娛樂八掛大放送★

我得寵：
麥貝夷鍾一憲　憤怒兔VS公關狗 5,390 


■鍾一憲所養的芝娃娃狗女Master，猛望着麥貝夷的惡霸兔仔Cupid，難道是怕惡兔來襲？攝影：陳志嵐

樂壇新人鍾一憲和麥貝夷被唱片公司安排做拍檔，合拍地多次合唱情歌，不過他們所養的寵物卻不是「最佳拍檔」，鍾一憲養的長毛芝娃娃狗女Master，性格友善愛與人親近，似足公關；相反麥貝夷的兩歲兔仔Cupid似足惡霸，她笑指牠是憤怒兔。撰文：王連連

■餵兔仔食嘢的麥貝夷，大呻Cupid不喜親近主人。

鍾一憲和麥貝夷合唱情歌聽得多，但他們的寵物卻唔多夾，鍾一憲養的兩歲長毛芝娃娃狗女Master，與麥貝夷兩歲的惡霸兔仔Cupid並不夾，早前他們帶寵物出來做專訪，明顯未能好好相處。鍾一憲笑言Master其實是隻「公關狗」，他說：「佢好識do㗎！勁識同人相處，個個朋友嚟我屋企，就算第一次見佢，佢都好鍾意同我嘅朋友玩，搞到朋友唔捨得走，我懷疑佢前世係做公關。」

■鍾一憲的愛犬Master愛與人接觸，更愛與主人嘴對嘴。 兔仔咬主人

相反麥貝夷所養的兔仔品種是獅子兔，Cupid跟一般兔仔性格差不多，較害怕接觸陌生人，但對着主人，Cupid仍滿有個性，麥貝夷嘆道：「最初養佢諗住佢個樣咁可愛，就改Cupid個名，諗住佢好似愛神咁sweet，點知佢好惡㗎，喺屋企會喺我房霸地盤。有次媽咪入我間房，佢以為有人入侵，就咬我媽媽隻腳。佢唔易同人接近，我養佢咁耐，都係上星期先同我親近，我有時錫佢佢會擰轉面，搞到我好無奈。用腋窩夾住佢瞓覺，佢又會咬我。佢好多嘢都咬㗎，我好多衫都俾佢咬爛。」
訪問當天，麥貝夷用了新手袋來載Cupid出街，但不到三小時，手袋的拉鏈已被Cupid咬爛，破壞力果然驚人！難怪麥貝夷指Cupid是憤怒兔。雖然Cupid脾氣較大，但麥貝夷講起牠的頑皮事也樂得哈哈大笑：「佢好鍾意跳上床㗎，又鍾意屙屎屙尿，最近Cupid喺我張被度屙尿，搞到被有尿迹，但呢排天氣太凍，所以我未拎去洗。」原來麥貝夷養Cupid前養過另一隻兔仔，試過帶兔仔到狗餐廳影相，可能牠見到太多狗受驚過度，翌日便去世，現在麥貝夷養Cupid就不會讓牠跟其他動物接觸太多。

愛犬偷酒飲

食物方面，很多人吃的東西不適宜小動物食用，尤其養狗更要特別注意，但鍾一憲指Master很為食：「佢會偷酒飲，見過佢飲咗一啖後，以為佢會嫌味苦唔飲，點知佢繼續，佢又鍾意食辣椒蒜頭。」在鍾一憲眼中，Master是百厭星，有時真的被牠嚇倒，他說：「佢好鍾意玩，有次帶佢去沙灘玩，佢一支箭衝入海，點知一個大浪衝上岸，即刻唔見咗佢，搞咗好耐先搵得番佢。嗰日我同佢都嚇親，即刻抱住佢一日啦，之後佢見沙灘都驚。佢咁細隻，但又撩大狗玩，有次佢見到衞詩隻大狗，又衝埋去搞人，嚇得我即時拉住狗繩。」

暴躁獅子兔

麥貝夷養的兔仔Cupid品種是啡、黑、白混色獅子兔，性格暴躁，不會主動親近主人，最近才讓麥貝夷親親。有時麥貝夷想摸Cupid，Cupid會用手撥開她，場面搞笑也令她感無奈。

長毛芝娃娃

鍾一憲的狗女屬長毛芝娃娃Master，朱古力毛色較罕有，現時兩歲大。鍾一憲知道寵物店店主想用Master繁殖狗仔賺錢，遂足足用了三天求店主以一萬三千元賣給他，回家後他把小狗改了花名Ter姐。