日本地震後，福島核電廠變咗計時原子彈，隨時發生驚天大核爆，據官場線人講，政府高層一開始就知道單嘢係「重大事件」，迅速將危機應變升到最高級別，涉及多個局、部門及各方專家，由煲呔親自統領，大陣仗程度乃近年罕見，成個過程都幾刺激。

線人話，前周五日本發生大地震，初期未知核電廠有事，但因在日港人唔少，所以保安局立即啟動「緊急事故監察及支援中心」，統籌幾個部門，隨時提供支援。到咗第二日，核電廠開始冒煙，但當時連日本政府都唔知情況係點，外界所得資訊更加有限，未知咁大鑊，其後核電廠發生爆炸，大家至知道大件事，分分鐘成為蘇聯切爾諾貝爾核電廠災難翻版。

政府見情況急速轉壞，即刻將危機應變級別從第二級（保安局長統籌危機處理），升高到第一級，由特首親自主持跨部門會議（內部稱為「行政長官保安事務委員會」），參與高官來自保安局、食物及衞生局、商務及經濟發展局、運輸及房屋局等幾個局，其他仲有入境處、警務處、消防處及新聞處嘅代表，政務司司長唐唐都有出席。呢個委員會日日開會，隨時作緊急決策。

與此同時，政府又搵咗一批專家幫手評估核危機有幾嚴重，會否危害香港，需要做乜嘢防範，由於當時日本方面消息好少，政府要根據有限資訊作判斷，只能靠呢班專家分析。

線人透露，會議曾經討論過最壞情況會點，如果真係發生，香港應該點做。當時專家估計，最大鑊係反應堆大爆炸，出現當年切爾諾貝爾核電廠嘅巨型災難，輻射周圍散，影響範圍大好多，日本各地嘅香港人要立刻大疏散。不過香港同日本距離好遠，輻射會稀釋好多，天文台長又估計風向吹去太平洋，所以香港輻射風險唔會好高。雖然咁講，但政府唔想公開「最壞情況評估」，驚嚇親公眾。

政府高層知道市民對核危機十分憂慮，一定要迅速提供最新資訊，至可以令市民安心，所以派保安局副局長黎棟國及衞生局副局長梁卓偉每日公開做briefing，講述災難情況及對港影響，並解釋各項應變措施，呢種做法以前處理沙士及豬流感時用過，都幾有效。

與此同時，政府同國泰航空公司緊密聯絡，加派特別航班接載東京嘅港人返港，部分機位由政府包起，呢方面安排都好順暢，周日三班加班機當中，最後一班只有四個港人坐政府包嘅位。

雖然政府行動已好夠快，但議員「循例」提出質疑，主要針對東京旅遊警示唔升為黑色，以及冇強迫入境旅客接受輻射檢查。官場老友對議員亂鬧一通，相當勞氣：「掛黑色旅警要有根有據，東京輻射水平唔高，核電廠又冇再爆，連WHO都話災區以外輻射唔影響健康，無必要限制去日本旅行，如果政府提高旅警，搞到航班都去唔到，港人返唔到香港，到時又有人鬧政府過分緊張，過咗龍。」

至於強迫旅客接受輻射檢查，就更加冇道理。官場老友話，香港係國際城市，強制入境人士做健康檢查，要依照國際規矩，由WHO批，如果冇嚴重事故，唔可以咁做。所以政府決定旅客自願檢驗，過去幾日有千幾人驗過，冇一個人超標，證明呢個做法冇錯。

arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄