懷孕七個月停工兩個月，要照顧家中幾隻狗，家務仍然做唔停，唐寧身形發福，塊面腫到唔見頸；樸實的她，身上沒有穿戴名牌，似乎很享受平凡的孕媽媽生活。
8歲做童星、入行足足 21年，唐寧感情生活都算專一，除了農夫成員陸永外，男友只得一個分分合合的舞台劇導演男友鄧偉傑，二人去年 9月終於修成正果奉子成婚，懷胎至今經已 7個多月。
前男友陸永被指窮 rapper，老公鄧偉傑都唔有錢得去邊，週日（ 9日）本刊發現屈居大埔月租 8千 5平村屋的唐寧，唔靠菲傭幫手，自己大住肚洗衫放狗仲要做埋司機管老公接送，絕對係愛情至上的娛圈人辦！
老婆由大埔揸車到新蒲崗某工廠大廈接老公鄧偉傑往紅磡晚膳，全程不答記者問題，交給老婆應對。
去年 9月， 29歲唐寧失驚無神在微博公布婚訊，與舞台劇導演夫婿鄧偉傑奉子成婚消息不脛而走。雖然當事人一再否認，不過 10月 12日低調擺酒、工作急減愈着愈鬆身、去年尾連僅剩的港台劇《有房出租》拍攝都完工，有餡已經是公開的秘密。
上落天台 3次
週日（ 9日）中午時分，記者在唐寧的新婚愛巢、大埔黃魚灘村天台發現唐寧穿着晨褸從晾衫架上收衫回家，不久後再換了外套和長褲，步出家門在村屋附近放狗。
深閨在家家務不斷，唐寧明顯分配好時間，收完衫放完狗，洗衣機內的另一批衣服剛好洗完，兩個多鐘頭後，記者再次見到她一個捧住大籃洗好的衣物緩步上天台晾衫。近日寒流襲港，新界區氣溫更是跌破 10度，加上寒風刺骨，晾好的衣物不一會又被寒風吹倒，人在家中的唐寧像是聽到天台動靜，第三次回到天台，頂着 7個多月大肚，論論盡盡扶起衫架撿起一地衣物，重新架起衣架晾好衫，才回到 3樓家中。
呢日大埔氣溫最低得嗰 9℃，唐寧正值安胎期間，家務仍然做不停，停工不拍戲的她身兼人妻人母兼外傭三職。
老公拒擺酒
城中名媛圈中明星，個個有喜身邊必定要阿媽奶奶加外籍傭工貼身服侍，唐寧都算異數，身懷 7個多月 B，洗衫執屋煮飯加上服侍老公和 3隻寵物狗，全程唔見有人幫手。
不過慳得就慳又確係老公鄧偉傑作風，據悉年長 13年的夫婿鄧偉傑 9月與唐寧奉子成婚，唐寧父母一心要風風光光嫁女，鄧偉傑就一味要慳決意低調，最後抵不過老婆苦纏，才勉為其難 10月初在教堂行禮，於火炭一家酒樓一家人簡簡單單食個晚飯，慳得就慳。老婆唔夠三個月就臨盆，仲要一腳踢家頭細務，唔通連工人嗰筆都要慳？
$8,500租大埔村屋
07年唐寧演出舞台劇《爆谷殺人王》與同劇導演鄧偉傑翻撻即同居，入住男友以 8,500蚊租住的大埔現址村屋，向來鍾意大自然的唐寧與老公租住 3樓連天台，貪可以養 4隻狗及晾衫。活躍於舞台劇界嘅鄧偉傑， 08年以 21萬買入豐田家庭房車畀愛妻出入，算慳家家庭。
做埋柴可夫
做完家務，傍晚時分稍作打扮的唐寧身份從家傭變回司機兼太座，挺着大肚獨自駕駛鄧偉傑名下的日本房車往新蒲崗工廠區接載老公去紅磡撐枱腳食飯。唐寧用圍巾、外套和手挽袋層層遮住肚走在老公身前，記者先問腹中塊肉是男是女，唐寧面帶笑容回答：「多謝關心！」記者再問有冇進補，唐寧繼續避答：「去食飯呀…… bye bye喇！唔講！」說畢與鄧偉傑齊齊走進商場一間西餐廳，平鋸 98蚊一位的牛扒餐。
剛剛傳出婚訊時，唐寧曾經興奮自白：「生孩子要順其自然，應該唔只一個，佢哋先有伴吖嘛！我結婚後任何事情都唔會改變，大家都係做自己鍾意嘅嘢，我唔係要靠老公養嘅類型！」仲要造多個，下一胎咪要洗衫放狗湊埋老公仲要湊一個佗一個，好勇呀唐寧！
愛情至上
29歲唐寧入行多年緋聞唔多，對象個個是兩袖清風的才子，絕對是性情中人。
鋸平扒
貪才唔貪財
42歲鄧偉傑，係資深舞台劇導演同演員， 89年演藝畢業後，去過法國馬賽、英國等戲劇學校進修，亦係本地劇團「同流」藝術總監， 92至 98年更回演藝執教，去年佢自導自演嘅《笑之大學》，更成為「第 19屆香港舞台劇頒獎禮」最佳男主角同導演，有報道指他月薪約 6萬，雖然收入可能比老婆少，但老公咁有事業心，唐寧又愛才唔拜金，生肥 B組織幸福之家確係戥佢開心。
高志森：「佢（鄧偉傑）對香港舞台劇出唔少力！ 95年嘅《我和春天有個約會》舞台劇，鄧偉傑係劇中演員，佢無論演出定係做演員都好有創意，對香港舞台劇出唔少力！」（真實對白）
80後馮寶寶一做 21年
唐寧（原名江麗娜），香港出生嘅印尼華僑， 8歲入行做童星，一做 21年。之後一直做過亞視同無綫藝員，拍過近 40齣電視劇，卡住二線頭， 07年仲做過 1碟歌手，出碟《邀月唱》。近年轉戰大陸拍劇及上綜藝節目賺人仔，去年就與廖啟智、鮑起靜等做舞台劇《秒速 18米》。
留言列表
{{ article.title }}
