媽咪姐
李安原來咁鬼馬
唔講你可能唔知，平時煲劇過日辰嘅媽咪姐，年年好似追劇咁，追住奧斯卡頒獎禮嚟睇㗎！都係嗰句， C9都要與時並進嘅。
李安用咗 4年時間拍《少年 Pi的奇幻漂流》，壓力勁大。不過，最終佢憑呢套戲得到「最佳導演」獎，上台致謝辭時，手舞足蹈，表情多多。梗係，第二次攞喎，人都放鬆啲！
嗱，今屆奧斯卡最多人講嘅，梗係李安再次技術擊倒史提芬史匹煲，憑《少年 Pi的奇幻漂流》第二次奪得「最佳導演」殊榮。不過呢，我媽咪姐係 C9仔，睇咗成晚最記得呢句啫——「多謝我妻子 Jane，到了今年夏天，我們結婚 30周年了，我愛你！」嘩，相比起 7年前，佢憑《斷背山》攞「最佳導演」嗰時，喺台上多謝晒台灣、香港及中國嘅人（係，唔知點解包埋香港？媽咪姐都覺得好榮幸！），但就無點名多謝一直對佢不離不棄嘅太太林惠嘉。今次李安真係鬼馬嘞！失驚無神冧死人。搞到喺台下嘅李太，即刻喊咗出嚟。
正如《少年 Pi》裏面有一句對白係咁講嘅：「人生到頭來就是不斷地放下，但遺憾的是，我們卻來不及好好地道別。」都話愛要及時！幸而李安天縱英才，有第二次機會企喺奧斯卡頒獎台上，講一次「我愛你」啫。講真，我哋女人有咩求吖？咪就係咁簡單嘅三個字！
P.S.睇奧斯卡，又點可以唔睇埋紅地氈上嘅靚衫呢？陣間記住揭去 p.92頁，望真啲啦。 
李安攞獎後，連走 3場慶功宴，忙到連飯都無時間食，要助手去快餐店買漢堡包同汽水俾佢轉場時，喺街上邊行邊食。美國時尚雜誌《 Variety Fair》仲讚 58歲嘅大導食得好 cute㖭！
太太潮起來
今年
睇番 06年嘅紅地氈相，發現李安個 look無乜點變，係白髮多咗啲啫，但太太林惠嘉嘅衣着品味就有大幅提升！從昔日着闊褲搭幼帶涼鞋嘅阿太 look，到今日着修身窄腳褲配 open toe高跟鞋，有型又潮，掂！
內裏 open
李安爸爸李昇做咗台南一中（國立台南第一高級中學）校長 12年，李安亦係校內風頭躉！你睇佢着住泳褲影相，仲同另外 4位同學自封「力扛五怪」（壯男咁解！），笑得幾有自信兼 happy！ 
年青時嘅李安，對大鵬展翅 pose真係情有獨鍾，喺美國伊利諾大學戲劇系畢業時，又重施故技，再加多招金雞獨立，死未！
表面斯文
不過，當李安靜落嚟，乖乖哋影證件相嘅時候，完全係有為青年樣。青靚白淨，有啲星味㖭。
家族顯赫 人生多變
人紅，自然俾人翻舊賬。最近喺網上就瘋傳一段有關李安嘅家族歷史，話說佢爺爺李飛鴻係江西大地主， 49年後被批鬥，爸爸李昇唯有淚別妻兒，逃去台灣。有人就叫李安拍番呢段家族血淚史出嚟！話奧斯卡獎都可能有得再攞喎。
李安係家中長子（右），上有兩個姐姐，細佬李崗（左）亦係導演，上年憑短劇得到台灣金鐘獎。不過，李父李昇最初極反對個仔讀電影，後來先俾李安熱誠打動。
83年，李安同大學同學林惠嘉喺美國結婚，父母飛去觀禮。婚後李安試過失業 6年，靠讀生物嘅太太做研究員養家，並育有兩子。李太諗過離婚㗎！「但後來想通了，他又沒有做不好的事，我怎可以因他沒有工作，就對他不好？」
留言列表
{{ article.title }}
