媽咪姐

《古惑仔》失收 王晶死賴:太多戲分薄晒

2013年01月25日 ~~ 第913期 忽然1周

羅仲謙孭飛嘅《古惑仔:江湖新秩序》,開拍嗰時係威係勢,除引起網友熱烈討論,監製王晶仲信心十足,排期將電影同蟄伏 17年嘅《一代宗師》同日對撼。結果梁朝偉係咁意耍下功夫,就耍走成班古惑仔。截至周日( 20日),《一》收咗千四萬,而《古》只係收咗唔夠四百萬,輸得慘烈。

媽咪姐都睇過《古惑仔》,風味唔及得鄭伊健 17年前嘅原版咁地道,加上院商唔撐,好多戲院都冇上映,令票房更加失收。難怪飾演「山雞」嘅梁烈唯同媽咪姐呻:「票房咁樣我唔失望,唯一遺憾係我哋身為銅鑼灣揸弗人,但竟然銅鑼灣冇戲院上。」而孭重飛嘅羅仲謙就話:「我哋成班演員盡晒力,票房我哋演員控制唔到。」
至於事前自信可以同《一》片鍊過嘅王晶就解釋:「同期有好多西片,阿諾舒華辛力加都唔得啦!太多戲分薄晒!」喂,阿諾嗰套《終極封鎖線》遲你一個禮拜上映,王晶咪賴得就賴喎。


網友插爆
唔少睇過電影嘅網友都大彈選角唔掂,仲鬧王晶翻炒舊橋冇新意!




《古》片宣傳唔係冇,好似月初嘅首映禮之後,電影公司仲搞埋 after party造勢,可惜同日撞正《一代宗師》首映,結果唔使估啦!


電影卡士唔算強,所以羅仲謙同梁烈唯等成班麻甩都喺海報除衫引女性觀眾入場,可惜觀眾唔 buy。

 

arrow
arrow
    全站熱搜

    tvb4life 發表在 痞客邦 留言(0) 人氣()