萬綺雯同郭晉安最後有情人終成眷屬而甜蜜咀嘴，不過唔講唔知，為遷就安仔高度，萬綺雯係着住拖鞋㗎。

有劇追

新鮮人齊撐老表

2013年01月11日 ~~ 第911期忽然１周

早排無綫俾城電嘅王維基大舉挖角，一時間電視城人才凋零，變成劇集主角來來去去都係嗰幾個，就講楊怡，啱啱先睇完《名媛望族》，跟住即上《法網狙擊》，死未？
好彩，形勢開始有改變啦，近期嘅劇集出現好多新鮮人。
好似下星期（ 14號）開播嘅《老表，你好嘢》，除王祖藍外，仲有王菀之、張繼聰以及久違熒幕嘅黃光亮。
不過講到最矚目嘅，則非棄亞視投無綫嘅萬綺雯莫屬嘞。
先唔討論內容，單係人腳，肯定俾大家一個新鮮感啦啩﹗

郭晉安表面開朗，實則自卑兼懦弱，之後因夾雜喺中港文化差異嘅環境而令其大有感受。

亞視兩位阿姐陳煒同萬綺雯先後過檔無綫，但萬比起陳煒，又真係有 luck好多，雖然陳煒已有套《法網狙擊》出街，不過只屬二線角色，而萬呢，喺《老表》入面係掛正頭牌嘅主角。
新鮮人除咗萬綺雯外，最搞笑係王祖藍初出道時，俾人話同一向做慣惡人嘅黃光亮激似，差啲俾人誤會佢哋係兩仔爺㖭。無綫就食住呢條橋，搵首次拍無綫劇嘅黃光亮拍《老表》，仲係要佢飾演王祖藍個老竇。呢個噱頭掂啦啩！
王祖藍參與編劇嘅《老表，你好嘢》雖然係以取笑內地人為題材，不過同毛舜筠、張堅庭嘅《老表你好嘢》只係同名而不同質。《老表》主要內容除涉及中港兩地矛盾外，亦諷刺內地人喺香港瘋狂購物嘅心態，還有雙非孕婦問題。但亦有暗諷香港人點樣利用內地市場搵錢等等，題材比較寫實兼現代化。
內容係咁嘅：一直發夢都要做旅遊界天王嘅郭晉安因為俾人呃而欠落巨債，破產後嘅郭諗住同女朋友湯盈盈安安穩穩度過破產期，誰不知湯竟然同死黨林盛斌有路，郭大受打擊之時遇到新移民社工萬綺雯、由東莞到香港發歌星夢嘅表弟王祖藍同呃飲呃食嘅老歌女朱咪咪、以及台灣返嚟嘅細妹王菀之。於是來自中港文化差異嘅鬧劇展開。

安仔生意失敗破產已經黑到痹，仲要俾老友林盛斌趁火打劫，搶走湯盈盈，有乜法子唔火起。

王祖藍呢個東莞新移民，對社工萬綺雯有 feel。真係癩蛤蟆想食天鵝肉。

岑麗香喺《老表》入面客串，扮演朱咪咪後生版，而王祖藍則飾演黃光亮後生版，綽頭唔錯。

安仔喺做導賞團期間，跟為移民爭取權益嘅社工萬綺雯相識。

朱咪咪飾演過氣歌手，一心栽培王祖藍成為歌手。

初次拍劇嘅王菀之，單係呢個追小偷鏡頭，竟然 NG咗 5次；反而鬼妹陳恩明嘅表現跟廣東話就好到令人咋舌。