓勵我兩邊兼願。」香港搵錢美國使， JC真係要勤力啲先掂喎！
cosplay引宅男
身材惹火唔怕露嘅 JC，最近獲由林建岳投資創辦的娛樂視頻 Goyeah.com邀請，出任該網站最新免費 online遊戲《海盜 J世代》代言人。遊戲中 JC唔只要扮海盜，仲有火辣拳手、俏護士及兔女郎等 6個造型，勁玩 cosplay啱晒電車仔玩。
JC回歸頭炮就係做網上 game代言， Goyeah.com發言人張寶華說：「搵 JC代言因為佢形象性感又夠健康，表情仲好生鬼，最重要係佢多 fans，好啱宣傳我哋隻新 game。」
留言列表
{{ article.title }}
