好姨廣場
素顏買生果發現記者 容祖兒 速逃
好姨都好明白，女人當然希望自己以最靚姿態示人，尤其係女藝人就更加緊張自己個靚樣，始終都叫做食面口飯，萬一素顏樣嚇親人就真係有好大影響，不過好似容祖兒緊張到本來開開心心去「濕平」，點知發現好姨就即時急急腳走人，就似乎誇張少少囉！
話說早幾日好姨經過中環ifc時候，發現樂壇天后容祖兒一個人去超市掃貨，可能因為新年holiday mood未過，加上又唔係開工，所以就俾皮膚好好休息，實行素顏出巡，只見佢當日似乎對生果特別有興趣，推住車仔密密睇生果。
本來容祖兒開開心心咁去「濕平」，點知當佢揀到最興高采烈時候，就發現好姨蹤影，而一向態度友善佢，竟然即時好無奈，最後仲連車仔同生果都唔要，急急腳離開超市，仲邊行邊催個司機stand by接佢，總之要出到商場門口就要即時上車，之後佢見到保母車，就一支箭咁標上車離開。好姨直覺話我知，當日因為容祖兒素顏上陣，所以先至變得特別敏感。
之後好姨返到屋企，又循例上網八，去到李克勤微博，發現原來當日容祖兒「佳人有約」，不過就唔係同「情人」劉浩龍，而係去李克勤屋企拜年，當日仲有老友黃偉文同「阿姐」汪明荃，老中青聚首一堂，睇當日容祖兒應該係趁去克勤屋企前，專登抽空去超市買生果，點知俾好姨搞亂檔，好姨真係要同四位講聲「唔好意思」！
全站熱搜
留言列表
{{ article.title }}
