他後悔遲了做《紙筲箕》，好多老店都已消失。「這地盤以前是冠男酒樓，現在都無法做記錄。」

People

捍衞筲箕灣

2013年03月01日 ~~ 第918期忽然１周

80後的黃敬業（ Issac），在筲箕灣土生土長。
眼見大部分地區相繼被大型連鎖店、地產舖、藥房、自由行攻陷，一間間老舖小店從地平線上消失。
他決定披起戰衣，出錢出力自資創辦地區報《紙筲箕》，誓要捍衞筲箕灣這片本地人淨土，把舊有情味文化留低。

前年 Issac跟朋友吹水，說想找些事情做。朋友知他懂設計、想寫作、愛筲箕灣，建議把三者結合搞份區報。當時，他沒衝動，直至去年，眼見幫襯了幾十年的涼茶舖變成美聯。「真係火滾，覺得要快啲做嘢，唔可以等。

他開辦的補習社亦是辦報地方，但快結束。員工都是義務的。

他外表像學生，提到地產霸權即變憤青。「買家出手好豪，二千萬買你間舖再好貴租出。租客點做？通宵賣魚蛋粉都唔掂！惟有做美聯！件事唔健康咪喺呢度。」

周圍都有南記

90後拍檔 Miu Miu，是珠海新聞系學生，負責寫稿和攝影。她住將軍澳，覺得件事有意義，故幫忙。「八、九十後都有不成熟，但政策唔 OK，我們會出聲。記得訪問棉胎舖老闆，佢好灰，全個訪問叫我們要珍惜，話後生唔識珍惜舊嘢，但我識喎！」

「自小喺東大街長大，覺得條街近年變化好快，多了 office客和外來人，再唔係純住宅區。以前東大街無連鎖店，現在有南記、泰國人海南雞飯。對我嚟講，有無搞錯，筲箕灣都有南記！好主觀㗎，就係唔鍾意喺筲箕灣食南記，周圍都有，無特色。
「以前東大街有間經典快餐店叫威尼斯人，污糟邋遢但好吃又平。有間文具店，老闆娘出名惡無禮貌，但就係有特色。
「我唔係一定要保留舊嘢，但每區要有獨特性。東大街有間小店，老闆係區外人，半途出家學煮嘢，只懂煮星洲叻沙、澳門咖喱、台灣手抓，間舖就叫『澳門叻沙咖喱手抓』，把三樣會煮的嘢 pat喺招牌上。但我欣賞佢，令條街特別。」
社會發展不就是這樣？「我都知是不能逆轉，但想做啲嘢保留住現在呢份精神面貌，或盡量在未消失前做記錄。」

80後愛舊嘢

他自資跟朋友創辦《紙筲箕》，採訪拍攝寫稿排版一腳踢，介紹區內特色文化、老舖小店。曾報道舊式理髮廳、棉胎舖、冰室。新年一期就印揮春送街坊。
但做訪問，都有舊舖老闆唔好傾，有伙計趕他們走。「後來發覺，對舊嘢的 obsession（着迷），可能是屬於我們的。我們八、九十後有種情懷，會留戀舊嘢。」
唔係吖！「係，係真的。我哋會消費，想買新嘢，但對上一代的 heritage（遺產），有種保育傾向，唔鍾意拆舊嘢。我屋企的正方形掛鐘，未出生就有，仲用緊。
「但五、六十年代出生，或我們的父母，只求方便，最重要唔貴，未必能分享這份對舊嘢的熱愛，可能只覺得係 shithole（屎坑）。」

facebook上 fans讚。

卡片上註明「筲箕灣水上人」。

我是水上人

《紙筲箕》隔周五出版。他們就在筲箕灣地鐵站附近免費派街坊。

Issac是水上人， 3歲前在艇上住，試過多次跌落水，要媽媽、爺爺跳落海救他。後來搬上樓，跟無數小朋友一樣，返學補習去公園玩長大結婚，只是他一直都在筲箕灣。他對筲箕灣水上人這身份特別認同，卡片上亦註明。
「筲箕灣水上人唔多，二百多艘艇，好多都係親戚，嚴格來說，只有幾個家族。後來上樓，後生又搬走，但仍然好 close。有自己文化的 signature，我哋是水上圍村。有人話聽唔明水上人講嘢，我哋自己聽得好明白喎！
「我鍾意呢區，因為好多水上人，有種味道，但現在似乎在消失中。」
他曾報道筲箕灣漁民不准拖網捕魚；又在研究筲箕灣海岸線的變化，打算遲些刊登。「這些記錄才有意思，唔好做埋嗰啲：日後豎個牌喺度，話筲箕灣曾是漁港，仲有條假魚！」
但曾作為漁民的家人，對他做的報道儘管知道，但從不看亦沒批評。

我支持雞蛋

他是陳雲信徒，稱呼陳雲為老師。陳雲來筲箕灣訪問他，認為老師是御駕親征。愛陳雲，因為「佢夠激，我鍾意。」

半年時間，《紙筲箕》已打出名堂。在 facebook有七百多人 like，連提倡香港城邦論的陳雲都找他們做訪問，地鐵在筲箕灣站搞展覽又請他們做採訪。 Issac近期經常接受媒體訪問，他更有個理想：「筲箕灣現在仲好健康，有少少空間有自己的獨特性，藥房仲係服務街坊。但當有天突然出現好多發晒光的藥房、月子公寓、低檔次酒店接待自由行，我就會為筲箕灣發聲。」
採訪時， Issac開的補習社打算結業。他已婚仍未找到工作，每月要自資 3千元辦報，很多工作都是義務性質，他仍樂觀。
「正如村上春樹的名句：在高牆和雞蛋之間，無論高牆是多麼正確，雞蛋是多麼錯誤，我永遠站在雞蛋那方。」