大盤雞$168

尋澄味

有緣遇上陝西風味　有緣小敍

2013年01月25日 ~~ 第913期飲食男女

相約幾個豬朋狗友齊齊「濕平」辦年貨，難得他們都專誠向愛到連體的太座「請假」，坐滿一架 7人車四圍兜，把入貨清單逐一處理。從新界的大吉大利買到旺角的家電用品，天黑搵地方開餐，從渡船角經西貢街去上海街，遇上了我一直想去，主打北方麵食和小吃的有緣小敍。

接近 10點，等外賣和等位的人仍然企滿門口，小店內又塞爆客人，見證了人氣的鼎盛源自好味的肯定。來自陝西的老闆娘阿玉三頭六臂，每日從上午開始，從未停手做到夜晚，由打麵條到樓面工作，事事都親力親為。家鄉的餃子和麵條，是北方人的食糧，阿玉堅持每日親手製造。
大過門口張摺枱的大盤雞，爆炒過的雞件，加入花椒粉、茴香、桂皮和八角組成的陝西家鄉調味，再加入切粒薯仔，炆到入味，淨食無得頂，撈麵更加醒。阿玉又介紹了我吃孜然羊肉。切得碎薄的羊肉，片片焦香，秘訣原來是老闆用火力有限的電磁爐細心爆炒；要把煎 pan燒到最熱，才落油慢炒，配粗樸的夾餅一齊食，似足老麥早晨全餐，豬柳漢堡夾鬆餅的共同理念。

西紅柿雞蛋麵$30

乳香雞翼$17

維他命 C爆燈的西紅柿雞蛋麵，是家常小菜「鮮茄炒蛋」的湯麵版，真材實料即叫即煮，酸酸甜甜，非常健康，是湯麵界的「老少平安」。人人都叫的乳香雞翼，醃味精闢而且炸得出色，浸入湯麵食，希望可以減低爆痱滋的風險。
脹卜卜的羊肉餃子，調味和餡料都豐富，除了提味的茴香籽和花椒粉，還有增添爽口的木耳和唐芹，配上自家製的招牌 Biang Biang麵，煙韌彈牙，食極都食唔完的長度，要搭消防雲梯至可以夾起。以陝西辣椒做膽、腳拖蒜茸、芽菜、炸蒜和葱花的油潑 Biang Biang麵，香氣傳千里，連隔籬枱的靚姐都千叮萬囑要撈勻先至好食。

孜然羊肉$68

羊肉餃 Biang Biang麵$36

有緣小敍
地址：佐敦渡船街 38號建邦商業大廈 3號鋪
電話： 5300 2682

少年食神林澄光（ Michael）
致力用金錢換無限快樂。 TVB、 Now TV飲食及旅遊節目主持人