「小明上廣州，探親友樂同遊，小明問阿媽，買乜嘢畀親戚好友……（Rap）一蚊一隻龜，一蚊一隻雞，你話龜貴定雞貴……」

因為一曲〈小明上廣州〉在Youtube播放幾天，便有幾十萬點擊率，李家仁醫生最近爆紅！既有網民為這首兒歌製作出N個版本，稱他為「兒歌王子」，農夫的C君又公開讚他是殿堂級Rapper，連電台節目都以此做話題，多個訪問也自動找上門，點睇先？

「好開心！不過人生無常，實會衰、實會落，所以我現在看似好紅，但其實我已經做定心理準備，接受跟住嚟嘅唔開心。」

畢竟他活了五十九個年頭，看人生總有點透，所以，他還是趁着活在當下，盡量把握脫下醫生袍的時間，享受當他自稱的業餘歌手身份，享受唱他喜愛的兒歌，rap他的「一蚊一隻龜，一蚊一隻雞」，相當快樂。

結果，這個訪問我聽了他現場演繹〈小明上廣州〉，起碼五次。

李家仁手上的BB公仔，就是他九一年主持《咪話小兒科》的拍檔。拍照時，他拿着玩具咪，就即席唱了多遍〈小明上廣州〉。「呢首歌真係要成日練先至得o架！」

解構小明熱

這是我很想問李家仁醫生的問題：之前有一首〈小明坐火車〉，現在又來一首〈小明上廣州〉，那到底小明係邊個呢？「是他也是你和我。」他笑笑口的說，我的眼白反到幾乎見不到眼珠。「〈小明上廣州〉雖然早就錄好了，但一直未有機會出街，直至上年十二月八日才在《都市閒情》正式登場。」

歌曲登場後才一小時，有網民便把他演唱的片段放到Youtube去，「那天下午六時多有朋友告訴我，那段片幾個鐘已經有過萬人次觀看過；第二日，韋然（此曲作曲填詞人）致電給我，已經是十萬大軍！好開心！但同時壓力就來了，因為我每日都在追着觀看數字上升了幾多，好過睇股市，起碼唔會跌！」直至同月二十日，因為版權問題，片段卻被無綫刪除了。「那時已經五十二萬人次看過，無綫刪除後，我們惟有再拍一個MV囉。」

中學時的李家仁已是校內活躍分子，圖為1967年他跟學校朗誦隊在台上演出（最前排左四）。

這首歌能有如此佳績，他說，完全是意料之外。「就如《紅樓夢》，曹雪芹最初寫的時候，也沒有想過會成為後人的研究作品！」據他分析，這歌之所以能夠爆，是因為歌詞很正面。「最初我看到『煲個冬瓜猛咁o趙』，我都要問韋然：『喂，煮熟了的冬瓜，點可以用來o趙呀？』但後來我又覺得幾得意。，中間rap那句『一蚊一隻龜，一蚊一隻雞』同埋『入實驗室㩒緊急掣』以前都好流行呀，啲年輕人咪覺得好有共鳴好鍾意囉。」

他預告，「小明」系列的兒歌還會延續下去的。「嚟緊仲有一首〈小明去拜年〉，會在年初一登場。小明其實是一個好好的形象，做乜都得，去邊都得o架！」看來，這位小明應該有排冇得返屋企。

除了朗誦，他亦參與過不少校內舞台劇演出。「最遺憾是沒演過中文劇目。」後排左邊那個就是李家仁。

他強調自己只是個業餘歌手。「連『兒歌金曲獎』都攞過，仲想點？」

咪話小兒科

其實早於李家仁唱兒歌前，他已在不同媒體中發聲亮相。「一九八五年，商台DJ伍曼儀，邀請我到節目《日日好時光》中講解醫學，講十分鐘有一百五十蚊，到最後個環節cut到只有一分鐘，都係一百五十蚊。那段日子我識了很多傳媒人，後尾就有人搵我上去婦女節目講醫學囉。」

其中一個他主持的醫學環節，叫《咪話小兒科》，「每日我咪抱住個BB公仔，對住鏡頭同大家講（吊高嗓子說）：『小朋友三日一次大便唔使驚……』。」

後來在一個活動場合中認識了韋然，年多後韋然提議他唱唱兒歌玩吓。「我九二年開始唱，最初每年一、兩首，後來愈唱愈多，冇錢o架，但TVB肯播，我都有份滿足感。」

他聲言沒想到，一段演唱兒歌的片段，竟然會令他在網絡紅起來！

其他醫生工餘時間都以高級玩意作消閒，他卻以uncle身份唱兒歌o氹細路做消遣，不會覺得難堪嗎？「唔難堪，我做兒科醫生o架嘛，啲小朋友根本就冇年齡概念，佢哋只要溝通到就當你係friend。」除了唱兒歌，沒有別的喜好了嗎？「我每日又要去醫院巡房，又要應診，邊有咁多時間呀？唱兒歌只是我一個hobby，我只是一個業餘歌手，我不會做到陳奕迅，可以拍片、拍劇、接show，我錄一首兒歌個幾兩個鐘，之後就已經好他條。不過唱兒歌並冇令我多了睇症生意，個BB仔根本就唔會識，睇開我啲婆婆，又唔會理我係咪唱兒歌。」