•靚蝦王做配角•
黃婉曼見到曾經紅極一時嘅香港馬王靚蝦王，興奮到要出手摸佢。唔好以為黃婉曼表情鬼馬就好淡定，查實佢震過貓王。佢話：「除咗人之外，凡係會郁嘅動物我都好驚。」
天氣女神黃婉曼早前跳入 nowTV主持互動遊戲節目《撳錢》，令其人氣颷升，除被邀出席各大小商業活動外，去年又被香港賽馬會睇中，邀她簽長約主持《放眼馬世界》，介紹國際及本地賽事及馬會活動。
對賽馬一無所知嘅黃婉曼，因工作對馬仔漸有認識。本周一（ 14日）早上，黃婉曼到屯門騎術學校拍外景，記者發現佢記性奇好，無論馬名、馬種抑或賽事種類都難佢唔到。黃婉曼仲話：「我最近開始學賭馬，仲會喺跑馬嘅日子入馬場，學做馬評人。」咁勤力，難怪半年就狂賺 300萬，認真豬籠入水。
黃婉曼周身刀瓣瓣掂，跳出無綫後，又跳入 nowTV做主持，去年年底仲殺入馬圈，為馬會主持《放眼馬世界》。本周一（ 14日）早上 9時許，黃婉曼到達屯門騎術學校拍攝新一輯節目，估唔到天氣女神唔報天氣轉講賽馬，一樣有板有眼。
一直以來，馬會只會搵專業馬評人或對馬有認識的人主持賽馬節目，今次搵黃婉曼，全因睇中女神夠輕鬆生鬼。黃婉曼說：「上年 9月馬會想搵個人以輕鬆手法主持節目，仲要有心學，唔係照稿讀。好多前輩都係參加馬評人比賽先可以入行，我好幸運得到呢個機會，所以會好珍惜。個節目喺亞視星期一至五播，我一個月會主持兩集左右，以前我會覺得賭馬係爛賭同市井，接觸完先發現賽馬係一門學問。鍾意馬嘅人會認真分析馬嘅品種、脾性，我依家會深入一層去睇跑馬。身邊有好多朋友都賭馬，佢哋都係憑直覺去揀，但原來賽馬係有得分析，我開始沉迷！嚟緊我會試下評馬，仲會入馬場實習，向專業馬評人偷師。」
貼中冷馬跑出
採訪當日，黃婉曼不時捉住資深馬評人梁浩賢密密斟。「我一有時間就會向拍檔梁浩賢請教，依家知道揀馬要睇好多嘢，好似來自咩馬房、咩練馬師、晨操狀態同戰績，如果隻馬一出場就頭耷耷同喺冬天出汗，咁就一定唔會揀。最近試過有兩場，我揀咗兩隻都幾冷嘅馬叫朋友買，朋友話冇可能跑出，結果一隻跑第一，一隻跑第三，嗰刻好有滿足感。（男友 F君賭唔賭 o架？）佢都有賭馬，所以我哋有共同興趣。我放咗一嚿錢喺朋友度，叫佢幫我買，不過我都係鍾意分析多過賭，小賭怡情嘛！」
據知黃婉曼為馬會主持節目的酬勞以每集計，至今拍了約十集，酬勞已過六位數字，對於近半年豬籠入水，黃婉曼笑說：「我呢啲辛苦錢嚟 o架！總之每樣工作都做得好開心，酬勞都好滿意啦！呢個賽馬節目我會一路做落去，呢幾個月做主持同接出面嘅工作，時間都唔夠用，感冒咗兩個星期都冇得休息。」拍攝當日黃婉曼在記者面前連啪幾粒感冒藥丸，聲沙沙的她仲要背一大堆對白。不過就算幾病都好，黃婉曼一埋位就精神百倍，咁專業，真係抵佢長做長有。
留言列表
{{ article.title }}
