子怡風騷舉杯
影合照時，好心就開心啲啦。章子怡微微抬頭，笑容可掬，但偉仔全程木無表情。
媽咪姐
我看的不是朝偉，是章子怡
世間所有的相遇，都是久別的重逢。
呢句王家衞式金句，真係道盡媽咪姐心聲。《一代宗師》籌拍 17年，補拍又補拍，延期再延期，千呼萬喚，終於喺本周二（ 8日）舉行首映禮。
搞咁「久」，你話冇期待就呃你嘅。梁朝偉練到斷手嘅詠春，章子怡剛烈優雅嘅演繹……不過武戲文拍，劇情慢過萬金油，仲有觀眾喺場內大嗌「好悶」，話頂唔順王氏金句喎。
唉，早前大家咪話班高官淨係識「語言偽術」，家吓俾你哋睇到真正嘅「語言藝術」，你哋又 complain？套戲都有講啦，看的不是招，是意！開宗明義，意境勝過一切。
可能現場觀眾反應麻麻，加上早前北京試映口碑平平，主角梁朝偉選擇留在自己的歲月裏，整晚悶悶不樂，笑又笑得唔開懷。老婆劉嘉玲唔關事，都喺 after party玩到凌晨 4點啦。朝偉？一早兩點幾自動鬆人，「一代宗師」變咗「一代失踪」。
相反女主角章子怡好活躍，佢嗰件七彩蛇皮裙搶盡風頭，又同導演、張震細聲講大聲笑。
梗係啦，早排佢男友撒貝寧先喺節目上，公開兩人關係，戀情持續升溫。《一代宗師》雖然被插爆，但全城激讚章子怡好戲過偉仔。
功夫兩個字，一橫一直。風騷兩個字，喺晒章子怡塊面度。
編註：紅字乃戲中金句
偉仔心不在焉
劉嘉玲着得靚靚撐老公，不過偉仔似乎未 warm up，笑容欠奉，個樣心事重重咁。
一個滿場飛
章子怡同導演、張震（右二）鬼死咁好傾，隔籬偉仔完全交唔到戲。
其後章子怡仲搵埋大肚蔡少芬合照，肚頂肚， nice！
一個落幕走人
一知道影完相，偉仔猶如甩難，急急腳落台，攰得佢！相反章子怡仲喺背後，叉腰繼續笑。
之後嘅 after party，偉仔凌晨兩點幾就走人。老婆同張叔平（中）則玩多兩個鐘， 4點幾先施施然落街搭車。
《一代宗師》必睇位
咪話媽咪姐冇勸你吖，電影節奏真係好慢，但有幾個場口必定唔可以錯過。
落雨打架
偉仔以一敵十，將苦練多時嘅詠春，發揮得淋漓盡致。記住，呢場打戲喺電影頭場，千祈咪遲到。
訂情一戰
章子怡飾演嘅宮二，因不服父親輸俾偉仔，專登找對方晦氣，點知一戰訂情，鼻點鼻暗暗撻着。
宋慧喬晒溫馨
有指宋慧喬不肯補戲，被王大導大幅刪減戲份。物以罕為貴，加上佢同偉仔嘅夫妻戲份真係幾 sweet㗎，大家要密切留意。
張晉有驚喜
章子怡為報父仇，喺雪地上跟蔡少芬老公張晉（小圖）對打。章打得亮麗，身為武指嘅張晉亦交到內心戲，比另一配角張震更搶鏡。
彈多過讚
《一代宗師》搶先喺內地公映，就連章子怡男友撒貝寧（左圖）亦喺微博作新詩支持。可惜吖，人人大讚章子怡表現出色，反而對電影負評較多。只有首映當晚幾位藝人俾面大讚，口碑都算兩極化。
周汶錡：好好睇，我俾 90分。
鵬哥：拍得真係好靚，但有啲對白要諗吓先明。
吳思遠：一啲都唔難明，而且非常震撼。
讚
彈
留言列表
{{ article.title }}
