星悅居
收納魔術手 楊英偉
無綫藝員楊英偉在《法網狙擊》飾演謝天華、楊怡的上司，做事一絲不苟。現實中偉哥同樣是個井井有條的 family man，最享受煮飯同湊仔。
他與太太 Annie及 7歲兒子諾諾一年前搬到將軍澳日出康城 1,300呎單位，近返工亦近返學。
興趣多多的偉哥，雜物日積月累，為使居所不會變垃圾崗，靈機一觸在全屋牆身、地板等地方，設計多個收納儲物櫃！
「其實係我大舅（指楊太兄長）嘅功勞，佢做裝修，係咁意收我少少人工，就整到鬼死咁靚。」所以話出外靠朋友，在家當然係靠老婆。
楊英偉家居
在熱播的《法網狙擊》中，楊英偉飾演檢察官阿頭，經常與楊怡、謝天華有對手戲，戲份頗多。
百多呎的書房光潔整齊，以藍色、白色為主題的色調令人眼前一亮，零舍醒神。
昔日住開跑馬地的楊英偉，曾經可以掹車邊叫做「上等人」，捱貴樓、買貴餸，水電煤都好襟計。他說：「香港區乜都貴㗎啦！你以為我住跑馬地就上等人？我住舊樓㗎咋！住一樓，真係咩人都爬到入嚟啦！仲有，看更晚晚瞓覺，又唔好意思話佢。」旁邊楊太 Winnie忍唔住開口：「住得低，曱甴都多過人。有次返到屋企打開袋麵包，發覺條壁虎食緊我個包，激死人。」
原本客廳沒有雜物房，為了擺放兒子的玩具，楊英偉特意在裝修時增長牆壁，自製雜物房。
客廳四正寬敞，露台夠大容易透光，就算唔開燈都好光猛。
收納式衣櫃設在房與房之間的走廊位，既慳位又實用。不過估唔到男人老狗楊英偉會有咁多衫，而且儲放整齊，「咪又係老佛爺功勞。」
走廊的空間不算闊落，因為利用走廊位置造了收納式衣櫃，房間就唔使騰出空間來放衣櫃，慳唔少位。
事事以家庭為先的楊英偉，客廳放滿家庭照。「睇住佢哋啲相，食飯都開胃啲！」有點肉麻唷！
走廊增神秘門
楊英偉另一個嗜好，便是自家浸酒。這天，他便大騷已浸足一年的梅酒，讓我大開眼界。「好容易㗎咋！去街市買啲青梅返嚟，洗淨瀝乾水，用支叉將啲梅拮到一個個窿，等佢浸出味，之後加啲三蒸酒、冰糖一齊浸，浸夠一年就飲得。」慷慨的偉哥還把浸了一年的製成品送了給記者。
既然環境不如理想，把心一橫搬進將軍澳的日出康城。由於新樓實用面積打七折，擺放傢俬雜物亦要諗過度過。「屋企一家三口加工人 1,300呎其實唔算逼，呢度實用都有 7成 9左右，唔錯㗎啦！」不過偉哥嗜好多，地方漸漸變得不太見使。但他懂得利用空間存放雜物，幾乎把全屋牆身及地板都造成收納式儲物櫃。
甫踏入楊家門，偉哥已向記者介紹走廊旁邊有一度神秘的門，打開，原來是一個隱藏式雜物室，內裏放着一些阿仔未開封的玩具及電器，整齊又不礙眼。再走進書房，發現再有乾坤。湖水藍色地板下，揭開原來藏有四大格神秘儲物櫃，盡收藏楊英偉的魔術道具等。「造呢啲櫃嘅原意，係因為我真係多雜物，例如唔同厚薄嘅被咁，夏天張棉被唔通放出嚟咁核突咩！啲玩具放廳又唔係，放房又太多太亂，整個收納櫃就冇錯喇！」而他一家三口的衣服，也是藏在房與房之間的兩個大收納式衣櫃內，十分整齊。
搬屋為囝囝
其實楊英偉決定搬來「垃圾城」將軍澳，最大原因是為兒子讀書問題，主要貪調景嶺有一間在區內出名的直資學校（真道書院），升中學一條龍服務。
他一臉慈父說：「冇辦法，有咗小朋友，好多嘢都要以佢行先。呢度雖然近垃圾堆填區，但可能住高層，基本上七、八月先有味，其他時候真係唔多覺，有時仲覺得幾香㖭！哈哈……咁啱呢度又好近我返工，無理由唔揀啫！早排拍《初五啟市錄》，成日通宵接朝早，陳錦鴻都成日上嚟瞓。」
楊英偉畢業於浸會大學中文系，之後為興趣，又跑到香港演藝學院讀戲劇，年輕時候都是在不斷讀書，但他從不會強迫 7歲大、讀小二的兒子諾諾考名校，或將來一定要做高官。
「講真，我細個時都唔鍾意阿爸阿媽逼我啦！適當地俾小朋友空間，大家相處都會舒服啲！再者，佢依家讀緊嘅小學已經唔錯啦，喺區內算出名，直資升中又一條龍，煩少好多嘢。加上學校採用活動教學，唔使帶書、唔使着校服，感覺上好似冇咁大壓力。
「最大得着係課程好深，拎番嚟啲功課有時都考起我，我哋可以全家人一齊思考，又打電話請教吓啲親戚朋友，好一個親子活動。」楊太在旁謙虛說：「我哋都學到嘢㗎！」
為小朋友建立一個舒適安樂窩，相信亦是每位父母的首要目標。
偉哥夫婦每天的親子活動，便是與兒子一家三口捉波子棋。楊太說：「每日諾諾放學做完功課，我哋就好期望同佢捉到一盤棋。因為小二功課好深，有時都做到好夜，唯獨捉棋時就屬於我哋嘅親子時間。」
曾是劍擊教練的楊英偉，早前趁暑假便帶兒子學劍，「但佢依家鍾意跆拳多啲，因為有朋友仔陪佢一齊上堂。」
阿仔諾諾的「巴士房」，全由 Thomas車組成（下圖）。巴士上層是睡牀，下層則是溫習室，夠晒私人空間，相信是所有小朋友夢寐以求的 dream room。
大學修讀中文系的楊英偉，書房藏書數百本，但他閱讀範圍很廣，心理學、文學，甚至漫畫、旅遊書、食譜等，乜都有，擺放得井井有條。
留言列表
{{ article.title }}
