不滿遭冷待
八月即將約滿無 綫的羅敏莊，日前無奈表示自己在無 綫 嘥咗十幾年青春外，同時鬧爆無 綫「冇 job做但就追還騷債」，簡直匪夷所思。
娛聞樂
炮轟無綫刻薄 羅敏莊：我嘅青春俾晒佢
為反擊王維基的「香港電視」，最近無綫積極捧選美派上一線，兼以高價搶外援、舊將回巢拍劇。
可惜一個餅仔分唔勻，二、三線藝人繼續受忽視，頓生去意。
日前，捱足 13年的羅敏莊向本刊炮轟遭無 綫冷待，指自己即將約滿，卻冇任何人與她聯絡傾續約之事。
羅敏莊心灰意冷說：「最搞笑係呢頭追我還騷， 嗰頭又冇 嘢俾我做，我嘅青春俾晒佢（ TVB），結果都係得個吉！」
38歲羅敏莊，効力無綫 13年，拍過廿多套劇，但套套配角冇乜發揮機會。據知羅敏莊與無綫的藝員合約為兩年制，一年 60個騷，將於今年 8月約滿。不過去年中她意外懷孕，其間冇劇拍坐冷板，僅間中在綜藝節目做嘉賓，結果一度欠無綫過百騷。護妻心切的陳國邦，日前亦忍不住公開指摘無綫：「 Mimi（羅敏莊）唔夠騷要還，我覺得呢個制度要改善。唔係佢推 job，係冇監製搵佢拍劇，如果要佢還騷就唔公平。」
專心湊女
去年 11月，羅敏莊開刀誕 7.3磅 B女，但產後不足一個月，即收到無 綫電話叫她還騷債。她坦言此事令她萌去意，日後男主外、女主內，羅敏莊表明會專心湊女。
坐月收還騷 cal
老公陳國邦有怨言，當事人羅敏莊日前亦向本刊記者大發牢騷：「事實上我佗 BB嗰陣，都有打過返公司問有咩俾我做，但佢哋又話冇 嘢啱我做。點知我未坐完月，無綫就有人打嚟搵我：『你爭公司百幾個騷，要快啲返嚟開工喎！』喂！我覺得佢 哋有 啲打橫 嚟，依家唔係我唔肯做，我咩都可以做，你叫我做路人甲都 ok㗎。我一直都 standby喺度，係你 哋冇搵我。到依家我就 嚟完約，先走 嚟叫我還？」
提到還騷，羅敏莊揶揄自己似還錢俾邦民：「其實你問我仲有冇 heart去演戲、做節目，我諗呢刻真係冇乜。我依家每個禮拜淨係做《今日 VIP》同《都市閒情》還三個騷，每月還到十二個。到完約 嗰日都應該還唔晒。剩番落 嚟 嗰 啲騷，唔通要我逐個監製去𦧲佢哋俾嘢我做咩？我真係煩到頭都大！
同無綫未傾約
開騷望上位
在《超級巨聲》節目中，羅敏莊歌藝一鳴驚人，去年更食住個勢在伊館開處女騷。對此，羅敏莊自爆當時以為日後條路會易行 啲，結果空歡喜一場。
代夫出頭
陳國邦在無 綫頒獎禮中，敗給古明華而失落男配角獎。事後羅敏莊坦言不滿公司冷待老公陳國邦，但她承認之後遭無 綫高層勒令收口。
做騷還債
為了還騷債，羅敏莊生完女冇耐，便狂做綜藝節目，除了做《今日 VIP》和《都市閒情》外，早前更孖實老公上曾華倩主持的《滿 Fun情趣鬥登對》節目。
樂小姐：遲啲會搵佢
就羅敏莊未收到續約通知一事，本刊問過無綫製作部總監樂易玲，她解釋：「非經理人合約藝員，一般會喺約滿前一個月先傾嘅！不過我之前都有搵過佢，佢當時好多諗法。（不過唔少藝員都係約滿前一年已經傾約喎？）有啲有潛質可以力捧嘅藝人先會一年前傾約……不過我遲多兩個月會再搵 Mimi傾。」
談到羅敏莊沒有劇拍兼欠騷情況嚴重，樂小姐直言：「佢有 BB前，都有監製想搵佢拍劇。不過佢經理人俾個期表密麻麻，最後監製都打退堂鼓。據我所知佢冇爭一百個騷咁多，況且我哋都有安排佢主持《都市閒情》同《今日 VIP》，我相信佢唔存在欠騷。（如果約滿時還唔晒騷，無 綫又冇搵佢續約，咁羅敏莊使唔使還錢？）呢個唔講啦！」
樂易玲拆彈
對於羅敏莊離巢前炮轟無 綫，日前無 綫高層樂易玲亦大加安撫說：「遲 啲我 哋一定會搵佢傾！」 
王維基旗下的香港電視，盡擸無 綫甘草和實力藝人，對於有冇搵羅敏莊過檔，王賣關子說：「總之有實力 嘅人我 哋一定會搵。」
瞬間一爆
95年，羅敏莊以歌手身份入行，更出了 13張個人專輯，直至 00年，她與無綫簽普通藝員合約至今。其間演技和歌藝同樣得到外界認同，可惜都只是曇花一現。
配角彈出
08年，羅敏莊在《古靈精探》飾演探員「美人」，演技生鬼，得到不少讚賞。翌年開續集《古靈精探 B》，她亦有份演出。
唱功獲讚
10年，羅敏莊以嘉賓身份在《超級巨聲》與參賽者合唱〈挑戰者〉，好評如潮。評判倫永亮更大讚：「我好希望現今香港樂壇有多啲羅敏莊呢類型歌手！」令她當場喊爆。
唔夠騷要賠錢
無綫的藝員合約是行「底騷制」，所謂「底騷」，是以底薪形式分十二個月支付，如爆騷者則額外獲得騷錢。據知昔日藝員就算完約時做唔夠騷，無綫也會隻眼開隻眼閉一筆勾銷，但自 2010年六嬸方逸華接替六叔出任行政主席後，藝員合約即加入新條款，若藝員未能做夠騷，續約與否都要事先賠錢或連續幾個月冇糧出還騷債，不少藝人曾批評無綫此做法不公平。
無綫台柱薛家燕雖然年年爆騷，但她也戥「冇糧出」的同事陰功：「係有咁嘅事，不過冇計啦，好彩我有電台做埋，如果得 TVB一份人工真係好慘。」 
早前與無綫續約的李國麟，亦開腔批評無綫做法有問題：「我見過有同事因為唔爆騷，續約後還騷俾公司，等於白做，搞到日日開工捱麵包！」 
去年 2月過檔王維基的元華更身受其害：「無綫好多藝員都要還騷錢，我都唔例外，真係好慘，靠佢份糧死得！」 
留言列表
{{ article.title }}
