一哥魚湯米線$24

尋澄味

潤喉魚湯米　一哥湯麵皇館

2013年01月11日 ~~ 第911期飲食男女

一連幾個星期，假期多，俾面派對更多。唔想去但又要焗住去的 party，地點不是酒店 ballroom就是私人會所。這種盛會，現場除了塞爆衣香鬢影等影相的閒人，還有大量有造型冇溫度而難啃的鹹甜小食；為免空肚飲酒，每次我都會自行食飽才出現。

大除夕夜要連趕幾場，第一個要去的晚會，地點在深灣遊艇會。比平日早出門的人不止我一個，慈善之王來電相約在香港仔，齊齊搵嘢食醫肚打底。本來想用熱奶茶和腿蛋治，去告別我的 2012，不過當保母車從香港仔海傍道左轉入香港仔大街，吸睛的是一間專賣魚湯粉麵的茶記，在 8℃的低溫下，還是熱辣辣的粉麵最實際。
坐滿街坊開餐的一哥湯麵皇館，現場的外賣電話響個不停，證明了人氣的鼎盛。每面牆身都貼滿圖文並茂的餐牌，除了常見的咖啡奶茶三文治，還有各種即炒小菜套餐粉麵飯。香到流口水的新奇士香橙肉排，賣相擺明是咕嚕肉和中式牛柳的遠房親戚，酸酸甜甜超開胃，最啱𠱁「奀挑鬼命」的細路扒飯。

生菜鮮魷泡粥$31

新奇士香橙肉排$50

兩款用鮮腐皮蘸蛋漿的炸物，是每人都叫的香口小食。似足國產花生酥的千層黃金，炸得鬆脆，伴茄汁和沙律醬調出來的醒神醬汁，一吃停不了口。另一款細細粒容易食的千層沙翁極盡罪惡感，外層撒滿砂糖，是各位住家媽咪值得偷師之作，最啱取代新正頭的炸角仔和煎堆一眾賀年食品。
飲完唔口渴的魚湯是一哥的招牌菜，每日用大量魚仔煲足幾粒鐘的魚湯，絕非來自勁賣廣告的濃湯寶，又或者強國發明的旁門左道「一滴香」。白淨又滑溜的魚湯，鮮味的主要源頭，源自水上人最愛的梭欏魚，與容易消化的粉麵絕配，面頭鋪滿切條魚片，還有大量菇菌、芽菜和蝦米，夾米線最有咬口，配幼滑掛湯的米粉，啖啖鮮甜，突顯魚湯鮮味。用招牌湯底即叫即煮的生菜鮮魷泡粥，面頭鋪滿重量級的生菜絲和唐芹絲，翠綠顏色和清新香氣，滋潤喉頭和皮膚，更有效減低心理上對膽固醇的恐慌，絕對是寒冬恩物。

千層沙翁$18

千層黃金$18

一哥湯麵皇館
地址：香港仔大道 223號利群南場地下 2號鋪
電話： 3526 0590

少年食神林澄光（ Michael）
致力用金錢換無限快樂。 TVB、 Now TV飲食及旅遊節目主持人