單人訪
輸人唔輸陣 張美妮
上周三，我在 facebook內看到朋友寫了這樣的一則留言：「點解需要有新電視台？睇下無記 8:30套《戀愛季節》同 9:30套《心路 GPS》，兩套劇都係講電視台，兩套劇都係講真人騷，兩套劇主角都係叫 Summer！真係火都嚟！」
以上意見我好 like， like到決定原文照錄。不是嗎？單看《心路 GPS》，少年往農村生活十四日後改過自新，我以為自己在看星期日檔案之鐵窗邊緣。
偏鋒至此，俾你做到主角又如何？所以，我看好張美妮那條線的劇情。一家幾口住公屋，老公不解溫柔，奶奶吵吵鬧鬧，柴米油鹽婆婆媽媽，但起碼叫「現實」！
做人最棹忌脫離現實，張美妮向來有自知之明。女主角輪不到她，難得今回戲份少有地吃重，立刻打個電話來。
是，今次是張美妮主動提出做訪問，並主動以性感衣飾配合。
「我從來唔係被力捧嗰批，凡事都要靠自己。依家終於開始有啲機會，而自己又真係有努力過，如果宣傳配合唔到，咁咪好唔抵？性感得嚟靚我絕對接受，唔通睇你着樽領？」
不是女一，但張美妮比很多女一坦蕩可愛。輸人唔輸陣，就是這個道理。
各有前因
張美妮參加 99年第十三期藝員訓練班入行，跟她同期的，有林峯和楊怡。未畢業，張美妮已被派入《閃電傳真機》（後成為《至 NET小人類》），她的起步，比誰都快。
「可能監製見我頭腦簡單，應該適合做兒童節目。我沒有甚麼野心，樂觀又易滿足，的確是比較低 B那個。」
做了四年兒童節目，開始做旅遊特輯，眼界闊了，才漸漸有點想法。
「在兒童組那幾年很開心，但認識我的只是小朋友。旅遊節目播出後個個以為我是新人，突然多了人認識，才知道黃金時段的重要性。我雖然野心不大，但未至於想一世做譚玉瑛姐姐。」
同班同學陸續拍劇上位，張美妮則主持《娛樂大搜查》和《東張西望》。昔日大家平起平坐，如今已明顯有上下把位之分了。
「對住阿怡和阿峯，真的完全沒有尷尬，因為大家實在太 friend了。阿峯見到我，會主動答多兩句：『美妮過嚟，點都同你傾咗先！』遇上阿怡和其他女藝人在一起，我會刻意繞到她身邊做訪問，在鏡頭前阿怡就是站在中間那個主角位置了！我想她心裏應該是知道的，因為我每次都這樣做，有時實在太明顯了，真有點低能……」她大笑。
她起步快，只是進度慢，唯一令她甘於當個小主持的，是可觀的外快。
「做主持形象正面，多了很多額外的司儀和品牌代言工作。 SARS後爸爸的餐廳結業，我要幫手供樓，這筆錢正好夠我負擔家裏的開支。當時沒有渴望拍劇，因為知道拍劇賺不到那麼多錢。」
她樂天知命，深明自己不是女主角的料子，因此只有羨慕，沒有妒忌。
「阿怡拿了視后之後，我才開始認真地想，原來自己都幾羨慕佢。她比我冷靜、 EQ又高，自己做好本份之餘還會顧全大局。而我以為只要背熟劇本便 OK，付出的努力根本不夠。所以，還是各有前因莫羨人。」
當年的張美妮和楊怡，分別站在監製潘嘉德旁邊，後排男生還有林峯、楊明、趙永洪和徐榮等，際遇各有不同。
同是兒童節目出身的美妮與麥包，原來十三年前已結緣。《蘋果日報》圖片
柳暗花明
09年《東張西望》換血，張美妮試過三個月無工開，嚇個半死。
「入行以來從未試過一天無工開，突然好無安全感。幸好三個月之後藝員科打來：『美妮，嚟緊有個角色想搵你，但冇乜戲嘅，希望你唔好介意，因為你仲 under騷……』我以往是爆騷王，但那時欠公司六十個騷！其實公司叫我做甚麼，我都要做。」
那個「冇乜戲」的劇集叫《 Only You只有你》，張美妮做個行行企企的接待員，好幾場戲甚至零對白，跟茄喱啡無異。
「好難受，我在綜藝科那邊都叫做有少少知名度，好怕自己愈做愈低，打給朋友哭訴。但原來這世界柳暗花明，劇集去到最後居然寫了一條感情線給我和陳宇琛。雖然只是匆匆交代，但明顯臨時加插的，監製對我真的不薄。」
這幾年張美妮也不是沒戲做，但角色沒有令人留下深刻印象，更別說討人歡喜。很多比她遲入行的都上位了，根正苗紅訓練班出身的她反而一直未有機會做「親生女」。
「 07年曾跟公司傾過簽經理人合約，但我當時開的價錢是基本人工再加出面外快的總和。可能是我獅子開大口，傾了一次便沒有再傾了。當時因為要幫屋企供樓，收入必需要有這個數目，但又不跟公司講清楚，蠢呀！現在都好後悔，如早幾年做了『親生女』，機會可能已不一樣。」
《娛樂大搜查》主持常有機會出埠，張美妮便試過到澳洲訪問陳豪。
妲己熱情奔放，張美妮脫胎換骨之作。
《心路 GPS》飾麥包老婆，家嘈屋閉那種。「我老作咗本日記，幻想以前同麥包拍拖嘅日子，寫完之後反覺自己更加容易投入角色。呢啲功課導演冇要求，但做咗之後真係會唔同。」
招數不及人
她甚麼都後知後覺，去到廿七、八歲，才叫真正開竅。
「我的『招數』真的不及很多人。以前做飲食節目，夠膽死穿樽領；出席活動時又不懂得製造話題。現在的女仔行出來無論衣着與精神面貌已是一副戰鬥格，平時跟我一點不熟的，一見有記者在場立刻跟我擁抱，記者見到兩個女仔又攬又錫，當然立刻影相啦！記者會一完我通常即走，但有些女仔會『坐多陣』，博記者行過再傾兩句……以前的我很自我封閉，怕瘀又怕核突。這幾年我發覺主動的女仔上位的確快好多。現在已比較放開自己，衣服穿性感一點，其實無壞；行埋記者度傾兩句，又使乜驚呢？適當的 social其實好重要，再有才華，也需要人脈。」
張美妮將踏入三十五歲，近年才知道要發憤圖強。早前的《瘋狂歷史補習社》，她飾演妲己，瘋狂程度真的叫人拍案叫絕，連曾志偉也親自打電話稱讚他。
「開工前我有三天假期，買了這十幾廿年來周星馳、吳君如、毛舜筠的喜劇來看，學他們的節奏。原來，有做功課效果真的不同。最開心是『獎門人』（曾志偉）打來，他說：『好多人讚你做得好，努力係一定會有人睇到嘅！』我突然醒覺，即是說之前我根本未夠努力。原來得人認同嘅感覺係咁正！」
後知後覺，總好過不知不覺。雖然大部分觀眾不明《心路 GPS》所指為何，但不怕你罵，最怕你無 noise。張美妮飾演的惡家嫂，分分鐘以黑馬姿態跑出。
「我自己知自己有幾多料子，視后應該無我份，但也希望做到大家認同。像羅敏莊吧，她也是默默耕耘然後深得大家認同那種。我這年紀已不能跟後生女爭一日長短了，襯林峯是無可能了，但總要有人襯麥包吧？」
美妮有一妹妹，在沙田區長大，一家四口屬小康之家。爸爸曾經營餐廳，結業後做回打工仔，現為另一餐廳的經理。
師奶仔
不說不知，原來張美妮曾簽 Silly Thing，與吳日言同期，這個短髮造型，就是當時所剪。「佢哋冇話捧我，只係經理人形式幫我接 job。」之後經理人部門解散，張美妮成為「孤兒仔」至今。
現實中她感情狀況穩定，與髮型師男友拍拖五年。她年前開始入股男友生意，現已是六間髮型屋的老闆娘。
「是他讓我掹車邊做小生意。我的投資好少，可以幫手的只是約記者去影相，做點宣傳。以前一直不認拍拖，因為關係未穩定；現在他應該是結婚那個。」
兩人計劃兩年內結婚，她母愛氾濫，打算立刻要小孩。
「他比我大九年，屬成熟穩重型。真的很不同呀，舉個例，我嗌凍，換着年輕的男朋友可能會說：『 BB過嚟攬住啦！』當下會好窩心，但其實無實際幫助。他不同，當下不會說甚麼，第二日會買個暖爐回來放在你身旁。我只是個師奶仔，這些已很足夠了。」
男友 OK喎！
男友 KK Wong，兩人外形非常合襯。
這次是張美妮入行以來影相尺度最大膽的一次。
她說，原來感覺良好。
「我好 enjoy！趁青春留倩影，有得 show唔 show，唔通等五十歲先嚟性感？」
今次義無反顧，因為拿了免死金牌。
「我男友又 OK喎！可能佢做嗰行都係幫人扮靚，佢情願我性感得嚟靚，好過密實得來烏 wear。
佢覺得拖住個靚嘅女朋友出去會好有面！
早知早啲咁打扮啦，條路可能已經唔同……」
一早行性感，路當然會不同，但可能又未必識到現任男朋友呢！
各有前因，男朋友這方面，也許輪到楊怡羨慕你喇美妮！ 
下期預告：最佳男配角 
撰文：林蕾
攝影：袁家樂
協力：李梓軒、林碧洋
錄像：湯文峯
化妝： Jun Chan
髮型： Jerry Lee@Sigo Hair Salon
形象： Bryan@the Flaming
服裝： Ted Baker
留言列表
{{ article.title }}
