航班在當地時間周二晚十時起飛， Kary同余文樂九時多至到達倫敦希斯路機場。兩人即時推住七大袋行李登機，唔搞退稅豪俾英國政府。
滾熱辣
余文樂 吳雨霏希斯路機場獨家 斷正與 Kary秘遊倫敦 余文樂機艙發爛渣
余文樂和吳雨霏（ Kary）爆出秘戀三個月，更被網友踢爆在上周一（ 18日）深夜飛倫敦，展開九日甜蜜歐洲之旅。
31歲余文樂血氣方剛，加上他 dry爆五年冇正印女友，面對擁有 40吋長腿的 Kary，相信共度完九個激情晚上，感情又進一大步。
本刊在倫敦希斯路機場獨家直擊「樂雨戀」回港。明顯 攰爆的余文樂發現有記者在場，不惜在機艙之內發爛渣， Kary則一直耷低頭，任由男友挺身護花。
余文樂 吳雨霏 Kary機場
余文樂和 Kary在情人節因為孖住到赤柱探訪吳君如，而令戀情曝光，但這對熱戀三個月的情人一於懶理，繼續甜蜜。上周一（ 18日）晚，兩人飛倫敦預支蜜月。
據知兩人先在英國的威靈頓拱門、 Central London、 Piccadilly及 Soho區遊玩，之後就轉到法國滑雪，最後再經由倫敦返港。旅程中余文樂幾乎無時無刻都戴黑超和帽子，但仍不時被華人認出，搞到兩人行街都十分避忌，不過總算是過了一個白色假期。
余文樂同 Kary被網友發現同遊倫敦 Soho區，但兩人早知行蹤洩露，所以連手都冇拖。
有內地 fans在希斯路被余文樂誤以為是記者，仲被他以粗口辱罵，認真慘情。
14日情人節，余文樂帶埋 Kary到赤柱吳君如家拜年，算是在朋友面前確認 Kary地位。同日 Kary上載了一束玫瑰花，唔講都知係余文樂送㗎啦！
《 Face》圖片
男黑面女微笑
本刊收到消息，余文樂同 Kary本周二（ 26日）在倫敦希斯路機場離開英國，乘搭晚上十時的航班回港，但兩人在九時多仍未出現。正當記者打算入閘時，余文樂和 Kary才一同乘車到達希斯路機場，不過余文樂警覺性甚高，他一下車已經左望右望，進入機場不久就發現了記者。
去到登記通道時，余文樂即時指住記者得戚地說：「我認得你，你係《忽周》 㗎嘛！」秘遊被揭發，余文樂全程黑面，和 Kary只是並肩而行。而 Kary雖然全程躲在余文樂身旁，但她亦不時嘴角流露甜蜜笑容，明顯對男友的護花行為甚為受落。
由於遲了搞 check-in手續，余文樂和 Kary雖然都是坐在商務客位同一行，不過兩人之間就隔住條走廊。因為知道記者在場，余文樂亦多次向空姐投訴，企起身向空姐示意：「 Paparazzi， keep shooting me（狗仔隊不停影緊我）！」而 Kary就一直耷低頭。
周三（ 27日）下午五時多， Kary同余文樂抵達香港機場等行李。最初余文樂仍然黑面， Kary收到風閘外有記者守候，在等行李的二十分鐘內，不時講爛 gag𠱁余文樂，成功呵番男友。
出閘後， Kary冇回答記者提問，而余文樂就大耍太極。問他有否同 Kary在酒店同房時，佢就話：「酒店有好多房。」問佢 Kary係咪追唔到周柏豪至追佢？佢呢次識答：「我正好多！」有女友呵護，心情好番。
Paparazzi， keep shooting me！（真實對白）
一上到機，余文樂就企起身向空姐投訴記者：「 Paparazzi， keep shooting me！（狗仔隊不停影緊我）」估唔到余文樂英文咁流利喎！而 Kary就一直耷低頭，扮整理衣衫。
Kary去年首〈人非草木〉拉隊去台灣，拍外景拍咗 3日，但 Kary同身為 MV導演嘅余文樂就留咗 5日。
雖然想戀情保密，不過余文樂都忍唔住在 instagram大晒今次歐遊照片，一時係滑雪照片，一時係食物相，又大讚三文治好食。心情靚，乜都好食啲！
Kary愛潮人
出道十三年的 Kary，戀情不算多，最耐都係與網球王子洪立熙（ Brian）的一段情。不過， Kary揀親都係潮人，口味多年不變。
●潘世亨
Kary 06年被拍得與陳冠希拍檔潘世亨（ Kelvin Poon）出入千葉居香閨，因而傳出緋聞，但兩人的一段情很快無疾而終。 
●洪立熙
洪立熙與 Kary在 08年拍拖，經歷多次離合後，去年七月兩人被拍下同遊泰國， Kary才承認復合，不過復合三個多月又再分手。 
●周柏豪
兩人 11年被踢爆共度情人節，兩人四月一同出席活動時更以情侶帽示人，但周柏豪堅稱他們只是好朋友關係。 
●林德信
11年 Kary找來林子祥兒子林德信拍新歌〈我本人〉 MV，因而傳出緋聞。兩人否認戀情，但又表示樂意以情侶檔出席活動。
余文樂愛長腿
余文樂最耐的一段戀情，便是與長腿姐姐黃伊汶的五年情。 Kary亦出名有一對長腿，就算去年同𡃁模王璐瑤 send情慾短訊，余文樂都要 send自己對飛毛腿照俾女方，睇 嚟佢真係鍾意玩腳。
●盧巧音
00年余文樂出道時與年長七年的盧巧音拍拖，可惜姊弟戀只維持到 02年。之後盧巧音大唱〈好心分手〉，唱衰余文樂。 
●鍾欣桐
03年拍電影《一碌蔗》時，余文樂與鍾欣桐傳出緋聞，後來更與鍾欣桐另一緋聞男友陳冠希發生「撞膊事件」。 
●黃伊汶
黃伊汶與余文樂同一公司，兩人 03年撻着。有傳 08年余文樂在日本攬女被黃伊汶的好友目睹，黃於是怒掟余文樂。 
●舒淇
兩人去年在微電影《情謎》中合作，之後在微博中互相傳情，余文樂更指自己在「姊弟戀」方面有經驗。
先溝柏豪再𠝹樂仔
周柏豪同余文樂份屬好友， Kary同余文樂行埋，周柏豪更被指是撮合的媒人。
Kary多年來一心覓個靚仔男友，眼見與「網球王子」洪立熙拖拉多年一直冇結果，已經決意換男朋友。最初她的目標，原本是余文樂好友周柏豪。
「 Kary知道老友邢嘉倩（邢李㷧女兒）同周柏豪 friend，所以不時叫佢帶埋自己出席周柏豪有份出現 嘅聚會，實行主動出擊。同周柏豪熟絡 咗之後， Kary仲不避嫌成日捧場，睇周柏豪有份 嗰隊『橫洲工業』籃球隊練波，又遞水遞毛巾，大獻殷勤。就係咁， Kary至識到同周柏豪係隊友 嘅阿樂。眼見周柏豪無動於衷，一心獵靚仔 嘅 Kary咪轉攻阿樂囉。」
自從去年被爆出同𡃁模王璐瑤的情慾短訊事件，余文樂一度修心養性，對女仔埋身亦甚有戒心。不過 Kary勝在主動，杜汶澤在棟篤笑亦踢爆余文樂都讚過 Kary索，男有心女有意。
「 Kary本身有名氣有家底，阿樂自然唔驚 Kary係想借佢上位。 Kary都好主動 㗎，佢舊年十月特登搵阿樂做自己首歌〈人非草木〉 嘅 MV導演，等自己同阿樂 喺台灣對足五日，兩人朝見口晚見面， Kary卒之撻着阿樂囉！」
早前余文樂拍《特種救援英雄》時，表示過壓力大，令他身心俱疲，他更自爆：「可能長期在外地工作，真係有啲寂寞，希望有段好姻緣。我係正常人，識唔到女朋友係我問題。」開晒口話自己有拖拍至係正常。
攜情侶喼抵港
為 咗保持低調，兩人最終都係分開兩邊閘走，不過余文樂見 Kary攞行李辛苦，都有幫下佢手。兩人合共七大件行李，當中各有兩個新買的行李袋，四個喼款式一樣，只係手抽位置略有不同，似係情侶喼。 
周三下午五時多，兩人回到香港機場。等行李時， Kary見余文樂一直黑面，特登講笑𠱁男友，余文樂終於都忍唔住笑 咗出 嚟。 
出閘之後，面對大班記者， Kary冇回答提問，只係話自己 嚟緊會錄歌。不過佢全程春風滿面，對戀情曝光極為開心。 
回到香港機場，余文樂俾女友𠱁完笑番晒，仲向記者耍太極，同喺希斯路機場時兩個樣。
Kary重情黐身
唇厚在相學上就代表重感情，以潮流嚟講就代表性感，加上一雙長腿，難怪余文樂 like。
麥玲玲師傅指出， Kary命格夫妻宮相沖，拍拖時多波折，加上面相唇厚，重感情，拍拖時非常認真，有點黐身，適合嫁外國人。至於余文樂的命格較弱，多姻緣，不過係「一個完咗至有另一個」，冇一腳踏兩船的命。玲玲師傅指兩人的戀情都幾「危危乎」，會受不少考驗，而且在蛇年兩人會多衝突，雙方需要極度的忍讓，戀情才有望發展下去。 
留言列表
{{ article.title }}
