與讀者互動，推介股票，屬指定動作。自問眼光尚可，卻發現散戶讀者，收穫有限。回顧讀者答問，才發現原因：舉凡推介六福（590），讀者第一時間，非伺機買入，反而是問：「周生生（116）點睇？」「景福（280）係咪抵啲？」想像力豐富的，更會聯想到漢登（448）：「珠寶股好啲，定係服裝股好啲？」審犯咁審，誓要無限比較，自我折服所買屬板塊最佳，甚至是天下第一股，方肯落注幾千銀。六福的基本因素，卻無人關心。

如此操作，結局有三：左諗右諗，原地打躉，坐失良機；左度右度，最終細博，大勝變小贏；左揀右揀，買咗爛橙，爆升才買，落得一買即艇。上述問題的共通點，一字記之曰：「慢」。查實選擇愈多，未必是好事，最終釀成「決策癱瘓」，動彈不得。

選擇太多決策癱瘓

何謂決策癱瘓？以一例解釋。一次實驗中，心理學家設定情景：有一年老關節炎患者，需動大手術，基本上是「煎皮拆骨」，料其難以忍受。此際出現一種新藥，醫生會如何選擇？結果：近半受訪醫師會即試新藥，免老人動刀受苦。接下來才是戲肉：假設同時出現兩種新藥，互有優劣，又如何？正路去想，應有更多醫師選擇用藥，可結果卻恰恰相反：僅四分一受訪醫師選用藥，四分三竟決定開刀算數！

選擇增加，往往令人無所適從。難以決定下，盡快投向最不理性之處，省卻苦惱，人性使然。譬如你認為買股優於揸現金，如市場只有一股，毋須多講，都會入貨。但有幾十隻股票，各有千秋，反不能入手，最終所揀，可能是最差選擇：揸現金。

選擇太多外，資訊太多，也會導致「決策癱瘓」。正如之前在報章所寫：「一般人的錯覺，是資訊愈多愈好，所以經常陷入搜尋資訊的泥沼。」解決辦法：專注找出「關鍵資訊」所在。上次寫報紙，是針對投機思維，今次嘗試解釋如何篩選長線投資的關鍵資訊。

聖誕節期間商場人頭湧湧，預期今年商場租金將飛升，圖為海港城商場。

關鍵資訊務必為新

長線投資的關鍵資訊，務必為「新」。新，有兩義。新之第一義：「從無到有」，如○九年家電下鄉、汽車下鄉、去年推行經濟適用房，後來汽車股、家電股以及中國建築（3311），股價大幅飆升，是為鮮明的例子。新之第二義：「恍然大悟」，事件早已存在，只是留意者稀，要半年、甚至一年，終達臨界點，才會忽然人人察覺，人人關心，人人認同。如二○一○年上半年，零售市道，已極暢旺，凡有行商場，盲都睇到，但要到第四季，全港散戶才恍然大悟，爭相認同，高位飛身搶入。股價拋物線飛升之際，也是開到荼靡之時。簡單而言，散戶皆知的資訊，價值近零。

德國股神科斯托蘭尼、日本股神是川銀藏，皆靠「關鍵資訊」獲取鉅利，不妨參考其著作偷師。現時報紙地產版中，商場、寫字樓租金飛升的新聞，不知凡幾，散戶何時方「恍然大悟」？