撰文‧Irene
攝影‧陳縱宇
服裝‧Bally
場地‧Spasso
個子既不高大威猛，兼沒有玉樹臨風外貌的黎耀祥，
完全打破個人宿命，成為兩屆視帝，地位和收入雖提高了，
但他依然沒有一般巨星排場，並無髮型師、化妝師、助手跟身，
相反身邊只有一位身兼經理人、司機、褓姆、助手的賢內助在旁打點一切，
可見得獎後，他的生活依然。
在訪問的過程，由換衫、拍照做訪問，
祥仔都是分秒必爭，像要與時間競賽，不想浪費任何時間，
忽然間又想起《巾幗梟雄》柴九那句金句：「人生有幾多個十年！」，
做人真係要把握好每一分每一秒。
祥仔對此十分認同，人生同演戲一樣，希望大家多些經歷人生，
會否得到名利並不重要，重要的是能享受這個過程，
不要老是想要賺幾多錢，而係要感受身邊的一切！」
連續成為兩屆「視帝」的黎耀祥，外間人一定以為他水漲船高，工作多，身價高及收入多，但祥仔大方表示大家估計錯誤，其實他的收入反而不及第一年視帝後好，因為每間公司無理由年年搵你。不過，今年真係冇停過，以為《天天天晴》十月尾拍完，可以放兩個月假，但接住台慶、頒獎禮，十二月又《東華》、《仁濟》，《公益金》又要行，連《IQ博士》再出街，都搵他配音，又拍了一個《東部華橋城》旅遊特攝，總之TVB乜都關佢事，而家又要為《法證先鋒III》開工，幸好排除萬難下，都度到期在農曆年去美加登台，一來搵錢，二來又可以當放假去旅行，都算有幾日放下劇組的工作。
被無重用的祥仔，原本安排他做一個全新的遊戲節目，不過祥仔卻推了公司的好意。「每個星期我一日時間，劇組邊有可能放我一日？如果劇集和game show俾我揀，我寧願揀拍劇，我喜歡演戲多些，自己冇特別想發展乜野，我覺得演員就係演員，唱歌、登台係賺外快，主力都係做戲，可能有人得，自己認為會分心！」
—欠缺奮心—
在劇集方面，早前《大太監李連英》在節目巡禮播出的片花戲味十足，角色人選方面肯定非他莫屬，更可機會憑此劇三度成為視帝，「現時拍《法證》都會去到四月幾，暫時仍未收到風係邊個監製，可能都未必趕到今年出街，在我而言真係冇所謂，你叫我演街市佬都冇所謂，因為演任何社會上的階層人物或歷史人物，每個人都有一個故事，每個人都不是我的故事，就算你叫我扮演皇帝，都未必特別做得好或者挑戰大，要睇劇本點寫。我份人其實冇乜鬥心及大志，唯一原動力就是；諗到在生活中的細節、人性、觀感、視野放射在劇中人物上，我就會好滿足。
「曾經有人問我想演乜類型的戲？我真係冇諗過，俾乜角色都做，亦冇想過做導演，自己不是一個好有創作意欲的人，我只係鍾意感受，去感受那個過程，點解話自己冇鬥心、冇大志、冇理想，因為我不似有些演而優則導的人，不是有很多事情要表達，我只係想住去做演員就好滿足好開心。」
—角色揣摩—
扮樣似樣的祥仔，在揣摩角色的性格，原來有其獨門秘方，「我幾奇怪，係靠靈感，不會成日睇劇本，大約知道個角色如何，就會諗個角色會係點，創作過程我幾催眠狀態，不是真的催眠，只是幻想，假如你係度，當發白日夢，去到度會點，我係一個咁樣人又會點？假設，當曾經有個咁樣人和事，套入自己度，如果我係那個人，我又會感覺到乜？代入現實係咁樣，成件事會係點樣？成個節奏係點樣？劇本有好多空間冇寫出來，同埋寫不到出來，感覺要自己補充，點樣出來的人物會好真實。
「我有時去一間餐廳，見到某些人，那些人講說話幾得意都幾高調，自己就會諗對方做甚麼職業，觀察對方，對演員很有幫助，演員不止只是演，要準備要去幻想去諗，我會成個套餐做，亦好靠靈感，當中有個人觀感、親身經驗，演戲要立體，如果你只得單方面是不夠立體感。」
—高峰回落—
現時身處山頂位置的他，揚言沒有高處不勝寒的感覺，更不怕由高峰跌落平地，「我不認為紅了有幾巴閉，因為我的標準不在這裡，世界係咁，上完山就落山，有幾多個劉德華？譚詠麟？成個圈你數？紅三、四十年？有幾多個？就算發哥（周潤發）都曾經有一段時間都係回落，冇所謂，我接受的，我都做了廿幾年，有乜接受不到？有乜未見過？我面對不是紅不紅的問題，近幾年不介意自己紅不紅，有冇人識？加上近幾年很幸運，即使未有《巾幗》，我之前的角色，觀眾都鍾意，自己的成績已有，《西遊記》天蓬元帥、《楚漢驕雄》韓信、《秀才愛上兵》的青天狀師，都被觀察認同，作為演員已成功了，我認為在圈中不是用物質，或別人的標準去界定你的成就，因為市場同你的演技未必同步。」
事業在高峰位置的祥仔，亦有低潮的時期，發病期為三幾年出現一次，他解釋病因，「演員好受情緒影響，不是有冇成績或者紅不紅，係你拍了一個甚麼戲。我鍾意演戲，演戲等如生命的一部份，如果我做了一些冇意義的事，就等如浪費自己的生命，若拍些冇謂、無聊戲，好浪費時間，自己付出咁大心力去做，但原來機會都不是想像中那樣，就會想，不如算了，出去搵過第二份工，搵啖食算了！
「目前有少少成績，不代表我情緒好高漲，低潮期會想發展不好，我做做乜呢？仲可以有乜做？追求甚麼？演戲演到一個階段你就會諗，不是要紅些，或要搵多些錢，係演出質素方面的追求，對我來講，演戲不止是演戲，是思想上的探求，和出路。」
—醉心演戲—
演了廿多年戲的祥仔，曾經演過無數的角色，他可有擔心他朝有一日在演技上會出現「滑牙」情況？「我諗唔會，都有考慮呢個問題，好得意，當我發覺去做又冇事；當預備時會想，個角色會有乜突破？很自然又會搵到新意加入去。好似《法證》是演法證人員，是新嘗試，演戲係人生，演戲係藝術，亦係與生俱來，後生仔入行唔好諗一定要紅，要諗享受每一日去拍戲，享受你去做茄喱啡，你就賺晒，你唔好嫌TVB人工奀，幾舊水一個騷，要我返去企一日，企一日你賺一日，不是幾舊水，而係難得的人生經驗。你應該諗一間大公司俾緊機會你，係你的個人得，人不能總是想，一日能夠賺幾多錢？目前你就算給我一億身家，我肯定都係醉心去演戲，我真的很喜愛演戲。」
夫妻同心
當年黎太抱住囝囝與祥仔出席《西遊記》的宣傳活動，事隔多年，其子長大了，讀中一，再不用她抱抱，她由一個背後女人，做了丈夫的經理人頂上半邊天，黎太笑言：「雖然囝囝唔使抱，但每朝七點就要車佢返學，之後就處理老公的事務，我現時正為佢兩父子打工！」
黎太表面呻辛苦，但與丈夫看日落、談兒子的逸事時，流露的幸福之情，可見她捱得甘心、活得開心！
留言列表
{{ article.title }}
