早前內地有傳話俏江南老闆娘張蘭喺北京花咗五百萬人仔，買咗間豪宅送畀台灣女星大S，一言喺北京嘅朋友聽到後第一個反應係：「吓，五百萬都算豪宅。」冇錯，口氣是大了，但確係事實，依家喺北京四到五環地段（北京核心是二環跟三環），好啲嘅新樓每平米講緊都要兩萬幾三萬蚊人仔，一個百五平米單位，隨時要五百萬。

呢幾年一言幾乎每年都去北京睇樓，每睇一次就驚訝一次，○五年喺市中心三環地段，富力地產（2777）發展嘅富力城每平米都唔使一萬，今天每平米三萬五，富力城樓價幾年升咗近三倍，以當年個價，依家即使遠到六環都未必買到樓。

一言舊年三月跟某家內房高層食飯，席間講起內地樓市，小弟見樓價係咁升，估計政府會出招，心裏有點擔心。但你估個高層點講，佢話唔使驚，「你唔買就後悔，大陸樓價係唔會跌。」

原來喺國內人心中，內地樓價係唔會跌，後來跟幾個地產界人士講開，佢哋都有同感。我相信呢啲唔係一個半個人咁諗，而係好多內地人都有呢個想法，就係呢種觀念，內地人有錢冇錢都前仆後繼去買樓。

北京樓價五年升近三倍，難怪內地人認為樓價唔會跌。

三個家庭 供一層樓

咁又難怪，二○○八年時樓價一度滑落，好多內房公司原本資金鏈好緊，於是劈價推盤，樓價確實出現調整；點知雷曼出事，中央放水，又再容許銀行向地產商大手放貸，結果○九年個市返晒嚟，樓價唔止追返之前跌幅，仲升咗好幾成，啲人就覺得好後悔，認為錯失千載難逢嘅入市機會。

再講，內地有個怪現象，一個地產項目推新一期樓盤，樓價通常唔會定低個先前一期，事關怕啲先買者唔高興，隨時撻定，更甚會衝擊發展商。兼且近年政府又要講和諧社會，發展商唔敢郁啲就話告人，於是寧可喺另外地方補貼一吓。

所以啲有錢人乜都唔諗，總之有新樓就掃貨，反正內地又冇乜投資工具，加上中國人傳統講安居樂業，有樓喺手，個心都「踏實」啲。至於普通市民，見樓價係咁升，今日唔買明日仲貴，即使力有不逮，都死借爛借去買樓。最明顯係年輕夫婦，各自問爸爸媽媽借錢，換言之係三個家庭供一層樓。

電視劇《蝸居》內嘅劇情並非誇張。

新樓落成 烏燈黑火

於是乎，近年新樓一出，縱然樓價跟市民平均收入脫晒節，仍然被搶購一空，箇中關鍵就係呢個原因。一言聽到，廣州有個無聊記者花咗成年時間，每晚走去數吓新樓盤有幾多個單位有燈光，結果係大部分都烏燈黑火。

內地傳媒話惠州近大亞灣某別墅，一推出就賣晒，但有個別買家搬入去住後，發覺只係有近一成洋房有人住，點解？原來大部分業主係買嚟投資，根本唔會住，發展商原先承諾嘅商場，竟然十室九空，皆因社區冇住戶，商店根本做唔住，結果成個區好似死城咁。

國內好多新樓落成交付後都冇人住。

內地樓價 跟工資大脫節

講真，國內呢幾年經濟雖然發展迅速，樓價升幅卻以倍計，唔好講北京咁核心城市，隨便二三線城市，每平米都要成萬銀，國內人普遍每月工資兩三千塊，點儲首期？每個月點供？北京雖然工資高，但普通兩口子夾埋，月薪大概一萬，你隨手一間樓要三百萬，首期就一百萬，每月供款萬幾銀，都唔知點供。

仲有，內地樓價不斷飆升，租金卻跟唔上，買樓收租投資回報竟然係一到兩厘，靠租金供樓實唔掂。而且內地人好多時因少少事唔交租，碰上租霸，隨時連嗰一厘回報都冇！

好喇，到你要賣樓時，又唔係咁容易喎，因為新樓不斷興建，除非你個價好吸引，否則買家寧願買新樓，事關一手樓提供的條件優於二手，例如供款方法、靈活性，以及有乜乜優惠等。而且，內地透過中介賣樓，佣金係樓價百分之三，一個兩百萬樓要畀六萬佣，交易成本高，兼且二手市場唔成熟，肯賣都要花一段時間先可以賣出。

內地樓市調整 未必是壞事

九七年以前，香港人都唔相信樓價會跌，皆因過去十幾年，大家只係見樓價大漲小回，八九年六四事件樓價調整六個月後又飆升；九四年內地宏觀調控，樓價到九五年底跌咗近三成，最終樓價以倍數反彈。於是人人認為，樓價跌反倒係入市機會，冇人諗過樓價竟然跌到○三年，足足唔見七成。

一言聽過曹仁超講，話佢有朋友九七買咗樓，點知樓市逆轉，份工固然朝不保夕，層樓價格日日跌，想唔要都唔得，因為已經成為負資產，賣咗都要畀銀行追差價。一言諗，現時內地人心態就似當年香港，佢哋都未經歷過樓價暴跌的慘況，於是愈發唔理性。

小弟認為，內地樓價出現一次調整，對內地人未必唔係好事，起碼畀佢哋知道，樓價唔係佢地想像中唔會跌，呢個世界冇必賺投資，否則炒到泡沫爆時，內地樓市隨時變成日本翻版。

曹仁超話九七年樓市崩圍，佢朋友幾乎畀層樓拖死。